Ұлыбритания мен Солтүстік Ирландия Біріккен Корольдігінің елшілігі және Елбасы кітапханасының Талдау орталығы ұйымдастырған жиында Қазақстан-Британия қатынастарының 25 жылдық кезеңі сараланып, болашағы баяндалды.
Елімізге алғаш рет ресми сапармен келген Ұлыбританияның Еуропа мен Америка істері жөніндегі министрі Алан Данканмен кездесуге осы мемлекеттің Қазақстандағы Төтенше және өкілетті елшісі Кэролин Браун да қатысып, әңгіме қазіргі халықаралық қарым-қатынастардың жай-күйі мен Ұлыбританияның қазіргі жүйедегі рөлі және алар орны турасында өрбіді.
Сондай-ақ, ашық пікірталас үлгісінде өткен кездесуде А.Данкан халықаралық қауіпсіздік мәселесіне көңіл бөлу мен сауда-экономикалық қатынастарды дамыту жайына тоқталды. Қазақстанның тұрақты экономикалық сот реформаларын қолдау арқылы екі ел арасындағы байланысты нығайтуға септігін тигізетін тетіктер жөнінде де өз ойларын ортаға салды. Сонымен қатар, ол екі ел серіктестігіне ешқашан сызат түспейтіндігін шегелей түсті.
Нұрлыбек ДОСЫБАЙ,
«Егемен Қазақстан»
