Қазақстан • 26 Желтоқсан, 2017

«Асық» ойыны ЮНЕСКО тізіміне енгізілді

1173 рет
көрсетілді
2 мин
оқу үшін

ЮНЕСКО-ның Мате­риалдық емес мұраны қорғау үкіметаралық комитетінің 12-ші сессия­сы шең­берінде Қазақ­станның дәстүрлі асық ойыны адамзаттың мате­риалдық емес мәдени мұра­сының тізіміне енгі­зілді.

«Асық» ойыны ЮНЕСКО тізіміне енгізілді

Сессия аясында материалдық емес құнды­лықтарға арналған көрме ұсынылды, сондай-ақ асық ойыны көрсетілді. Асық ойы­ны адам­ның ой өрісі мен дене бітімінің дамуына ық­пал етеді әрі ұлтына қарамастан, өске­лең ұрпақ арасында өзара жақын­дасуға жол ашады. Балалық шақ символы ретінде асық ойыны Қа­зақстан халқының бірлігін ны­ғайтуда, сон­дай-ақ бірлік пен ұлт­­тық сана-сезімін дамыту­да­ ­маңызды рөл атқарады. Ха­лық­аралық сарап­шылар атап өткендей, жас балалар бұл мұра­ны сақтап қалудың негізгі буыны болып табылады.

Номинацияны дайындау жұ­мысын Қазақстанның ЮНЕСКО және ИСЕСКО істері жөніндегі хатшылығы, Мате­риалдық емес мәдени мұраны қорғау жөніндегі ұлттық коми­теттің сарапшылары, еліміздің ЮНЕСКО жанындағы Тұрақты өкілдігі және Мәдениет және спорт министрлігі бірлесе атқарды.

Материалдық емес мәдени мұраны қорғау конвенциясын Қазақстан 2011 жылы жел­тоқсанда ратификациялағаннан бері мате­риалдық емес мәдени мұраның репрезентативті тізі­міне Қазақстаннан 7 номинация енгізілді: «Домбырамен күй орындау өнері» (2014 ж.), «Қазақ күресі» (2016 ж.), Қырғызстанмен бірлескен номинациялар ретінде «Киіз үй жасау машықтары» (2014 ж.) және «Айтыс/Aйтыш, суырып- салма өнері» (2015 ж.), сондай-ақ көпұлттық өтінімдер ретін­де «Наурыз» (12 ел), «Құс салу» (18 ел) және «Түрік пәтір наны» (5 ел). Соңғы үшеуі 2016 жылы енгізілді.

ЮНЕСКО-ның халықаралық тізіміне қазақ өтінімдерін енгізу еліміздің материалдық емес мәдени мұрасын халықаралық дәрежеде танытуға және оны қор­ғау үшін жүйелі іс-шаралар­ды жүзеге асыруға оң септігін ти­гізеді.

Алдағы жылдары Қазақстан ЮНЕСКО-ның материалдық емес мәдени мұраның репре­зен­тативті тізіміне «қа­зақ жылқы­шыларының дәс­түрлі көктемгі салты» және «Қо­рқыт-Ата мұ­расы» атты (Түркия, Әзербай­жан, Қыр­ғызстанмен бірлескен) көп­­ұлтты өтінімдерді енгізуді жос­парлап отыр.

«Егемен-ақпарат»