Осының бәрі еліміздің дербестігін сақтау үшін жасалып жатқан тың қадамдар. Бұл мемлекеттің тарихи жаңғыруы және рухани-мәдени дамуы болып саналады. Олай болса Елбасымыздың бастамасын қолдап, барлығымыз бұған өз үлесімізді мейлінше қосуымыз керек. Латын әліпбиіне кезең-кезеңмен өтуге басымдық берілуі керек деп ойлаймын. Бұл халқымыздың жаңа әліпбиді жеткілікті меңгеруіне жол ашады. Әлемде қазір ағылшын тілі халықаралық тіл болып саналады. Латын тілі осы тілдің негізі. Біздің тарихымызда латын да, төте де, кириллица да болды. Олай болса қай графика болмасын меңгеріп кетуге ешбір кедергі жоқ деп ойлаймын. Бұл күндері еліміздің ішкі және сыртқы саясаты қалыпты деңгейде, жастарға қолдау көрсетіліп жатыр. Қазақстанның әлеуетті елге айналуының негізгі себебі Елбасының кемеңгерлігі мен көшбасшылық қасиетінде жатыр. Шынымен де КСРО құлаған кезде 3 млн 600 мың адам Қазақстаннан үдере көшті. Бұлар енді не істей алады дейсің деп сенімсіздік танытқандар болды. Бірақ Елбасы бастаған көш үнемі алға ұмтылды. 1995 жылы тамыздың 10-ы күні Елбасы ұсынысымен ЮНЕСКО көлемінде Ұлы Абайдың туған күнін тойладық. Ширек ғасырда жеткен белестер көп. Қандастарымыз елге оралып, мемлекеттік тілде білім беретін мектептер саны көбейді. Мемлекет басшысының бүгінде студенттердің 60 пайызы, мектеп оқушыларының басым бөлігі қазақ тілінде оқып жатыр дегені көңілге қуаныш ұялатты.
Ядролық қарудың сынағынан Семей жерінің экологиясы жұтап, халқы денсаулық жағынан зардап шекті. Бүгінде әлемде соғыс туралы өте көп айтылады және күн сайын терроризмнің қаупі де төніп тұрғаны жасырын емес. Елбасының бастамасымен бейбітшілік пен қауіпсіздік үшін бүкіл әлем болып күресудеміз. Экономикалық, сауда, мәдени қатынастар орнаған кезде, соғысу, бөлшектену деген мәселелер орын алмайтыны рас. Жаһандағы антиядролық қозғалыстар Президенттің көшбасшылығымен және Семей тарихымен тікелей байланысты. Мемлекет басшысының көптеген маңызды бастамалары сәтті жүзеге асып келеді. «Адамзаттың бәрін сүй, бауырым деп» ұлы Абай айтқан даналық биік деңгейден Нұрсұлтан Әбішұлы Назарбаев көріне білген жан. Елбасының әр Жолдауын, әр тапсырмасын жоғары бағалаймын. Өзінің бағдарламалық мақаласында Елбасы «Сонымен бірге, жаңғыру ұғымының өзі мейлінше көнерген, жаһандық əлеммен қабыспайтын кейбір дағдылар мен əдеттерден арылу дегенді білдіреді. Мысалы, жершілдікті алайық. Əрине туған жердің тарихын білген жəне оны мақтан еткен дұрыс. Бірақ одан да маңыздырақ мəселені – өзіңнің біртұтас ұлы ұлттың перзенті екеніңді ұмытуға əсте болмайды», деп жазыпты. Ел қорғаған батырларымыз да, хандарымыз бен Бауыржан Момышұлы, Қасым Қайсенов, Талғат Бигелдиновтей тұлғаларымыз да бір Отан, бір ел, туған жер деп тізе қосып, бірге соғысты. Бейбіт өмір үшін жанталасты. Олардың ынтымағы, бірлігі қазіргі жастарымызға айрықша үлгі болуы керек.
Нәдірбек Әпсалямов,
Қазақстан инновациялық университетінің президенті,
экономика ғылымдарының докторы, профессор
Семей
