«Нұр Отан» партиясының жанындағы Құқықтық кеңестің кеңейтілген отырысы өтіп, онда «Ақпаратқа қолжетімділік туралы», «Қоғамдық кеңестер туралы» және «Сыбайлас жемқорлыққа қарсы іс-қимыл туралы» заңдарды іске асырудың бірінші жылының алғашқы нәтижелері талқыланды.
Мәжілістің Заңнама және сот-құқықтық реформа комитетінің төрағасы, «Нұр Отан» партиясы жанындағы Құқықтық кеңес төрағасы Нұрлан Әбдіров жетекшілік еткен басқосуда «Ақпаратқа қолжетімділік туралы» Заңның қызметі жан-жақты сараланып, осы заң аясында «Модельді алаңқай» қызметін іске қосу қажеттілігі де сөз болды.
Мәжіліс депутаттары мен «Нұр Отан» партиясының жанындағы Құқықтық кеңестің мүшелері, мемлекеттік органдардың өкілдері, Қазақстандағы БҰҰ ДБ, ЕҚЫҰ-ның Астанадағы бағдарламалар кеңсесі, Гуманитарлық зерттеулер мен жобалар институты, Астана, Павлодар, Өскемен қалаларының және Қарағанды облысының Қоғамдық кеңестерінің өкілдері қатысқан жиында Ақпарат және коммуникациялар вице-министрі Алан Әжібаев қолданысқа енген заңның алғашқы жылының алдын ала қорытындылары жөнінде баяндама жасады.
«100 нақты қадам» Ұлт жоспарын іске асырудың негізгі бөлігін құрайтын осы заңдарды мүдделі тараптардың кең отырысында талқылаудың маңыздылығына тоқталған вице-министр, бүгінге дейін орындалған шаруалардың бірқатарын атап өтті. «Азаматтардың ақпаратқа қолжетімділігін қамтамасыз ету мақсатында министрлік ағымдағы жылда халықаралық ұйымдармен бірлесе отырып, аймақтардағы БАҚ өкілдері үшін семинар-кеңестерді өте сәтті өткізді. Сондай-ақ, нормативтік-құқықтық актілердің базасы да жасақталды. Соның негізінде азаматтардың арыз-шағым, өтініш-тілектерінің 73 пайызына дер кезінде жауап берілді», деді Алан Ғазизұлы. Сондай-ақ, ол министрлік соңғы кездері Үкімет отырысын онлайн-трансляция арқылы өткізуді белсенді қолға алғанын тілге тиек етті.
Негізгі баяндамадан соң сөз алғандардың кейбірі министрлік тарапынан жақсы көрсеткіштер болғанымен, ақпаратқа қолжетімділікті қамтамасыз етуде түйінді мәселелер бар екендігін айтып қалып жатты. Жалпы, ақпаратқа қол жеткізудің бір емес, бірнеше әдіс-тәсілі бар десек те, оның барлығы қалыпты жағдайда емес екендігі белгілі болды. Мәселен, осы күндері мемлекеттік органнан телефон шалу, жазбаша өтініш жазу, электронды байланыс құралдары арқылы немесе «Электронды үкіметтің» арнайы төрт порталы арқылы ақпараттар алуға болады екен.
Алайда, қазір бұл қызметтерді саралап шығып, оларды әлі де болса жетілдіру қажет деген ойға келдік. Себебі, жоғарыда аталған ақпарат алудың 5-6 әдісінің ішіндегі телефон шалу арқылы қандай да бір мәліметке қол жеткізу тетігі жұмыс істемей тұрғанын байқауға болады, деді Мәжіліс депутаты Мәулен Әшімбаев.
Одан кейінгі сөз мемлекеттік органдардың сайттары жөнінде өрбіді. Қазір өркениеттің кең өріс алып, интернеттің тілін меңгерген азаматтар саны артқан кез десек те, кейбір мемлекеттік органдар бұл мәселеге мән бермейтін секілді. Өйткені, қайсыбір мекемелер жеке сайты арқылы біраз сауалға жауап беру мүмкіндігі бола тұра, оны жүйелі түрде шынайы ақпараттармен дер кезінде қамтамасыз ете алмай отыр. Содан кейінгі бір әдіс – азаматтардың арнайы хат жазу арқылы 10-15 күн ішінде ресми жауап алуға қатысты жағдайды баяндайтын болсақ, бұл міндеттің де үдесінен шығып, мінсіз атқарып отырған органдар санаулы ғана. Міне, осыдан кейін «Ақпаратқа қолжетімділік туралы» Заң тиісті деңгейде қолданылып отыр деп айтуға ауыз бармайтындай.
Айта кетейік, ақпаратқа қолжетімділік заңы жұртшылыққа керек мәліметтерді жеткізуді қамтамасыз етумен ғана шектелмейді. Бұл – елдегі демократиялық үрдістердің дамуына, сыбайлас жемқорлыққа қарсы күреске, мемлекеттік органдардың ашықтығын қалыптастыруға, азаматтар құқығының сақталуына тікелей әсер ететін, соған көмектесетін тетік. Яғни, осы заңның талаптары тиянақты орындалу арқылы халық арасында мемлекеттік биліктің беделі артатындығы сөзсіз. Сондықтан да бұл мәселеге бейжай қарауға болмайды.
Нұрлыбек ДОСЫБАЙ,
«Егемен Қазақстан»