Жүктелген міндет жүйелі атқарылмақ

«Елбасы Н.Назарбаев Қа­зақ­стан халқына Жолдауында мемлекет үшін әлеуметтік саясат­тың басымдықтары оның ішінде негізгі бағыттарының бірі адами капиталды дамыту екендігін тағы да қадап айтты. Мемлекет басшысының тапсырмасына орай биыл республикалық бюджеттің әлеуметтік салаға бөлі­нетін шығыны 12 пайызға артып, 4 трлн теңгеден асатын болады. Елбасының биылғы Жол­дауын ескере отырып, Еңбек және халықты әлеуметтік қорғау министрлігі әлеуметтік қамсыз­дан­дыру және еңбек саласын дамыту бойынша алдыға нақты міндеттер қойып отыр», деді вице-министр.

Биылғы Жолдауда Мемлекет басшысы Нұрсұлтан Назарбаев Еңбек және xалықты әлеуметтік қорғау министрлігінің жұмысын сынға алғаны белгілі.
«Президент өз Жолдауында министрліктің жұмысын қатты сын­ға алды. Біз ол сынды толы­ғымен мо­йындаймыз. Ол сөздердің негізі бар», деді Еңбек және xалықты әлеу­меттік қорғау вице-министрі С. Жақыпова.

Министрліктің мәліметіне сәй­кес, республика бойынша 940 мың адам өзін-өзі жұмыспен қам­тып, пай­да тауып жүр. Олардың бар­лы­ғы бюджетке ешқандай төлемдер жасамайды. Зейнетақы қорына да ақша аудармайды. «Демек, ол адамдар болашақта зейнетақыға қалай шығатындарына мән бермейді. Әлеуметтік сақтандыру қорына да ақша төлемейді. Ондай адамдар ертең еңбекке жарамсыз болып қаламын, бала көтеремін деген мәселелерді ойлануы керек», деді С.Жақыпова.

Оның айтуынша, қазіргі кезде осы санаттағы азаматтарды анық­тау және тіркеу жұмыс­тары­мен мемлекеттік кірістер депар­та­менттері айналысып жатыр.

«Бұдан бөлек, 178 мың адам өздерін жеке кәсіпкер деп таныс­тырған. Алайда олардың барлығы тиісті мемлекеттік органдарда тір­келмеген болып шықты. Сонда олар кәсіпкерлікпен айналыс­са да, өзін-өзі жұмыспен қамтып жүр­гендер сияқты бюджетке ешқандай салық төлемейді, зейнетақы мен әлеуметтік қорға ақша аудармайды. Демек, Қазақстанда барлығы 1 млн-нан астам адам өз кәсібін заң­дастыруы қажет», деді ол. 

Елбасы Жолдауда «Бірыңғай электронды еңбек биржасын кең ауқымда енгізу қажет. Онда бос жұмыс орындары мен жұмыс із­деушілер туралы барлық ақпарат жинақталуға тиіс» екенін айтқан болатын. Вице-министр жүктелген міндетті жүйелі атқару үшін тиіс­ті жұмыстар атқарылатынын жет­кізді. 

«Елбасы электронды еңбек биржасы туралы заңды 2018 жыл­ғы 1 сәуірге дейін қабылдау қажет­тігін тапсырды. Біз қазірдің өзінде осы тапсырма төңірегінде жұмыс істеп жатырмыз», деді С.Жақыпова.

Рауан ҚАЙДАР,
«Егемен Қазақстан»