Қазақстан • 16 Қаңтар, 2018

Қазақ ұлттық университетінде Мемлекет басшысының Жолдауы талқыланды

471 рет
көрсетілді
5 мин
оқу үшін

Мемлекет басшысының цифрландыру және цифрлы технологияларды өмірдің барлық саласына енгізу туралы ұсынысы ғалымдар талқылауында басты тақырыпқа айналды. 

Қазақ ұлттық университетінде Мемлекет басшысының Жолдауы талқыланды

Қазақстан жоғары оқу орындарының көшбасшысы болып отырған әл-Фараби атындағы Қазақ ұлттық университеті қоғамдастығы мүшелері Елбасы Нұрсұлтан Назарбаевтың «Төртінші өнеркәсіптік революция жағдайындағы дамудың жаңа мүмкіндіктері» атты Жолдауын еліміздің одан әрі жаңғыруы бойынша жүйелі шараларды айқындап берген бірегей бағдарлама ретінде үлкен құлшыныспен және ықыласпен қабыл алды.  

Университет ұжымы Жолдау­ды талқылап, Мемлекет басшысы белгілеген негізгі басым­дықтарды назарға ала оты­рып, цифрлы экономика жағдайын­дағы адами капиталдың қалып­тасуына бағытталған шешуші қадамдарды бағдарлады.

Жиынды ашқан универ­ситет ректоры, академик Ғалым­қайыр Мұтанов Жол­дау ал­дағы қызметте және даму­­дың жаңа мүмкіндіктерін іздес­тіруде маңызды нұсқаулық бо­лып табылатындығын атап өтті. «Университеттер адами ка­пи­­талдың қалыптасуындағы м­а­ңыз­ды субъектілер ретінде оның жаңа сапасын қамтамасыз етуі керек және қазақстандық қоғам жаңғыруының қозғаушы күші­не айналуы тиіс», деді ол. Со­ндық­тан да осы маңызды мін­детті сезіне отырып, әл-Фараби атындағы ҚазҰУ «Al-Farabi University smart city» жобасы ая­сын­да 4.0 университет – жаңа ұрпақ универси­теті­нің үлгісін жүзеге асыруда.

Ғалымқайыр Мұтанов өз баяндамасында «Қазіргі заман талабының тренді – индустрия­ландыру, жаңа озық технологияларды енгізудің көшбас­шысына айналу талаптарына басым­дық берілуі құжаттың ерек­ше маңызын айқындайды. Индустрияландыру процесінің жаңа технологиялық қалыптың барлық мүмкіндіктерін пайдалана отырып, мейлінше инно­вациялық сипатқа негізделуі мақсат етілді» дей келе, университет ішіндегі жаңа технологиялық жетістіктерді мысал етті.

Аталған 4.0 университет үлгісі Президент Жолдауында қойыл­ған тапсырмаларға толықтай жауап береді. ҚазҰУ алғаш рет ТМД көлемінде «Цифрлы Қазақ­стан» бағдарламасы аясында цифрлы университет үлгісін жа­са­­­ды және жоғары оқу орындары қызметін автоматтандыруда бұлттық технологияларды, кампус инфрақұрылымын басқаруда Smart технологияларды әрі талдамалы жүйе қалыптастыру үшін Big Data технологияларын енгізді. Бағдарламалық жасақтаманың ірі өндірушісі – «Microsoft» компа­ниясының жоғары білім берудің IT тұғырнамасы дамуының инно­вациялық векторын қалып­тас­тыруда әріптес ретінде ҚазҰУ-ды таңдауы кездейсоқ емес.

ҚазҰУ Қазақстанда тұңғыш рет жаппай ашық онлайн курс­тарын бастады, бұл өз кезегін­де Ашық білім берудің ұлттық тұғыр­намасын іске қосуға мүм­кін­дік берді. Аталған тұғырнама қазақстандық ЖОО-лардың бәсекеге қабілеттілігін арттыруға ықпал етеді.

«E-кампус» жобасы базасында университеттің техноло­гия­лық тұғырнамасының қа­лып­тасуына «Hewlett-Packard», «Cisco», «Koniсa Minolta», «Fujitsu», «Samsung», «Alcatel», «Касперский зертханасы», Microsoft, Intel, Huawei сынды ғылыми-білім беру орталықтары тың қарқын берді. ҚХР Ғылым академиясының Қашық­тық­тан зондтау және цифрлы Жер институтымен (RADI) бірге Жерді зондтаудың цифрлы орталығы құрылған. Гонконг политехникалық универ­си­тетімен бірлесе Технолофт Индустрия 4.0 – ғылыми-білім беру зерт­ханасын құру бойынша жұмыс басталды.

Ағымдағы жылы ҚХР үкіме­тінің гранты – суперкомпьютер базасы аясында Жібек жолы университеттер альянсының халықаралық ІТ технопаркі іске қосылады. Жоғары өндірістік суперкомпьютер ІТ технопаркінің ядросы болады, бұл – ғылыми зертханалар жұмысы, дизайн зертханалары, 3D принтинг, инновациялық шеберханалар, коворкинг-орталық пен «IGeneration» бизнес-инкубатор шоғырланған бірыңғай клас­тер. Бұл өндірістік индустрия­ның университеттермен жоғары өндірістік ақпараттық-коммуни­кациялық технологияларды құ­рас­тыруды шешу мен қолдану саласында табысты бірігуін қам­тамасыз етеді және «Силикон жазығы» сынды жоғары технологиялар аймағын құруға мүмкіндік береді.

Президент атап өткендей, цифрлы дәуір жағдайында елдің жаңа индустриялануында бас­ты маңыздылық кадрлық қам­тамасыз ету болмақ. Осыған орай ҚазҰУ-да ағымдағы оқу жылы­ның екінші семестрінен бастап-ақ ақпараттық технология­лар факультеті құрыла бастайды. Жаңа факультет құрылы­мы аясында суперкомпьютерлік технология базасында мәлі­мет­терді өңдеу орталығы, Big DATA салааралық зертханасы және блокчейн зертханасы қарас­тырылған. Қазақстанның дәс­түрлі базалық өнеркәсіп индус­триясына ірі ІТ компанияларды және шетелдік ЖОО-лар серік­тес­терді білім беру үдерісіне тарта отырып, «мол мәліметтермен» алмасып ІТ мамандарды дайындау өндірістік үрдістерді автоматтандыру, роботтандыру, жасан­ды интеллект элементтерін қол­дану салалары бойынша жүзеге асырылады. Жолдауды жүзеге асырудағы университеттің жол картасы аясында 3D принтинг, онлайн-сауда, мобильді банкинг, денсаулық сақтау және білім берудегі цифрлы қызмет – келешегі зор өнеркәсіптерді дамытуға кадрларды дайындау­ға бағытталған жаңа білім беру бағдарламаларын енгізу қарас­ты­рылған. Бұл цифрлы дәуір жағдайында елдің жаңа индус­триялану қажеттілігіне білім беру жүйесін бейімдеуге қосқан ҚазҰУ-дың нақты үлесі болмақ.

Айгүл АХАНБАЙҚЫЗЫ,
«Егемен Қазақстан»

АЛМАТЫ