Қазақстан полициясының ширек ғасырлық мерейтойына маңғыстаулық тәртіп сақшылары белсенді іс-қимылмен, тыныштықты қамтамасыз етудегі дайындықпен келді. Олар жұмысқа деген жауапкершілікпен бірге, ел мен жердің көркеюіне, гүлденуіне өз үлестерін қосуды азаматтық парыз санайды. Ізгі шаралардың бірі Жаңаөзен қалалық ішкі істер басқармасында көрініс тапты, олар 25 жылдық мерекеге арналған іс-шараларды алдымен бастап, басқарма ауласына ағаштар отырғызып, нысан айналасын тазартты.
Жаңаөзеннің көркіне көрік қосамын деп жұмылған жұмысқа полицей сапындағы 25 жас буын мен 25 жыл құқық қорғау саласында еңбек етіп жүрген аға буын өкілдері және Жаңаөзен қалалық ІІБ қызметкерлері қатысты.
– Бұл шараның мақсаты – жаңадан келген жас тәртіп сақшыларына 25 жыл ішкі істер органында еңбек өтілі бар аға буындардың тек өздерінің қызметтерінде ғана емес, қоғамдық жұмыстарға да атсалысатындығын ұғындыру, жастарды патриоттық тәрбиеге баулу. Жасы үлкен аға буын өкілдерінен үлгі-өнеге алып, өз еңбектеріне адалдығын, халықтың ішкі істер органына деген сенімділігін нығайту болатын, – дейді Жаңаөзен қалалық ІІБ бастығы, полиция полковнигі Амангелді Асқарұлы.
Аға буынның өнегелі ісіне жас полицейлер де риза. «Тек бұл ғана емес, көпті көрген аға-апаларымыздан алатын патриоттық тәрбиеміз де, тәжірибеміз де, үлгі-өнегеміз де әлі көп деп санаймын», – дейді жас буынның өкілі, Жаңаөзен қалалық ІІБ ӘПТ инспектор полицейі Қ.Қаттыбеков.
Жаңаөзендік тәртіп сақшылары қоғамға пайдалы іс атқара отырып, әріптестерін мерекемен құттықтап, елімізге тыныштық тілеген ақжарма тілектерін жолдады.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы
