Облыс әкімі Бергей Рысқалиев болашағынан үміт күттіретін талантты спортшылардың өзі қалаған спортымен алаңсыз шұғылдануына, жаттықтырушылардың бастаған ісін әрі жалғастыруына ұдайы қолдау білдіруде. «ҚазМұнайГаз» Барлау Өндіру» АҚ басшыларына өңірдің әр аудан орталығында бір спорт кешенін салып беруге ұсыныс жасады. Сонымен бірге, ол 2008 жылы Бейжіңде өткен жазғы Олимпия ойындарына қатысқан атыраулық спортшылар жүлдегер, не жеңімпаз болғанда қаржылай сый ұсынуға ұсыныс білдірді. Бұл тек спортшыларға ғана қанат бітіріп қоймай, өңір жұртшылығын да елең еткізді. Осы әлемдік спорттық додадан таэквондошы Арман Шылманов қола жүлдегер атанып, мұнайлы өңірдің ғана емес, ел спортының дамуына айрықша үлесін қосты. Бұл – Атырау спорты тарихындағы алғашқы Олимпиада медалі. Осылайша, спортшылары үшін Олимпиаданың медалін алуға жол салынды. Арман Шылмановтың осынау ақжолтай медалінің сыңғыры өзге спортшыларға қанат бітіріп, келешекте өңірде Олимпия ойындарының жүлдегерлер қатары толыға түсеріне сенеміз.
Соңғы жылдары Атырауда да спорттың бұқаралығын арттыруға қол ұшын созатын кәсіпкерлер қатары да көбейе түсуде. Мәселен, Индер ауданында Бағытжан Иманбаев, Атырау қаласында Владимир Пак сияқты кәсіпкер жігіттер спортшылардың түрлі республикалық, халықаралық чемпионаттарға, турнирлерге қатысуына демеушілік танытып, қаржылай қолдауын білдіріп келеді. Бұлардан өзге әр спорт түрлері бойынша құрылған федерацияларды басқарып, атыраулық спорт өрендерінің танылуына меценаттық көмегін аямайтын жанашыр азаматтар шоғыры қалыптасуда. Өйткені, елінің ертеңін ойлайтын отаншыл азаматтар жастардың патриоттық рухын оятатын спорттың өркен жаюы тек талантты спортшының шеберлігін шыңдауымен ғана дамымайтынын, талантты спортшыларға моральдық та, материалдық та қолдаудың қажет екенін біледі. Сол себептен спортшыларға жанашырлық танытар меценаттар қатары бүгінгіден де көбейе түссе, қазақ елінің абыройы мен айбынын асқақтатар спортшылардың бабына қоса бағы жанары даусыз.
Гүлжамал ҚАЛЕНОВА, Атырау облыстық туризм, дене шынықтыру және спорт басқармасы бастығының орынбасары. Атырау облысы.