Терең білім елді еңселі болашаққа бастайды

Кеше Ақордада Мемлекет басшысы Нұрсұлтан Назарбаев Қазақстанның ең үздік магистранттарына Назарбаев стипен­дия­сы мен төсбелгі тапсырды. Назарбаев стипендиясы – еліміздегі ға­лымдар мен педагогтардың еңбегіне тың серпін беру мақса­тын­­да еліміздің жас магистранттарына алғаш та­ғайын­далған. Президент сыйлығына Диляра Копытина, Диана Бөрлібаева, Нар­­кес Оразбаева, Жадыра Ақы­лова, Александр Логвиненко, Нар­тай Бекмолдинов, Альфия Игесинова, Динара Асқарқызы, Бауыр­жан Әбдіқадыров, Ольга Кряжевских сынды еліміздің жоғары оқу орындарының магистранттары лайық деп танылды. – Біз өздеріңізбен тәуелсізді­гі­міз­дің 20 жылдығы қарсаңында кез­десіп отырмыз. Осы жыл­дар­дың ішінде атқарылған шаруа­лар­дың барлығын білесіздер деп ойлаймын. Бұл жылдар еліміз үшін оңай жылдар болған жоқ. Бірақ та тәуелсіздігіміздің арқа­сын­да бұрын-соңды болмаған жағ­дайда өмір сүріп жатырмыз. Қазақ халқы өзінің көп ғасырлық тарихында мұндай тәуелсіздік, мұн­дай ауқымдағы шекарада дү­ние жүзіне белгілі мемлекет құрған емес. Тарихи 20 жылдық елдің есінен еш уақытта ұмы­тыл­май­ды. Қазақстан Кеңес өкіметі құлағаннан кейінгі кездескен бар­лық қиындықты үлкен күш-жі­гер­мен еңсерді. Бүгінде Оң­түс­тік-Шығыс Азиядағы дағдарыс, 2008-2010 жылдардағы аса ауыр қар­жы­лық-экономикалық дағда­рыс әлі де жалғасуда. Еуропа бұл қиын­дықтың әсерімен әлі де кү­ресу үс­тінде, – деді Нұрсұлтан Әбішұлы. Елбасы келесі кезекте қазіргі заман – білім мен ғылымның за­маны екенін атап көрсетті. Жа­һандану жағдайында мемлекеттің озуы үшін, адамның озуы үшін, бәсекеге сай болуы үшін ең бірінші мәселе – білім мен ғы­лым­ның өркендеуі. Осыған байла­ныс­ты елдің де, мемлекеттің де орны айқындалады. Сондықтан, Қазақ­стан ел ретінде, мемлекет ретінде білімге қатысты, әсіресе, мектеп жасындағы, мектепке дейінгі мәселелерді шешіп жат­қа­нын білесіздер. Жаңадан мемлекеттік, мемлекеттік емес университеттер ашылып жатыр. Қай жерде оқимын десең де барлық жағдай бар. Сондықтан, біздің жастарымыз ғылым мен білімге ұмтылып, елдің келешегін ойлай­тын болса, тәуелсіздігіміздің бо­ла­шағы да мықты болады. Біз мақсаттарымызға жететін бола­мыз, деді Нұрсұлтан Назарбаев. Мемлекет басшысы бүгінде күллі әлем индустриялық кезең­нен кейінгі даму жолына түс­ке­нін атап өтті. Өмірдің мүлде жаңа тәртібі орнығуда. Жер қой­нау­ындағы байлыққа қарап оты­рып қалмай, жаңа ғылыми-тех­ни­калық прогреске негізделген жаңа экономика қажет екеніне де назар аударды. – Мемлекет қолдан келгеннің бәрін жасап жатыр. Қазақстан­ның үдемелі индустриялық-ин­но­вациялық даму бағдарламасы нақты осыған бағытталған. Біз 550 зауыт тұрғызамыз, 20 мың жұ­мыс орнын ашамыз, тіпті таяу жылдар ішінде біз одан әрі да­ми­тын боламыз. Жер қойнауындағы байлықтар, мұнай мен газ, металл бір кезде таусылады, қайтып қалпына келмейді, ал енді екінші экономиканы құру қажет, – деп атап өтті Нұрсұлтан Назарбаев. Елбасы сондай-ақ индустриялан­ды­ру, инновацияны ендіру мем­ле­кеттің тәуелсіздігін нығайту­мен бірдей екенін атап көрсетті. Сондықтан ғылымның тиімділігі және барлық экономиканы ин­но­вациялық жолға қою ең басты мәселе саналады. – Қазақстан алдында өте күр­делі міндеттер тұр. Осының ал­дын­дағы және осы ғасырдағы 50 жыл экономикалық-индустрия­лық ренессанс болды. Әлемнің бір­қатар елдері барлық салада жаңа серпіліс жасады, ал тек жаңа технология мен ғылыми жетістіктерді пайдаланған елдер ғана жаһандану көшбасшылары болды. Біз мұндай проблемаға енді ғана нақты қадам бастық. Ин­дустриялық-инновациялық да­мудың басты мақсаты – біздің тәуелсіздігімізді, мемлекеттігімізді нығайту. Бұл – тәуел­сіз­діктің екінші жағы. Мәселе мем­лекеттің келешекте бәскелестікке қабілетті ел болып, адамдардың өмірін жақсартатын елге айналуы немесе бұл істі атқара алмай­ты­ны туралы болып отыр. Міне, ин­дустрияландыру мен иннова­ция­ның кілті осында. Сондықтан да мен 100 инновацияны ұсындым, – деді Президент. Мемлекет