Аймақтар • 02 Ақпан, 2018

Ақмола облысында тұқымсепкіш кешен құрастырылмақ

475 рет
көрсетілді
3 мин
оқу үшін

Ақмола облысында тұңғыш рет  «Amity» тұқым себу кешендері құрастырылады. Аталған кешенді құрастыру лицензиялық келісіміне Мемлекет басшысы Нұрсұлтан Назарбаевтың АҚШ-қа жасаған ресми сапары аясында «Қазақстан Агро Инновациялық Корпорациясы» ЖШС мен америкалық «Amity Technology» компаниясы арасында қол қойылған болатын.

Ақмола облысында тұқымсепкіш кешен құрастырылмақ

Аграрлық өңір үшін бұл нағыз керекті құрал екені айтпаса да түсінікті. Сондық­тан да оны ақмолалық кәсіп­орын­ның өн­дірістік қуатымен құрас­ты­рып-жинау жолға қойылмақ. Жер­гілікті жердің климаттық жағдайына бейім­деліп жасалатын «Amity» кешенінің алғашқы партиясын құрастыру биыл наурыз айына жоспарланған. Бүгінгі таң­да аталған құрылғының 12 да­насын құрастыруға арналған құ­ны 1,5 миллион АҚШ доллары тұратын керек-жарақтарын сатып алу келісімшарты жа­салған. Кәсіпорынның бас дирек­торы Олег Балыбиннің пай­ымдауынша, осы тектес инно­вациялық жобаларды жүзе­ге асыру нәтижесінде на­рық­ты жоғары технологиялы құрал-жабдықтармен қамтуға ық­пал етіп, өңірдегі агроиндустрия әлеуетін арттыруға және ауылшаруашылық техникаларын жаңғыртуға жол ашылады. Жалпы, «Қазақстан Агро Инновациялық Корпорациясы» ЖШС заманауи көпсалалы ауыл­шаруашылық, арнайы жә­не коммуналды техникалар­ды шығарушы кәсіпорын сана­лады.

Бүгінгі таңда зауытта 78 адам жұмыс істеуде. Аталған кәсіпорын жылына «PVP-351», «SHABYN» жинау-прес­теу техникасының 200 данасын, «ПР-Ф-145» «SHABYN» тех­никасының 600 данасын, бұдан бас­қа аспалы жер жырту құ­ра­­лының 150 данасын және өзге де құрал-жабдықтарды шы­ғара бастағанын айта ке­ту керек. Арзан да сапалы тір­кемелі және аспалы ауыл­ша­руашылық техникаларын шы­ғаруға бел буған зауыт елі­міздің өзге де өңірлеріндегі кә­сіп­орындарымен байланыс орнатуға мүдделі. Өз өнім­­дерін еліміздің кез келген өңіріне жеткізіп беруге де әзір екен­діктерін білдіріп отыр. Оның үстіне қазіргі таң­да ау­ыл шаруашылығын дамы­ту ма­қсатында заманауи жа­ңа тех­­­никалар мен құрал-жаб­дық­­тармен қамтамасыз етуге және машина жасау са­ласын дамытуға арналған мем­­лекеттік бағдарлама жү­зеге асырылуда. Бұл ретте құрамына мемлекет пен квазимемлекеттік сектор және ауылшаруашылық техникалары мен құрал-жабдықтарын өнді­руші кәсіпорын өкілдері кір­ген жұмыс тобы жұмыс іс­теуде. 

Сонымен бірге еліміздің машина-трактор паркін жаңа­р­ту бағытында бірқатар қадам­дар жасалып жатыр. Ауыл­ша­руа­шылық машиналарын жасау жол картасы да әзірленген. Атал­­ған жол картасы қолда бар өндіріс қуатын арттырумен қатар, жаңа өнім түрлерін шы­ғаруға да мүмкіндік береді деп кү­тілуде. Және де шаруаларды шетелдік нұсқалардан бірде-бір кем емес отандық сапалы да арзан техникалармен қамтамасыз етуі тиіс. 

Осы жұмыстардың барлығы Ел­басының биылғы Жол­дау­ында айтылған «Ақылды техно­логиялар» – агроөнеркәсіп кешенін қарқынды дамыту мүм­кіндігі» атты үшінші мін­дет­пен ұштасып жатыр. Шикі­зат­ты қайта өңдеп, әлемдік на­рық­тар­ға жоғары сапалы дайын өніммен шығу – уақыт талабы. Оның үстіне биылдан бастап ауыл­шаруашылық техникала­рын сатып алуды субсидиялау­да басымдық ең алдымен отан­дық өнім өнімдірушілерге берілетін болады. 

Асқар ТҰРАПБАЙҰЛЫ,
«Егемен Қазақстан»

Ақмола облысы