Кедендік бақылау – ұрлық-қарлықтың жолын тыйып, заңсыз тасымалдарды болдырмайтын қажеттілік. Кеден саласындағы контейнерлік жүк тасымалы транспорттық тауар айналымының ыңғайлы, тиімді, үнемді әрі ең негізгі тәсілдерінің бірі болып келді. Бірақ, тасымалдаудың бұл тәсілін енді контрабандистер де жаппай қолдана бастады.
Бүгінде теңіз контейнерлерінде, автофургондарда, темір жол вагондарында қарулар, жарылғыш заттар мен есірткі тасымалданады. Кейде контрабанда тасымалдағыш құжаттар мен кедендік декларацияларда көрсетілген шынайы жүктер түрінде жасырылса, кейде контрабанданың жасырылмайтын кезі де болады. Әсіресе, бұл кедендік әкімшілендіру дамымаған елдерге тән болып келеді. Кейбір Қазақстанмен шекаралас мемлекеттердің осындай бағытта болуы себепті көп жағдайда қадағалау шараларын күшейте түсу қажеттігі туындайды.
Бұл үшін кедендік бақылау-тексеру кезінде озық техникаларды пайдаланудың маңызы зор. Тауардың жөнелтпе құжатына сәйкес және заңсыз жұмсалымдарды анықтау үшін жүктің ашылуынсыз сенімді тексеру жүргізуге мүмкіндік беретін, яғни үлкен жүк автомобильдерін және контейнерлерді кедендік тексеріп қараудың тиімді құралы – инспекциялық-тексеріп қарау кешені. Бұрын «тоғыз жолдың торабы» атанған, қазіргі таңда «халықаралық дәліз» атанған Маңғыстау өңірінде аталмыш құрылғы барлық халықаралық өткізу пункттеріне енгізілді. Әсіресе, теңіз жолдары арқылы мыңдаған тонна жүк тасымалдарын өткізіп тұрған «Ақтау теңіз портына» орнатылған мобильді тексеріп қарау кешенінің алар орны ерекше. Қазіргі таңда Ақтау және Баку порттарының арасында тұрақты паром қатынасы орнаған. Темір жол паромдары 18-20 сағат ішінде 253 теңіз милін еңсере отырып, мұнай өнімдерін, халық тұтынатын тауарларды, астық пен минералдық тыңайтқыштарды тасымалдайды. Паромдарға 54 темір жол вагоны мен 35 ауыр жүк тасымалдайтын автомобиль сыяды. Бір ай ішінде бұл жерден 1000-ға дейін ауыр жүк тасымалдайтын техника өтеді. 2015 жылдың қорытындылары бойынша жалпы жүктердің ауыстырылып тиелуі 5 млн 897 мың тонна болса, биылғы жылғы бірінші жартыжылдықтың қорытындылары бойынша бұл көрсеткіш 2 млн 681 мың тоннаны құрады. Осынша ауқымды іс-әрекет кезінде кедендік ресімдеу үрдісін жеделдету және тиімді кедендік бақылауды қамтамасыз ету үшін мобильді инспекциялық-тексеріп қарау кешені іске асты. Автомобиль шассиінде құрастырылған және кедендік бақылау жүргізу мақсатында жылдам орнын ауыстыруға мүмкіндік беретін жүйенің дайындық уақыты кемінде 15 минут, трасса бойынша қозғалыс жылдамдығы – 85 км/сағ. Кешенді ауыстырғаннан кейін сағатына 25 автомобильге бақылау жүргізуге болады. Сондай-ақ, тексеріп қарау кешені ішкі және маңындағы радиологиялық қауіпсіздік жүйесімен жабдықталған. Тексеру жұмысын жүргізу үшін, мобильді кешен қарап-тексеруге тиісті объектінің маңынан жүріп өтеді және рентгендік сканерлеуді жүзеге асырады. Ол, тіпті тиелген жүктің ортасында жасырылып тұрған жүкті көруге мүмкіндік береді. Кез келген жүктің, шассидің және кабина ішіндегінің радиоскопиялық бейнесін дисплейге шығару арқылы есірткіні, контрабандалық жүкті, қару-жарақты және жарылғыш заттарды табуға арналған құрал. Кешеннің қауіпсіздік жүйесі кездейсоқ сәулелену мен автоматты түрде орнын ауыстырумен байланысты қауіп-қатердің алдын алады, ол арқылы түрлі атаулар мен сұрыптамалардағы бірнеше мың тауарлар партиясы қарап тексерілді. Бұрын 2-3 сағат қаралатын жүктерді қазір кешен небары 2-3 минут ішінде қарауға мүмкіндік береді, көлік құралының ашылуынсыз және жүк көлік құралын түсірусіз оның суретін және тасымалданатын тауарларды, көлік құралының құрылымдық торабын сәйкестендіруге, тасымалдауға ты-йым салынған заттарды анықтауға, тауарлардың кескінін алуға болады.
Мобильді кешен жұмыс жасай бастағаннан бері заңнамада қарастырылған көптеген әкімшілік құқық бұзушылықтар мен қылмыстық істер анықталған.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы