Сенат сайлауының күнтізбелік жоспары бекітілді

Орталық сайлау комиссиясы биылғы 19 тамызға та­ғай­ындалған Қазақстан Республикасы Парламенті Се­на­ты депу­таттарының сайлауын әзірлеу және өткізу бой­ын­ша негізгі іс-шаралардың күнтізбелік жоспарын бекітті. Кеше ОСК мүшелері осы мә­селеге байланысты мәліметтері­мен бөлісті. ОСК төрағасы Қу­ан­дық Тұрғанқұлов Ата Заңға сәй­кес Сенат Сайлау туралы Конс­ти­туциялық заңда белгіленген тәр­тіп­пен әр облыстан, респуб­ли­ка­лық маңызы бар қаладан және елі­міз астанасынан екі адамнан өкілдік ететін депутаттардан құ­ра­латынын, оларды азаматтардың тікелей дауыс беруі арқылы сай­ланған мәслихаттар депутаттары сайлайтынын атап өтті. «Сенат депутаттарының өкі­лет­тік мерзімі – 6 жыл. Олардың жартысы әрбір үш жыл сайын қайта сайланып отырады. 2005 жылғы 19 тамызда сайланған Сенат депутаттарының конститу­ция­лық өкілеттік мерзімі осы жыл­дың 30 қарашасы күні аяқталады, – деді ол. – Сондықтан биылғы жылдың 19 тамызы күні еліміздің 16 өңірінде Парламент Сенатына бір депутаттан сайлау өткізіледі. Осы сайлауда 15 сенаторды Пре­зиденттің өзі тағайындаса, 32 депутат жанама сайлау құқы негізінде жасырын дауыс беру ар­қы­лы сайланады». Осы жерде ОСК хатшысы Ба­қыт Мелдешев Сенат депутатты­ғынан үміткерлерді мәслихаттар ұсынатынын, сонымен бірге, мәс­лихаттар өздері шешкен ортақ бір кандидатты ұсына алатынын айт­ты. Одан әрі ол сайлау заңна­ма­сына сәйкес Сенат депутаттарын сайлау балама негізде болатынын, яғни дауыс беру бюллетеніне кемінде екі кандидат енгізілуі тиіс екенін ескертті. «Сенат депутат­ты­ғына кандидат болып тіркелу үшін үміткер облыс мәсли­хат­та­рының, республикалық маңызы бар қала немесе Астана қала­сы­ның мәслихаты депутаттарының жалпы санының кемінде 10 па­йы­зының қолдауына ие болуға тиіс. Яғни, кандидат әрбір мәслихат депутаттарының 25 пайызынан кем емес дауысын алуы керек», деді ол. Кездесуде Б.Мелдешев бұдан басқа тағы мынадай мәліметтер келтірді. Мұнда ол жиналған қол­дардың 1 пайыздан астамы растал­маса, Сенат депутаттығына кан­ди­даттың тіркелмейтінін, үміт­кер­ге депутат болып тіркелгенге дейін және оның заң талаптарына сәй­кес­тігі, оны қолдап жиналған дау­ыс­тар тексерілгеннен кейін ғана сай­лау жарнасы енгізілетінін айтты. Одан әрі ОСК мүшелері сай­лауға қатысты мынадай мәлімет­тер­мен бөлісті. Мәселен, сайлау жарнасының биылғы сомасы 239 985 теңге болады екен. Сенат де­путаттығына кандидат пен оның жұбайы немесе зайыбы тіркеуге дейін тұрғылықты жеріндегі са­лық органдарына 2011 жылғы 1 мау­сым­­дағы жағдай бойынша та­бысы мен мүлкі туралы декларация тап­сы­руға міндетті көрінеді. Ал сай­лауды әзірлеу және өткізу бойын­ша жоспарға сәйкес, канди­даттар­ды ұсыну 15 маусымнан 19 шілдеге дейін жүретіні, үміткер­лерді тіркеу 29 шілдеге дейін, ал сай­лау­ал­ды үгіт жұмыстары 30 шілдеден бас­талып, 17 тамыз күн­гі сағат 00.00-де аяқталатыны бел­гілі болды. Кездесуде осыдан басқа мына­дай мәліметтер келтірілді. Биыл Парламент Сенаты депутаттары­ның кезекті сайлауын өткізуге рес­публикалық бюджеттен 142 млн. теңге бөлініп отыр. Бұл сомаға сай­лау заңнамасына сәйкес, Сенат депутаттығына кандидаттар­дың әр­қайсысына сайлауалды үгіт жұ­мыс­­­тарын жүргізуге, көлік шы­ғын­дарына, кандидаттардың сайлау қо­рын құруға жұмсалатын қар­жы кіреді. Сайлау кезінде Сыртқы істер министрлігі ОСК-мен бірлесіп, халықаралық байқау инсти­ту­тын ашатын болады. ОСК сайлау­дың қо­рытындысын 25 тамыздан кешік­тірмей анықтауға тиіс. Сай­лау­шы­лардың 50 пайыз­дан астам дауы­сын алған немесе қайта дауыс беру кезінде басқа кандидатқа қа­ра­ғанда көп дауыс алған үміткер Се­нат депутаты болып сайланады. Ол үшін сай­лау­шылардың 50 пай­ыз­дан аста­мы сайлауға қатысуы тиіс. Дастан КЕНЖАЛИН.