басшысы Қазақстан үшін ең басты инновациялық ба­ғыт­тар азық-түлікпен қамтама­сыз ету, энергетика саласы, биология, медицина мен қаржы-экономикалық салалар болып табылатынын атап өтті. – Ғалымдар мен педагогтарды даярлауға тағы да бір серпін беру үшін мен Ұлттық Ғылым акаде­мия­сының мүшесі, академик ретіндегі өзімнің стипендиямды елі­міздің ең үздік магис­трант­тарына беріп отырмын. Бұл зерттеулер мен өмір сүру деңгейін көтеруге қаржылай көмек қана емес, сонымен бірге, бұл мем­ле­кеттің ерекше қамқорлығы, біздің әлеуетімізді мойындаушылық. Сен­дер өз өмірлеріңде мұндай же­тістікке бірінші рет жетіп отыр­сыңдар. Конкурстық комиссия 7000 үміткердің арасынан сендерді таңдап алды. Әрқайсы­ларың өздеріңді талантты магистр ретінде көрсетіп, өздерің­нің нақты жетістіктеріңді дәлел­деп шықтыңдар. Сондықтан осын­дай құқыққа ие болып отырсыңдар. Алдарыңа биік мақсаттар қоюды жалғастырып әрі оған қол жет­кізіңдер. Біз сендерге, біздің елі­міздің барлық талантты жаста­ры­на мақсатты түрде көмектесетін боламыз, – деді Мемлекет бас­шысы. Қазақстан Республикасы Пре­зидентінің стипендиясы барлық оқу кезеңінде үздік оқуымен кө­рінген, ғылыми-зерттеу жұмыс­та­рымен шұғылданатын және оқу орындарындағы қоғамдық өмірге белсене араласатын жоғары оқу орындарының магистранттарына тағайындалады. Ұлттық жоғары оқу орындарына стипендия та­ғайындау ережесіне сәйкес ғылыми кеңестердің шешімі негізінде 2011-2012 жылдардағы оқу жылына арналған стипендияны тағайындау үшін конкурсқа 19 үміткер ұсынылды. Білім және ғылым министрлігінің республи­ка­лық конкурстық комиссиясы ғылыми зерттеулердегі жоғары же­тістіктері, жетекші журнал­дар­дағы ғылыми жарияланымдары, үздік оқуы мен белсенді қоғам­дық қызметтері үшін ұлттық жо­ғары оқу орындарының 10 үздік магистрантын таңдап алды. Бұл күнгі кездесу кезінде Назарбаев стипендиясын иеленген магистранттар да сөз алып, өз ой-пайымдарымен бөлісті. Олар ел­дің ғылым-білім саласы төңіре­гін­де өздерін толғандырып, өз­де­рі түбегейлі зерттеп жүрген мәсе­ле­лерді ортаға салды. Ел жас­та­рына көрсеткен шексіз қам­қор­лы­ғы үшін Елбасына алғыстарын жеткізді. Мәселен, «Жеміс-көкөніс ша­руа­шылығы» мамандығының ма­гис­транты Динара Асқарқызы: «Бүгінгі күн – менің өмірімдегі ең бір ұмытылмас, бақытты күн. Елімізде алғаш рет тағайын­дал­ған «Назарбаев стипендиясы­ның» иегері атану мен үшін зор мақтаныш. Бүгінде білімге құмар жастардың елімізде, сондай-ақ шетелдерде білім алуына барлық жағдай жасалған. Мен Президент стипендиясын иелене оты­рып, Сіздің алдыңызда біздің Ота­ны­мыздың білім және ғылым сала­сын­дағы міндеттемелерінің орын­далуына бар күш-жігеріммен ат­са­лысамын», деді. «Менеджмент» мамандығы бой­ынша білімін тереңдетіп жүр­ген Жадыра Ақылова Қазақ­стан­да тұңғыш рет тағайындалған сти­­пендияны тапсырғаны үшін Мемлекет басшысына алғыс айт­ты. «Менің арманым – ғылыммен айналысып, кәсіпорында қызмет етіп, жиған тәжірибемді студенттермен бөлісу. Сіздің студент жас­тарға көрсетіп отырған қам­қорлығыңызға барлық студенттер атынан шексіз алғыс білдіремін. Сізге зор денсаулық, ұзақ ғұмыр, елімізді келешекке бастаған сапарыңызға сәттілік тілеймін», деді Ж.Ақылова. Құрманғазы атындағы Қазақ ұлттық консерваториясының ма­ги­странты Нартай Бекмолдинов та өзінің Президент стипендия­сы­ның иегері болғанына қуа­ныш­ты екенін жеткізді. «Бұл күн – мен үшін ұмытылмас күндердің бірі. Сіздің өнерге жақын еке­ніңізді біле отырып, жүрегімдегі бар қуанышты сөзбен емес, әуен­мен жеткізуге рұқсат етіңіз», деп баян аспабында Құрманғазының «Балбырауын» күйі мен «Атамекен» әнін нақышына келтіре орын­дап берді. Кездесу қорытындысында Ел­басы Нұрсұлтан Назарбаев жас ғалымдарға айтылған ойлары үшін алғыс білдіріп, еш уақытта ізденістен, жаңалық ашуға деген құлшыныстан танбаңдар деген тілегін жеткізді. Президент жас ғалымдармен естелік суретке түсті. Ләйла ЕДІЛҚЫЗЫ. ----------------------------------------- Суретті түсіргендер С.БОНДАРЕНКО, Б.ОТАРБАЕВ.