Көкшетау қаласындағы Ақмола облыстық онкологиялық диспансерінің ғимараты 1990 жылы салынып, пайдаланылуға берілген болатын. Сол кезде жобада диспансердің емханасын салу қарастырылмағандықтан, қазір халыққа амбулаториялық-емханалық көмектің 10 түрі диспансердің стационарлық емдеу корпусының бейімделген 6 кабинеттерінде кезекпен көрсетіліп келеді.
Бұл жағдай онкологиялық көмек көрсету, пациенттерді қарап-тексеру сапасына, сондай-ақ, барлық бөлімшелердің палаталарында төсек орнының тығыз болуына әкеліп соқтырып отыр. Санитарлық-эпидемиологиялық нормаларға да еш сәйкеспейді.
Қазақстан Республикасында онкологиялық қызметті дамытудың 2012-2016 жылдарға арналған бағдарламасының аясында бірқатар медициналық жабдықтар (компьютерлік томограф, рентген-аппарат және эндовидеоскопиялық жабдықтар ) алынғанымен, емхананың жоқтығынан сол жабдықтарды аурухананың асханасына орналастыруға тура келген. Енді асхана жоқ. Қазіргі уақытта, науқастар өз палаталарында және бөлімшелерде бейімделген орындарда тамақтанады.
Бағдарламаға сай онкологиялық диспансердің базасында онкологиялық науқастарға қалпына келтіру және паллиативті көмек көрсету бөлімшесін ашу көзделген. Бірақ, бос үй-жайлардың болмауынан бұл көмек облыс орталығынан 20 километр жердегі ауылдық дәрігерлік амбулатория базасында көрсетіліп келеді.
2011 жылдан бастап онкологиялық науқастарға стационарды алмастырушы көмек көрсету ұйымдастырылды. Бүгінгі таңда, 25 төсектік орында емдеу жүргізілуде, емделушілер саны 4 есеге ұлғайған. Күндізгі стационарда негізінен Көкшетау қаласының пациенттері ем алуда, ал пансионат болған жағдайда көмектің осы түрі облыстың шалғайдағы аудан тұрғындарына да қолжетімді болар еді.
2015 жылдың ақпан айында мемлекеттің сараптамасымен жобалау-сметалық құжаттаманы әзірлеу аяқталып, бұған 16,5 миллион теңге қаржы шығарылды. Жобалау-сметалық құжатқа сәйкес, медициналық жабдықтар сатып алуды қосқанда, барлық жұмыстардың құны 2,6 миллиард теңгені құрайды. Жаңа емхана құрылысының жобасында пансионат та көзделген. Жобалау-сметалық құжаттың мерзімі 2018 жылдың ақпан айында аяқталады. Міне, осы жағдайды және Ақмола облысының субвенциялығын ескере отырып, Үкімет Көкшетау қаласында ауысымына 150 адамды қабылдауға арналған онкологиялық диспансер емханасының құрылысын 2017 жылы қаржыландырса, өте бір сауапты іс тындырғаны болып шығар еді.
Жабал ЕРҒАЛИЕВ,
Рашит ӘКІМОВ,
Сенат депутаттары