«Виртуалды кәсіпорын» дегеніміз нені білдіреді?

Бірден айталық, бұл сымсыз технология, кәсіби бағдарламалық қамтамасыз ету базасында күшті мамандандырылған компьютерлерді (серверлерді), локальды компьютерлік желілерге кірістіретін бағдар­ламалық-техникалық кешен. Бұл студенттер мен оқытушылар үшін ақпарат жеткізу механизмі десе де болады. Жоғары оқу орындарында білім алып жатқан болашақ экономистер, қаржыгерлер, бухгалтерлер, өздеріне қажетті шынайы мәліметтерді осы кешен арқылы оқып біледі. Мұны сондай-ақ кәсіпорындардың, фирмалардың күнде­лікті есептеу жұмыстарына да пайда­ла­нуына болады. Бұл игілікті істі қазіргідей ақпарат ағыны өршіп тұрған заманда соның екпінінен қалмау үшін қолға алған едік. Іске қосылғаннан бергі кезең ішінде «Вир-туалды кәсіпорын» аясында оқу және ғылыми зерттеу қызметінің аясы кеңи түсті. Ең алдымен талапкерлер дербес жұмыс жа­сауға, ІТ технология көмегімен тиімді экономикалық, қаржылық, маркетингтік шешімдерді талдау және негіздеу жолымен оқу процесінің сапасын көтеруге де мүм­кіндік туып отыр. Жоғары оқу орын­дарында мұндай «виртуалды кәсіпорын» құру және оны пайдалану инновациялық бағдарламалар мен педагогикалық тәсіл­дерді қолдану арқылы білімді терең беріп, мазмұнын кеңейтуге бағыт сілтеуде. Бұл кешен тек оқу кезінде ғана емес, сонымен бірге, білім ордасының халықаралық дәре­жедегі байланысын ақпараттар ағынымен кеңейтуге де септігін тигізуде. Бір ғана мысал, біз осы ізденісіміз арқылы өткен мамыр айында, елордада болған әлемдік эко­номиканың жағдайы және оның по­тенциалды тәуекелдерін талқылаған ІV Астана форумына қатысуға мүмкіндік алдық. Нобель сыйлығының лауреаттары, министрлер, бизнесмендер, банк басшылары қа­тыс­қан пікірталас алаңында  оқыту­шы­ла­ры­мыз ой бөлісіп, өз тұжырымдарымызды ортаға салды. Әсіресе, факультет доценттері А.Қазамбаева мен Г.Айе­шевалардың «Үздік жоба» аталымы конкурсында «БСҰ-ға кіру жағ­да­йында агроөнеркәсіптік өндірістің тиімділігін және бәсекеге қабілет­тілігін қамтамасыз етудің ұйымдық-эконо­микалық механизмі» тақыры­бын­да­ғы баяндамалары қатысушы­лардың ерешке назарын аударды. Ғылыми-зерттеу жұмыстары мен оқытудың осы заманғы ақпараттық-коммуни­кациялық және педагоги­калық тех­но­логияларды пайдалана отырып жүргізген батыл байламда­ры өз нәтижесін берді. «Виртуалды кәсіпорын» деген атауға ие болған жүйе біздің эко­номика және бизнес факультеті ға­лымдары ізденісінің жемісі болатын. Ендігі жерде бұл жұмысты оқыту әдістемелерімен байыта отырып, білім беру ісіне қолда­натын боламыз. Қазір осы жобаны жетілдіру үстіндеміз. Елбасы Нұрсұлтан Назар­баев­тың болашақ кадрларды үш тілде дайындау жөнінде тапсырма бергені өзімізге белгілі. Мұны да басшылыққа ала отырып, ағыл­шын тілінде оқыту жүйесін тереңдету мақ­сатында мамандарды шетелде де дайын­дауды жүйелі жүргізіп келеміз. Біздің бұл ізденістеріміздің негізгі ар­қауында білім сапасын арттыру, білікті маман дайындау ісін орнықтыру жатыр. Елу жылға таяу уақыттан бері жұмыс істеп келе жатқан экономика және бизнес факультетінде қазір мыңнан аса студент білім алып жүр. Осы арада айта кетер бір нәрсе, маман дайындау бар да, сол маманды жұмыспен қамтамасыз ету бар. Біздің білім ордасында қазір бұл өз шешімін тапты деуге болады. Өйткені, өңірдің сұранысына қарай студент қабылдау, бітіргеннен кейін қажет жұмыс орнына жіберу мәселесі тиянақталған. Біз білімді іргелі университеттік деңгейде беруді бірінші кезекке шығардық. Одан кейін абсолютті нақты кәсіби іске қолдануға болатын арнайы білімдер мен дағдыларға бейімдейміз. Үшінші, төртінші курстардан бастап теориялық білімді практикамен ұштастыру қолға алынады. Әр студент кітаптан оқығанын өзінің қалаған мамандығы бойынша елді мекендерде айлап жүріп, тә­жірибе жинақтайды. Бұл оның болашақ­тағы жұмысына пайдалы болатыны сөзсіз. Алдағы уақытта осының бәрін «вир­туалды кәсіпорын» бағдарламасы бойынша ат­қа­руды жоспарлап отырмыз. Бұл әлемдік дең­гейдегі кадр дайындау ісін өз елімізде де орнықтыратын болады. Бұған Жәңгір хан атындағы Батыс Қазақстан агротехникалық университеттің дайындығы жеткілікті деп білеміз. Раушан ҒАБДУАЛИЕВА, экономика ғылымдарының докторы, профессор.