Суретті түсірген: Талғат ТӘНІБАЕВ
Халықаралық дельфий комитетінің директоры Владимир Понявин ежелгі грек жерінен бастау алған қозғалыс Қазақстанда да кең қанат жайғанын, халықаралық мәртебе алғалы ауқымы кеңейіп, сапалық мазмұны артқанын тілге тиек етті. Ұлттық дельфий корпоративтік қорының жетекшісі, жоба үйлестірушісі Құралай Түсіпекова сайысқа облыстар мен Алматы және Астана қалаларынан 600-ге жуық қатысушының тартылғанын, фортепьяно, ұлттық аспаптар, театр, халық, академиялық, эстрадалық әндер орындау, фотосурет, тележурналистика, киім дизайны, декоративті-қолданбалы өнер секілді 18 аталым бойынша бәсекеге түсетінін алға тартты. Доданың ерекшелігі сол, есту қабілеті нашар балалар үшін «Хореография» және «Ишарамен ән айту» аталымдары енгізіліп, қатысуға 100-ге тарта үміткер өтініш білдірген. Бұдан тысқары «Қоларбамен билеу» аталымының тұсауы кесілмек.
Театр алдындағы алаңда Дельфий ойындарының туы көтеріліп, алауы жағылып, әнұраны шырқалды. Көрермендер «Жеңістерге бірге!» атты паралимпиадалық бастамалар шеңберінде өткізілген «Қоларбада билеу» аталымының жеңімпаздары Ерлан Нұрмағанбетов пен Сандуғаш Ақанованың жұптық биіне, белгілі әншілер Әли Оқаповтың, Әлішер Кәрімовтің әуелете шырқаған әндеріне дуылдата қол соқты.
Әр аймақтан сайдың тасындай іріктеліп келген өрендер 10-15 және 16-21 жас аралығы бойынша екі топқа бөлініп, 12 мәдени орында жарыс көрігін қыздырды. Мәдениет пен өнердің брендіне айналған жастар байқауы көне классикадан бастап қазіргі өнерге дейін біріктіріп, шынайы шеберлік пен шалқар шабыт қатар өріліп жатты.
Жас таланттар мен дарындардың бірнеше күнге созылған шығармашылық байқауында жалпыкомандалық есепте Солтүстік Қазақстан облысы қоржынға 9 алтын, 11 күміс, 6 қола салып, бірінші орынға ие болды. Екінші, үшінші орындарды Астана қаласы мен Ақмола облысы бөлісті.
Жекелеген аталымдар бойынша Ділназ Ташмұхамед («Халық әндері», Қызылорда облысы), Бекзат Пірілепесов («Домбыра», Оңтүстік Қазақстан облысы), Рыстыгүл Көшерова («Бейнелеу өнері», Солтүстік Қазақстан облысы), Мерей Ынтымов («Киім дизайны», Астана) топ жарды. Сол сияқты «Тележурналистикадан» Нұрсұлтан Аббаз пен Қалдыбай Елеуов (Оңтүстік Қазақстан облысы), «Қобыздан» Гүлім Атошева (Батыс Қазақстан облысы), «Ишарамен ән айтудан» Элмира Балтықова (Алматы облысы), «Хореографиядан» «Sensitive» би тобы (Петропавл қаласы) жеңімпаз деп танылды.
Жеңімпаздар мен жүлдегерлерге арнайы сертификаттар, сый-сияпаттар тапсырылып, марапат соңы гала-концертке жалғасты.
Өнер, мәдени шығармашылық байқауының ең үздіктері халықаралық Дельфий ойындарына жолдама алды.
Өмір ЕСҚАЛИ,
«Егемен Қазақстан»
Солтүстік Қазақстан облысы
