Ер азамат алға қойған мақсатына жетіп, аңсаған арманының шыңын бағындыру үшін, өзіне деген сенімділікті бойына қалыптастыру қажет. Болашағын әскери саламен байланыстыру ол жүректілік болып табылады. Себебі, әскери саланың қиындығына кез келген адам төтеп бере алмайды. Тек, Отан алдындағы парызын жүрекпен сезініп, өмірін әскерге арнаған азаматтың таңдауы ерлікпен пара-пар.
Бүгінгі таңда еліміздің қорғаны болар ұрпақтың саналы, сауатты болуына басты назар аударылған. Олар Қарулы Күштердің әр саласына байланысты жоғары әскери институттарда білім алуда. Олардың арасында Радиоэлектроника және байланыс әскери-инженерлік институтының түлектері де бар. Аталған әскери институт, болашақ офицер мамандарын дайындайтын Қазақстан Республикасы Қарулы Күштеріндегі алдыңғы қатарлы әскери институт болып саналады.
Әскери институтта білікті, тәжірибелі мамандар қызмет атқарады. Командирлер мен профессорлық-оқытушылар құрамы курсанттардың білімін шыңдау мақсатында аянбай еңбек етуде.
Курсанттардың жеткен жетістігі − институт ұжымының жеңісі, еңбегінің жемісі десек, орынды болар. Курсанттар өздерін халықаралық, республикалық, облыстық, қалалық деңгейде ұйымдастырылатын ғылыми жобаларда, спорттық жарыстарда, интеллектуалды сайыстарда жоғары нәтиже көрсетіп келеді. Мұндай биік белестерді бағындырған білім алушылар Қарулы Күштерге қосқан үлесі үшін «Ел қорғаны» медалімен марапатталады. Ендігі кезекте осы марапатқа ие болған курсанттарға тоқталып өтсек:
Қайыржан Жұбандықов – Радиоэлектроника және байланыс әскери-инженерлік институты рабиобағыттау факультетінің 5-курс курсанты. Болашақ офицер маман оқуда және жауынгерлік дайындықта үздік көрсеткіш көрсеткені үшін, ғылыми-зерттеу жұмыстарына қосқан үлесі үшін «Ел қорғаны» медалімен марапатталды. Курсант Қ.Т.Жұбандықов республикалық интеллектуалды олимпиаданың жеңімпазы. Ведомоствоаралық конференциялардың қатысушысы. «Үздік спортшы жауынгер» спорттық атағының иегері, ҰОС-тың 70 жылдығына арналған парадқа қатысушы.
«Ел қорғаны» медалімен марапатталған тағы бір курсант Темірлан Мұқатаев. Ол аталған институттың радиобағыттау факультетінің түлегі. Курсант Т.Мұқатаев ТМД жоғары оқу орындарының курсанттары арасында өткен халықаралық олим-
пиаданың қатысушысы, «Үздік спортшы жауынгер» спорттық атағының иегері, ҰОС-тың 70 жылдығына арналған парадқа қатысушы. РЭжБӘИИ «Алтын белгі» медалінің үміткері. Ведомоствоаралық ғылыми-зерттеу конференцияларының жеңімпазы. Республикалық, қалалық ЖОО студенттері арасында өткен дебаттардың жеңімпазы.
Жігітке жеті өнер де аз. Жоғарыда айтып өткендей, өзіне сенімді, сауатты ұрпақ − еліміздің жарқын болашағы. «Ел қорғаны» медалінде қашалып жазылған «Отаныңды сүй, халқыңа қызмет ет» деген қанатты сөз елді қорғаушы әрбір азаматтың жадында болуы тиіс. Егер Бауыржан Момышұлының сөзімен айтар болсақ, «Ежелден ер тілегі – ел тілегі. Адал ұл ер болып туса – ел тірегі». Антына адал, еліне қорған болар азаматтарымыз көбейе берсін.
Радиоэлектроника және байланыс әскери-инженерлік институтының бітіруші түлектерін бес жыл көлемінде алған білімдерінің жемісін көріп, білікті маман атанып, командирлер мен оқытушылардың және ата-аналарының үмітін ақтауларын тілейміз!
Сәуле ШАЯХМЕТҚЫЗЫ
АЛМАТЫ
