Өткен жылы, Әдеп жөніндегі уәкілдің жеке қабылдауына жергілікті атқарушы органдардан 16 азамат келген болса, осы жылдың 5 айында 17 азамат қабылданған. Азаматтардың басым көпшілігі мемлекеттік қызмет саласындағы заңнамаға түсіндірме сұраған. Әрине, уәкілдің жұмысы тек заңнамаға түсіндірме берумен шектелмейді. Өткен жылы, аумақтық департаменттің берген ұсынысы негізінде Әдеп жөніндегі уәкілмен тиісті жұмыстар жүргізіліп, Маңғыстау облысының ветеринария басқармасындағы қызметкерлердің арасындағы ахуалдың одан әрі шиеленісуіне жол берілмеді. Сонымен бірге, уәкілдің ұсынысы негізінде аталған басқарманың басшысы мен жауапты қызметшілері әдеп кодексі талаптарының бұзылуына жол бергені үшін тәртіптік жазаға тартылды.
Бейнеу ауданының бір мемлекеттік қызметшісі кешенді аттестаттау барысында, жеке құзыреттерін анықтайтын тестілеуден өткеннен кейін, оның нәтижесіне көңілі толмай, тестілеу нәтижесін жыртып тастап, мемлекеттік қызметшіге тән емес қылықтар көрсеткен. Бұл дерек аумақтық департаменттің ғимаратында орын алғандықтан, назардан тыс қалдырылмай, тиісті акті жасақталды. Сонымен бірге, Әдеп жөніндегі уәкілдің атына шара қабылдау үшін ұсыныс енгізілді.
Аталған ұсыныс Әдеп жөніндегі уәкілдің Бейнеу ауданына баруына және мемлекеттік қызметшіге жат қылықтардың алдын алу бойынша түсіндірме жұмыстарын жүргізуіне негіз болды. Мемлекеттік қызметшілердің арасында болып жататын қоғамға жат қылықтар орталық мемлекеттік органдардың аумақтық бөлімшелерінде де кездеседі. Өткен 5 айдың ішінде аумақтық департамент орталық мемлекеттік органдардың Әдеп жөніндегі уәкілдеріне бірнеше ұсыныстар жолдады. Мысалы, биылғы жылдың наурыз айында Маңғыстау облыстық орман шаруашылығы және жануарлар дүниесі аумақтық инспекциясының қызметшілері арасында бір-біріне дөрекілік көрсету деректері орын алған. Нәтижесінде, құқы бұзылған қызметшілер аумақтық департаментке шағымданып, тиісті тексеру жұмыстары ұйымдастырылды. Шағымда көрсетілген деректер тексеру барысында дәлелденіп, Қазақстан Республикасы Ауыл шаруашылығы министрлігінің Әдеп жөніндегі уәкіліне қажетті шаралар қарастыру үшін ұсыныс енгізілді. Осы ұсыныс негізінде, министрліктің Әдеп жөніндегі уәкілі аумақтық инспекцияның ұжымымен кездесу ұйымдастырып, әдеп нормаларының бұзылуына жол бергені үшін инспекция басшысының орынбасарына «сөгіс» түрінде тәртіптік жаза берді.
Жақында Әдеп жөніндегі уәкілдердің жұмысын реттейтін Қазақстан Республикасы Президентінің Жарлығына өзгерістер мен толықтырулар енгізілді. Өзгерістерге сәйкес, Әдеп жөніндегі уәкілдің лауазымы Мемлекеттік саяси және әкімшілік қызметшілер лауазымдарының тізіліміне енгізілді. Ендігі жерде, әдеп жөніндегі уәкілдің функциясы басқа лауазымдағы қызметшіге қосымша жүктелмей, дербес қызметші атқаратын болады. Бұл өзгеріс әдеп жөніндегі уәкілдердің жұмысына жаңа қарқын берері сөзсіз.
Ендеше, тізілімге жаңадан енгізілген лауазым иелерінің жұмысына тек сәттілік тілейік.
Ерлеген МЕНДАЛИЕВ,
Мемлекеттік қызмет істері және сыбайлас жемқорлыққа
қарсы іс-қимыл агенттігінің Маңғыстау облысы
бойынша департаменті басшысының міндетін атқарушы