Мерейтойға рухани тарту

Кеше «Қазақстан» Орталық концерт залында өткен Шанхай ынтымақтастық ұйымының 10 жылдығына арналған  мерекелік концертке ел Президенті Нұрсұлтан Назарбаев ШЫҰ-ның саммитіне қатысушы мәртебелі меймандармен бірге келді. Қазақстан өнер шеберлерінің мерекелік шашуын Ресей Президенті Дмитрий Медведев, ҚХР Төрағасы Ху Цзиньтао, Өзбекстан Президенті Ислам Каримов, Қырғызстан Президенті Роза Отунбаева, Тәжікстан Президенті Эмомали Рахмон, Ауғанстан Президенті Хамид Карзай, Пәкстан Президенті Асиф Әли Зардари, тағы басқа мәртебелі қонақтар тамашалап, делегация басшылары атынан өнерпаздарға себет толы гүл шоқтары тарту етілді. Тәуелсіздік жылдарында ел­ор­да еңсесін биіктеткен бірталай мәдениет ошақтары қаланса, со­ның ішінде әлемдік талғамға сай бой түзеген «Қазақстан» Орта­лық концерт залында бүгінде міне, Қазақ елін дамудың даңғыл жолына түскен мемлекет ретінде танып, алқалы жиынға келіп жат­қан мәртебелі қонақтарға өнердің түрлі өрімінен өнеге көрсетілуде. Сахнада Құрманғазы атындағы Қа­зақ мемлекеттік академиялық халық аспаптары оркестрі (дирижері Жалғасбек Бегендіков) атақ­ты  «Сарыарқа» күйін құйқыл­жыт­қанда, тылсымның тынысы ашылғандай. Экранда – қыран құсы қалықтайды. Ежелден еркіндік аңсаған қазақ даласының тө­бесінде бейбітшілік қыраны самғап, байтақ елдің тыныштық күзетшісіндей шолады. Әрмен қарай ШЫҰ-ның он белестегі жылнамасы парақталып, мемлекет басшыларының лебіздері жа­зылған көріністер ұсынылды. Фи­льм­нен кейін К.Байсейітова атын­дағы ұлттық опера және балет теа­трының балет труппасы Н.Ті­лен­диевтің «Ата толғауы» күйі негізінде әзірлеген биін орын­дады. Осы кештің әрін аш­қан «Серпер» дом­бырашылар ан­самблінің таны­мал күйлерден үзінді келтірген ға­жайып нөмірі таңдай қақтырды. Салтанатты концерттің шы­мыл­дығын халқымыздың қасиет­ті күй өнерімен ашып, төл дәс­түр­ді төрге оздырудың себебі қа­за­қ­ты өзге жұртқа етене таныс­ты­ру ниетінен болар деп бол­жай­мыз. КСРО халық әртісі Әлібек Дінішев Абайдың «Айттым сә­лем, Қаламқас» әнін шырқағанда зал іші сілтідей тұнып, ұйыды. ШЫҰ-ға мүше елдердің құр­ме­тіне өзбектің «Лязгі» биін «Салтанат» ансамблі, қырғыздың ха­лық әні «Жылқышыны» Қарақат Әбілдина, тәжіктің халық әні «Лали Бадахшонды» Ситора мен Парвиз Назаровтар, қытайдың ха­лық әні «Во ай ни Джунгоны» Гүлзира Бөкейхан, орыстың ха­лық әндерінен попурриді Талғат Мұсабаев, Олег Татамиров пен Сүндет Байғожин орындап, шеберліктерін паш етті. Клас­сика­лық жанрдан Моцарттың «Rondo Alla Turka» шығармасын орын­даған Гүлзия Стамбек, Әсел Нұр­ке­нова, Саджана Мырзалиева, Әсел Рақымжан мен Әзиза Бей­сенғұлова сынды жас прима қобызшылардың өнерлері өршіл рухта танылса, Э.Ллойд-Уэб­бер­дің «Опера елесі» мюзиклінен көріністі сахнаға алып шыққан Қа­зақстанның халық әртісі Нұр­жамал Үсенбаева мен Медет Чо­та­баевтың жоғары деңгейдегі өне­рі ешкімді бей-жай қалдыр­мады. П.И. Чайковскийдің «Аққу көлі» балетінен «Адажионы» Гау­һар Усина мен Жандос Әу­б­әкі­ров мүлтіксіз жеткізсе, «Дала бұлбұлдарын» орындаған Жә­ми­ла Баспақова, Бибігүл Жанұзақ пен Жәмила Жарқымбаеваның дауыстары түрлі мақаммен құ­бы­ла өріліп, әсерлі шықты. С.Ер­кімбековтің «Атамекен таңы» симфониялық шығармасын орын­даған жас скрипкашылар өнері­нен мін таппайсыз. «Елігай» балалар хоры Н.Назарбаев пен А.Қоразбаевтың «Үш қоңыр» әнін шырқағанда, мөлдір бұлақ­тай тұнық дауыстар сыңғырлады. «Қазақстан» әнімен шарықтаған мерекелік концерттің тарихи шежіресінде ел мерейін өсірер айшықты беттер қалды. Қарашаш ТОҚСАНБАЙ.