Отандық интернет БАҚ-тың мобильдік нұсқалары жасалады

2017 жылы «Қазконтент» отандық интернет БАҚ-тың мобильдік нұсқаларын іске қосу жобасын жоспарлап отыр. Бұл туралы бүгін Парламент Мәжілісіндегі Үкімет сағатында Ақпарат және коммуникация министрі Дәурен Абаев мәлімдеді. «Министрлік «Қазконтент» АҚ-мен бірлесе отырып, 2016-2020 жылдарға отандық БАҚ-тар мен олардың интернет-ресурстарын модернизациялау жоспарын жүзеге асыруда. «Қазконтенттің» әрбір интернет-жобасы жаңа форматта жұмыс істеуде. Қазан айында e-history.kz сайты бірегей тарихи контентімен және жаңа интерактивті мүмкіндіктерімен ауқымды «National Digital History» порталына өзгерді. Сайттың жаңа дизайны, логотипі даярланып, жаңалықтарды беру бағыты айтарлықтай жақсарды»,-деді Д. Абаев. «Әдебиет порталы» бағытында тиісті шаралар атқарылып жатқанына тоқталған министр, оның мобильдік қосымшасын іске қосу ескеріліп отырғандығын, оның көмегімен шығармаларды оқу мен кітаптарды тыңдау қолайлы болатынын атап өтті.