Грант иелері жақында анықталады

Кеше  Білім беру гранттарын тағайындау жөніндегі республикалық конкурстық комиссия өз жұмысын бастады. Конкурстық комиссияның төрағасы – Білім және ғылым министрі Бақытжан Жұмағұлов. Комиссияға Білім және ғылым, Денсаулық сақтау министрлік­терінің, жоғары оқу орындарының ректорлары кірді. 2011-2012 оқу жылында мемлекеттік білім тапсырысының көлемі 36 046 грантты құ­рай­­ды. Оның 35 046-ы күндізгі оқу нысанына, 1000-ы сырттай оқу нысанына қарастырылды. Білім беру гранттарын тағайындау конкур­сына 91 018 талапкер қатысса, оның ішінде қазақ тілінде – 66 912, орыс тілінде – 24 106 талап­кер қатысты. Сондай-ақ білім беру грант­тарын тағайындау конкурсына 3070 «Алтын белгі» иегерлері, 1240 халықаралық олимпиадалар мен ғылыми жарыстардың, орындаушылардың рес­пуб­ликалық және ха­лық­аралық конкурстары мен спорттық жарыс­тардың жеңімпаздары қатысты. Білім беру гранттарын тағайындау конкурсын өткізу кезінде оларға басымдық беріледі. Сонымен қатар, мемлекет тарапынан ауыл­дың жастарына, І, ІІ топтағы мүгедек балалар­ға, соғыс ардагерлеріне және соғыс мүгедек­теріне жеңіл­діктер мен кепілдіктер бойынша теңестірілген тұлғаларға, қазақ диаспорасы өкілдеріне, жетім балалар және ата-анасының қамқорлығынсыз қалған балаларға оқуға түсу кезінде бекітілген мемлекеттік білім беру тапсырысының көлемінен қабылдау квотасы қарастырылған. Білім беру гранттары нақты мамандық­тарға, тіл бөлімдеріне және оқыту нысандары бойынша сертификаттағы балдарына сәйкес тағайындалды. Білім беру грантына ие болған жеңімпаздардың тізімі 10 тамыздан кейін республикалық «Егемен Қазақстан», «Казахстанская правда» газеттерінде жарияланады. – Бүгін біз жоғары оқу орындарына қабыл­дау бойынша жүргізілген үлкен жұмыстың қоры­тындысын шығарғалы отырмыз, – деді Білім және ғылым министрі Бақытжан Жұма­ғұлов комис­сияның отырысында сөйлеген сөзінде. – Нұрсұлтан Әбішұлы Назарбаев өзінің Қазақстан халқына «Болашақтың іргесін бірге қалаймыз!» Жолдауында бізге білім­нің қол жетімділігі мен оның сапасын арттырудың жаңа тетіктерін енгізуді тапсыр­ған болатын. Сондықтан біз лайықты талапкерлерді қолдап, оларға білім алу үшін грантты тағайын­дауы­мыз керек. Министрдің хабардар етуінше, биылғы жылы мемлекеттік білім беру тапсырысы 36046 грантты құрады. Бұл өткен жылғымен салыстырғанда 621-ге көп. Назарбаев Университетіне 500 грант бөлінген. Мемлекеттік білім беру тапсырысының құ­рылы­мын экономиканың даму басымдықта­рына қарай қайта қараған. Ал 350 грантқа мемлекеттік тапсырыс жаратылыстану маман­дық­тарына көбейтілген. Сондай-ақ техника­лық және технологиялық мамандықтарға бөлінген грант 362-ге, ауыл шаруашылығы және ветери­нар­лық мамандықтарға қарасты­рылған грант 280-ге артып отыр. – Биылғы жылы жоғары оқу орындарына мемлекеттік тапсырысты конкурстық негізде орналастыру механизмі енгізілді, – деді министр әрі қарай. – Грант бойынша оқыту құқы­­ғына қатаң талаптарға сәйкес келетін 85 жоғары оқу орны иеленді. Биыл ҰБТ-ға 126 109 бітіруші қатысты. Бұл өткен жылмен салыстырғанда 18 564-ке артық. Отырыста Бақытжан Жұмағұлов қандай ма­мандықтарға конкурс жоғары екеніне де тоқталды. Министрдің айтуынша, бір орынға конкурс 2,8 адамды құрап отыр. Мәселен, қаржы маманды­ғына бір орынға 28,8 адамнан, халықаралық қа­тынас – 19,3, география – 19,4, юриспруденция – 17,8 адамнан келеді, ал радиотехника, электроника жә­не телекоммуникация – 5,91 геодезия және картография мамандықтарына 4,7 адамнан келіп отыр. Әлисұлтан ҚҰЛАНБАЙ.