Жуырда тараздық тыңдармандар әйгілі өнерпазбен жүздесіп, әндерін тыңдады. Тараз қаласына арнайы келген ол Т.Рысқұлов атындағы орталық саябақта жұртшылықпен жүздесіп, қошеметке ие болды. «Көне Тараз» тарихи-мәдени кешенінде болып, Әулиеатаның бүгінгі келбетімен танысты. Әлемдік сахна саңлағы өткен шақтарынан қызықты естеліктер айтып, көпшілікке жақсы әсер сыйлады.
Негізі Робертино Лоретти елімізге Астана төрінде өтіп жатқан ЭКСПО-2017 халықаралық мамандандырылған көрмесінің құрметіне орай келген екен. Астана шаһарынан соң Тараз қаласына арнайы келуді жөн санаған әнші Қазақстанға әр келген сайын үлкен әсерде болатынын жеткізді. «Мен Қазақстанға бірінші рет келіп отырған жоқпын. Осыдан тура он жыл бұрын да қазақстандық тыңдармандармен қауышқаным ел есінде шығар. Тарихи Тараз қаласында да болғанмын. Араға он жыл салып қайта келгенімде, Тараз қаласының айтарлықтай өсіп, өркендегенін байқадым. Сондай-ақ, Астана қаласында өтіп жатқан ЭКСПО көрмесі мені керемет әсерге бөледі. Астананың таңғажайып қалаға айналғанын көріп, тамсандым», деді өнерпаз.
Кезінде әлем тыңдармандарына «Jamaica», «O sole mio», «Ave Maria» секілді әндерімен танымал Лоретти көңіл түкпірінде жүрген көпшілікке беймәлім ойларымен де бөлісті. Әсіресе, көпшілікті қызықтырғаны, ол өзінің 1960 жылы алған алтын табақшасын Елбасы Нұрсұлтан Назарбаевқа сыйға тартқысы келетін ниетінің бар екенін айтқаны болды. Сондай-ақ, ол өзінің әншілік өнеріне жуық арада нүкте қояды екен. Қазақ елін құрметтейтін ол Астана қаласында өтетін шығармашылық кешінде соңғы рет ән шырқайтынын жеткізді.
Хамит ЕСАМАН,
«Егемен Қазақстан»
Жамбыл облысы