Менің Отаным – Қазақстан. Сондықтан да мен Қазақстанды шексіз сүйемін және де Елбасымыз Н.Ә.Назарбаевтың «Қазақстан – 2030» бағдарламасына сәйкес, Қазақстан Республикасының бәсекеге қабілетті елу елдің қатарына кіріп, өркендегенін қалаймын.
Қазақстан Республикасы – алып тұлғалы ақындары бар, қайтпас қайратты батырлары бар тәуелсіз, егемен мемлекет. Қазақстанның кең байтақ жері, жайдарлы жүзді елі, ағынды өзен-сулары, биік-биік мұнар таулары әлемнің әр түпкірінебелгілі екені хақ. Ең бастысы, қазақ халқының кішіпейілділігіне, қонақжайлылығына еш халық тең келмейді. Қазақстан Республикасы – көп ұлтты мемлекет болғанына қарамастан, достық, түсіністік орнаған мекен. Еліміздегі қандай ұлт өкілдері болса да, қиын-қыстау шақтарда бір-біріне әрдайым көмек көрсетуге дайын тұрады.Біздің елімізге қызыға қарап, үлгі тұтатын мемлекеттер де аз емес. Ал, Қазақстан Республикасы – үлгі тұтуға лайық мемлекет.
Болашаққа жол тартқан қазақ халқының бүгінде келешегі кемел. Еліміздегі жүзеге асырылып жатқан шаралар, яғни жаңа технологияларға сай білім ордаларының ашылуы, ғылыми-техникалық прогресс, дәрігерлік мекемелердің салына бастауы – халқымыз үшін үлкен қажеттілік. Бұл жоғарыда отырған ел ағаларының қарапайым халыққа деген көмегі десек те артық айтқандық емес. Сондай-ақ, Елбасымыздың биылғы «Болашақтың іргесін бірге қалаймыз» атты Жолдауына сәйкес, Қазақстан халқының әлеуметтік-экономиклық жағдайы мен бүкіл тұрмыс-тіршілігі қазіргіден де жақсарады деп сеніммен айтуымызға болады.
Біздің еліміздің бәсекеге қабілетті білімді де білікті жастары, өз ісіне шебер мамандары жетерлік. Бүгінде Қазақстан жастары тәуелсіз елде өсіп, өз тағдырларын өздері жасап, ғылымда, мәдениетте, спортта үлкен жетістіктерге жетуде. «Жастар – үміттің жанған шырағы» дегендей, еліміздің білімді жастары Қазақстанның көк байрағын биікке көтереді деген ойдамын. Мен де өз елімді танытуға, оның тұғырын биік көтеруге өз үлесімді қосамын.
Гүлмира АҒАНАС, Л.Н.Гумилев атындағы ЕҰУ студенті.