Кездесуде Қ.Мәми екі елдің ынтымақтастығын жандандыруға елшінің тікелей қосқан үлесін атай келе, ЭКСПО-2017 көрмесінің шеңберінде Сингапурдың ұлттық күнінің табысты мерекеленуімен құттықтады.
З.Бахарудин өз кезегінде екі елдің ынтымақтастық деңгейі көбінесе мемлекеттік құрылымдардың өзара іс-қимылды арттыруына тікелей байланысты екендігін атап өтті.
Қ.Мәми елшінің Қазақстанның конституциялық реформаны өткізуі туралы сұрағына жауап бере келіп, Президенттің мемлекеттік бағдарламаларды бекіту туралы құзыретін Үкіметке беру, Ішкі істер және Әділет министрлерін тағайындау тетіктерінің өзгеруі, Үкіметтің Парламентке тікелей есептілігінің күшеюі туралы айтты. Сот жүйесіндегі жаңашылдықтар бойынша Ата Заңнан судьялыққа кандидаттардың 25 жас шектелімі туралы талаптың алынып тасталуына айрықша назар аударылды. Аталған қадам кандидаттарды судьялыққа 30 жастан бастап тағайындау туралы міндетті жас шектелімін арттыру жөнінде «Сот жүйесі мен судьялардың мәртебесі туралы» Конституциялық заңға өзгерістер енгізуге мүмкіндік берді.
Елші Қазақстанда жүзеге асырылған конституциялық өзгерістерді дер кезінде қолға алынған бастама деп бағалап, «Сингапурдың тәжірибесі Қазақстанға ғана қызықты емес, сонымен қатар, Сингапур да Қазақстанның даму тәжірибесін мұқият зерделеп отыр», деді. З.Бахарудин мырза Астанадағы Халықаралық қаржы орталығының (АХҚО) жұмысын ұйымдастыруға белсене қатысуға әзір екендігін жеткізді.
Осы мәселені талқылай келе, Қ.Мәми АХҚО-ның жанынан инвестициялық дауларды шешу мақсатында арбитраж орталығы мен қаржы сотын құру жұмысының барысы туралы әңгімеледі. Аталған сот еліміздің сот жүйесіне кірмейді, онда сот ісі ағылшын тілінде жүргізіліп, ағылшын-саксон құқығы қолданылатын болады. Қ.Мәми Жоғарғы Сот АХҚО-ның ең жақын серіктесі болып табылатындықтан, Дубай қаржы және Сингапур арбитраж орталықтарының тәжірибесі негізінде оның дамуына мүдделі екендігін атап өтті.
Кездесу соңында тараптар Қазақстан мен Сингапурдың құқық саласындағы алдағы ынтымақтастығы өзара түсіністік жағдайында дами беретіндігіне сенім білдірді.
«Егемен-ақпарат»
