– 2016 жылы Қарағайлы ауданына су тарттық, – дейді Николай Лукин. – Жобаны қолға алған ұйымның әкімшісі ретінде мен бұл құрылыс-жөндеу жұмыстарын мердігер мекеме дұрыс орындады деп айта аламын. Жан-жақты тексерген мекемелердің талап-тілектері түгелдей ескерілді. Қарағайлыда екі аралық стансаны жарықтандыру жұмыстары ғана қалып отыр. Және Қаржаубайұлы көшесі мен Павлодар қаласына шығатын трассаны асфальттау жұмыстары да алдағы уақыттың еншісінде.
Сонымен, «Нұрлы жол» бағдарламасы бойынша 2017 жылы Семейде Затон аумағындағы құрылыс-жөндеу жұмыстарынан бөлек, Қайнар ауылының да су жүйелерін жөндеу мәселесі тұр. Және Восточный кентіне су құбырын тарту, Шүлбі кентіндегі су тазалау қондырғысын жөндеуден өткізу керек. Шүлбідегі су тазалау қондырғысының құрылыс жұмыстары осыдан бір ай бұрын басталса керек. Осы уақыт аралығында жұмысшылар жұмыс кестесінен біршама қалып қойыпты. Ақшалай шаққанда бұл кешігу 139 млн теңге болып шығады екен. Және Восточный кентінің де су құбырын жөндеу жұмыстары біраз кешігуде.
– Қайнар ауылындағы күрделі жағдай депутаттардың басты назарында, – деді «Нұр Отан» партиясының Семей қалалық филиалы төрағасының орынбасары Зульфия Жамалитдинова, – депутаттардың сынға алғандарынан мысалға келтірсек, ауылда су құбырларын тарту мүлде дұрыс қолға алынбапты. Қайнардың көшелері қазылған күйі тұр. Қазылған жердің ұзындығы 18 шақырымды құрайды. Тек 5,5 шақырымына ғана құбырлар салынған. Бұл жерде енді не техника, не жұмысшылар жоқ. Ал адамдар қазылған көшелерден абайлап жүруге мәжбүр, балалары не өздері шұңқырға түсіп кетіп, жазым болар деп қорқады.
– Бұл үшін мердігерлерді жауапкершілікке шақырамыз, – деді Николай Лукин, – егер біз келісімшартты бұзып, қайтадан тендер жарияласақ, Қайнар ауылының құбыры келер жылдың соңында да бітпеуі мүмкін. Себебі, осындай конкурстардың өту мерзімі ұзақ. «Нұрлы жол» бағдарламасы бойынша 2017 жылға жобаланған көптеген құрылыс және жөндеу жұмыстарының созылып кетіп, уақтылы аяқталмауына себеп болып отыр. Біз биыл конкурс аяқталған соң, шілде айының соңында ғана келісімшартты бекіттік. Сөйтіп, мердігерлер жұмысқа жаз ауа кірісті.
– Біз Парламент Мәжілісінің депутаттары алдында мемлекеттік тапсырыс және сатып алу туралы заңдылықтардың конкурстық шарттарын өзгерту туралы мәселені үнемі айтудамыз, − деді «Нұр Отан» партиясының Семей қалалық филиалы төрағасының орынбасары Зульфия Жамалитдинова, – тіпті кеше ғана Мәжіліс депутаты Василий Олейник келді. Тағы да осы конкурс мерзімін назарға алуды ұсындық. Қазіргі уақыттағы мемлекеттік тапсырыс бойынша өтетін конкурс мерзімдерінің едәуір созылып кететіндігіне орай бөлінген қаржыға атқарылатын жұмыстар кешігіп жатады. Сөйтіп, көбіне асығыстықпен атқарылған жұмыстардың сапасы нашар болып шығып, мемлекет қаржысы қайтадан шығын болады.
Раушан Нұғманбек
СЕМЕЙ
