Халықаралық «Батыс Еуропа–Батыс Қытай» автодәлізі Жамбыл облысы аумағымен өтеді. «Алматы-Ташкент» тасжолымен күн сайын мыңдаған жолаушы әрі-бері қатынайды. Сонымен қатар жергілікті маңызы бар жолдарды қыс мезгілінде күтіп-ұстау мәселелері де өзекті. Облыстық құрылыс, жолаушылар көлігі және автомобиль жолдары басқармасының мәліметінше, бұл мақсатқа соңғы бес жылда 583,2 миллион теңге бөлініпті. Оның ішінде ағымдағы жылдың күзгі-қысқы күтіп-ұстау жұмыстарына 233,5 миллион теңге қарастырылған. Жалпы, бүгінгі таңда жергілікті атқарушы органдар мен мердігерлер тарапынан жолдардың қауіпті бөліктері мен асулардағы көктайғаққа қарсы 17 220 тонна құм-тұз аралас инертті материалдар дайындалып, тиісті жұмыстар жүргізілуде. Ал облыста «Алматы-Ташкент» тасжолының бойында орналасқан Жуалы ауданының Оңтүстік Қазақстан облысымен шектесер тұсындағы Шақпақ ата асуы мен Қордай ауданындағы Қордай асуы қауіпті аймақтар саналады. Сондықтан бүгінде инертті материалдар дайындауда осы екі аймаққа баса көңіл бөлініп отыр. Сондай-ақ қыс мезгілінде облыстық автожолдардың ең күрделі 10 шақырымын құрайтын Жуалы ауданындағы «Б.Момышұлы-Қызтоған» бөлігіне қардан қорғаушы қалқандар өте қажет. Бұл мақсатқа бүгінде облыстық бюджеттен 183,0 миллион теңге бөлініп, мердігер мекеме анықталу үстінде.
Ал аудандардағы жолдардың дайындығы және оны тексеру нәтижелері қандай? Облыстық құрылыс, жолаушылар көлігі және автомобиль жолдары басқармасының басшысы Әділет Ахатаев бұл ретте Байзақ және Жамбыл аудандарының деңгейі жақсы бағаланып отырғанын жеткізді. Сонымен қатар Т.Рысқұлов, Қордай, Шу, Жуалы және Мойынқұм аудандары орта деңгейде болса, Меркі, Сарысу және Талас аудандары төмен деңгейде болып шықты.
Алайда бұдан бөлек тағы бір мәселе бар. Бүгінде облыста арнайы техниканың саны бас-аяғы 133 бірлік қана екен. Бұл қажетті көлемнің 29,5 пайызын құрайды, әлі де 451 дана техника қажет. Басқарма басшысының орынбасары Бақытжан Жәнібеков бүгінгі таңда қажетті техника алу үшін облыстық бюджеттен Қордай, Шу, Т.Рысқұлов және Жуалы аудандарына 400 миллион теңге бөлінгенін айтты. Сонымен қатар бөлінген қаражатқа жыл соңына дейін 19 техника сатып алынатын болады. Бірақ жыл соңына дейін бір айдан астам ғана уақыт қалды. Бұл орайда техника сатып алу мәселесі қараша айының екінші жартысы мен желтоқсан айында шешімін таба ма? «Ол бойынша әр аудан өз өтінімдерін Қаржы министрлігіне тапсырған. Бүгінгі таңда Қордай ауданы порталға шығып қойды. Желтоқсан айының ішінде бәрі анықталады», деді Әділет Ахатаев.
Жалпы, облыс аумағында 1237 шақырым республикалық маңызы бар автожолдардың бойында көліктердің үздіксіз және қауіпсіз қозғалысын қамтамасыз ету мақсатында тәулік бойы жұмыс істейтін диспетчерлік қызмет ұйымдастырылған. Республикалық «Қазавтожол» акционерлік қоғамы Жамбыл облыстық филиалының директоры Дәурен Тоқтаров Тараз қаласында және Жуалы, Жамбыл, Т.Рысқұлов, Меркі, Қордай, Шу және Мойынқұм аудандарында 10 жылыту пункті мен 5 өндірістік база қыс мезгіліне дайын екенін айтып отыр. Сонымен қатар қыс мезгілінде жол қозғалысы қауіпсіздігін қамтамасыз ету үшін республикалық маңызы бар автожолдардың бойына жалпы саны 816 уақытша жол белгілері орнатылыпты.
Жамбыл облысы соңғы жылдары көрші облыстармен жол мәселесіне байланысты келісімшарттарға қол қоюды үрдіске айналдырды. Қатты боран соғып, табиғат тосын мінез танытқан кезде қарды тазалап, жолды ашып болғанша көліктер тоқтатылатын. Биылғы жылы бұл мәселе қалай шешімін табады? Оның үстіне алдағы қыстың оңай болмайтын түрі бар. Қараша айында жауған алғашқы қардың өзі жерге тоң болып қатып қалды. Облыстық маңыздағы жолдардың талдан көлеңкеленген бөліктеріне әлден-ақ қар қатып жатыр. Мұндай жағдай қар еселеп жауатын алдағы айларда көлік қозғалысына кедергі келтіретіні анық. Сонымен қатар облыстағы Күйік асуында жыл сайын жолаушылардың жолда қалу мәселесі туындайды. Бұл жылда қайталанатын жайт болғандықтан оған баса назар аударылғаны жөн. Жол жиегін қардан қорғайтын қалқан ретінде тал отырғызу да күн тәртібінен түскен жоқ.
Хамит ЕСАМАН,
«Егемен Қазақстан»
Жамбыл облысы
