• 16 Наурыз, 2017

Кемел келешекке сенімді қадам

214 рет

көрсетілді

2 мин

оқу үшін

Egemen Qazaqstan

Алматыдағы Д.А.Қонаев атындағы Еуразиялық заң академиясында аталған оқу орнының «Қазақстан халқы Ассамблеясы» кафедрасының ұйытқы болуымен республикалық семинар өтті. Шараның мақсаты – Елбасы ұсынған жаңа реформадағы өзекті мәселелердің маңызына мән беру. Жиынға Қазақстан халқы Ассамблеясы Төрағасының орынбасары Леонид Питаленко, аталған оқу орнының басшылығы мен қызметкерлері, этномәдени бірлестік мүшелері, сондай-ақ БАҚ өкілдері қатысты. Конституциялық реформа – ел ахуалын жақсартудың даңғыл жолы. Бүгінгі жиында бас қосқан ғалымдар Парламент пен Үкіметтің әлеуметтік-экономикалық бағдарламалардың іске асуына тікелей жауапты болуы – олардың құзыретін арттырып қана қоймай, жауапкершілігін күшейтетінін айтты. Жаңа енгізілген өзгерістер алдағы уақытта мемлекеттің әлеуметтік-экономикалық дамуына жол ашатын берік көпір болмақ. Заң ғылымдарының докторы Өмірәлі Жалайри: «Конституцияға заман талабына сай өзгерістер енгізу – уақыт талабы. Алға жылжу үшін осындай маңызды қадамға бару арқылы нақты мақсаттарды айқындау керек. Сондықтан бұл бір қатып қалған дүние емес. Қоғамдық қатынастардың дамығанына байланысты Конституцияға да өзгерістер мен толықтырулар енгізуге болады. Сондықтан да Елбасының бастамасымен Конституцияға өзгерістер мен толықтырулар енгізілді. Бір айта кетерлігі, енгізілген өзгерістер мен толықтырулар жалпыхалықтық бірлік пен келісімге, азаматтарымыздың жақсы өмір сүруіне негізделген», – деді өзінің сөзінде. «Тәуелсіздік алған 25 жыл ішінде Қазақстан сыртқы және ішкі саясатта көптеген жетістіктерге жетіп, атын әлемге танытты. Мемлекеттік басқарудың биік сатысын бағындырды. Бизнес пен өндірістің жан-жақты дамуына мүмкіндік жасады. Уақыт талабына сай Қазақстан халқы Ассамблеясы елдегі елеулі оқиғалардан тыс қалған емес. Елбасы ұсынған жаңа реформаны талқылау кезінде Қазақстан халқы Ассамблеясының ұйымдастыруымен 400-ден астам іс-шара өткізілді. Елбасы нақтылаған басым бағыттар мемлекеттік басқарудың тиімділігін арттыратыны сөзсіз. Елдің экономикалық және саяси өмірінің дамып, халқымыздың әл-ауқатының артуына да септігін тигізбек. Мұндай жүйе – әлемнің дамыған демократиялық қуатты елдеріне тән. Біздің еліміз де өзін бүкіл әлемге демократиялық, құқықтық мемлекет ретінде танытатын болады. Қабылданған түпкілікті шешім мемлекетіміздің игілігі жолында өз жемісін береді деп сенеміз», – деді Леонид Питаленко. Жиынға қатысушы ғалымдар енгізілген өзгерістер мен толықтырулар елімізді дамытып, кемел келешекке деген сенімімізді нығайтатынын атап көрсетті. Арман ОКТЯБРЬ, журналист