Әлемдік додаға еліміздің атынан сынға түскен Сәбина доппен жаттығу сайысында 16.850 ұпай жинап, жарыстың күміс жүлдесін иеленді. Алтын медальды ресейлік Екатерина Селезнёва – 17.450 ұпай көрсеткішімен жеңіп алды. Ал үздік үштікті Беларусь қызы Галкина Катерина қорытындылады. Оның нәтижесі – 16.450 ұпай.
Сондай-ақ, Әлия Юсупованың шәкірттері жақында елордадағы «Дәулет» теннис орталығында ұйымдастырылған көркем гимнастикадан сеньорлар арасындағы тоғызыншы және жасөспірім қыздар арасындағы ХV Азия чемпионатына қатысып, жалпы саны 12 медаль иеленген еді. Азия біріншілігіне сарықұрлықтың 14 елінен келген 153 спортшы өз бақтарын сынаған болатын.
Чемпионаттың алғашқы күніндегі командалық жарыста Қазақстан құрамасы сапынан Рио Олимпиадасына қатысқан Сәбина Әшірбаева, сондай-ақ, Әлина Әділхан, Анна Афуксениди және Селина Жұматаевалар қатысып, Азия чемпионы атанды.
Ал жекелей сында доппен және шеңбермен жаттығу сайысында Сәбина Әшірбаева алтын медаль иеленсе, шеңбермен жаттығуда Әлина Әділханова мен топтық бәсекеде ел намысын қорғаған Регина Сұлтанова, Даяна Жақыпова, Әнел Талғатбек, Кәмила Көптілеу, Аружан Қазбекова, Динара Ерғалиевалар чемпионаттың қола жүлдегері атанды.
Сонымен қатар, жасөспірімдер арасындағы командалық бәсекеде Қазақстан құрамасы сапынан сынға түскен Әдиля Тілекенова, Роза Әбітова, Даяна Әбдірбековалар Азия чемпионатының алтын медалін иеленді.
Топтық кезеңде жарысқа түскен Сағина Мұратқызы, Айза Рүстемқызы, Дария Шарафиденова, Ділназ Мұсабекова, Райана Сүлеймен және Рената Жолдыновалар күміс жүлдегер атанды. Үш күнге созылған Азия чемпионатында Қазақстан Ұлттық құрамасы жалпы саны 12 медаль иеленді. Оның алтауы алтын, екеуі күміс және төртеуі қола.
Айта кетейік, көркем гимнастикадан жыл сайын өтетін Азия чемпионаты биыл Қазақстанда осымен төртінші рет ұйымдастырылды.
Әли Битөре,
"Егемен Қазақстан"
