The Guardian газеті жолдаудың маңызды тұстарын атап көрсетті. Басылымның хабарлауынша, Ақ үй басшысы сөзін көбіне қағазға қарап оқыған. Бұл өз кезегінде Д.Трамптың күтпеген сөзді айтып қалуының алдын алды деп есептейді. Күткендегідей, АҚШ президенті экономиканың күшейгенін және салықтың қысқарғанын мәлімдеп, инфрақұрылым мен иммиграциядан қаржы аямау керектігін жеткізді.
«Трамп Солтүстік Кореяға қарсылығын әсерлі ету үшін КХДР-да азапқа тартылып, қайтыс болған Отто Уормбирдің отбасы мен елден қашқан Цзи Сонг-Хоны ресми қонақтар тізіміне қосты. Сонымен қатар бұзақылар тарапынан айуандықпен өлтірілген екі қыздың оқиғасын иммиграциялық реформаға қатысты айтқан сөздерінде атап өтті», дейді The Guardian.
Бұдан бөлек, басылым Конгреске жиналғандар Д.Трамптың жолдауын түрлі деңгейде қолдағанын, демократтар ара-тұра қол шапалақтағанын айтады. Ал республикашылар президенттің ұлттық әнұранға қатысты пікіріне қызу қолдау көрсеткен.
CNN арнасы Ақ үй басшының жолдауында айтылған мәселелердің рас-өтірігін тексеріп шыққан екен. Мәселен Д.Трамп елде жасалған салық реформасын бұрын-соңды тарихта болмаған деп сипаттаған-тұғын. CNN-нің хабарлауынша, АҚШ президентінің бұл сөзі шындыққа жанаспайды. Өйткені Джон Кеннеди, Рональд Рейган, Барак Обама кезіндегі салық жүйесіндегі өзгерістер Д.Трамптың бастамасынан әлдеқайда жоғары болған.
АҚШ президенті Америкадағы қара нәсілдер арасындағы жұмыссыздық азайғанын, жаңа 2,4 миллион жұмыс орны ашылғанын келтірген. CNN-нің журналистері мұны растап отыр. Ал жалақының өсуі, автокөлік индустриясының қайта жаңғыруы жөнінде айтылған пікірі шындыққа жанаспайды деп есептейді. Өйткені еңбекақының өсу қарқынының бұрынғыдан айырмасы шамалы. Автокөлік нарығындағы оң өзгерістер Барак Обама кезінен басталған, дейді CNN.
Журналистер көші-қонның ішкі терроризмді ұлғайтуға әсері, АҚШ-қа келген әр иммигрант өзімен бірге отбасын да әкелетіні, қылмыстық топтардың мүшелері көбейгені жөніндегі пікірге сын айтты. Сонымен қатар Д.Трамп АҚШ-тың әлемдегі ең үлкен энергия экспорттаушы мемлекет екенін хабарлаған. CNN мұның да шындыққа жанаспайтынын жеткізді. Мәселен Американың 2026 жылға дейін экспорттайтын энергия көздерінен импорты басым.
Ақ үй басшысы «Қорғаныс мақсаты аясында біз ядролық арсеналымызды ешқашан қолданбаймыз деген үмітпен оны жаңғыртып, қайта құруымыз керек», деген болатын. «РИА Новости» Д.Трамптың АҚШ-тағы осы сөзіне ерекше назар аударыпты.
Агенттіктің пайымдауынша, АҚШ президентінің мұндай мәлімдеме жасауына негіз бар. Қазіргі таңда америкалық ядролық қару түрлері ресейлік нұсқалармен бәсекелесе алмайды деп есептейді «РИА Новости». Өйткені АҚШ қырғи-қабақ соғысы кезінен бері ядролық арсеналын жаңартпаған. Ал осы уақыт ішінде Ресей тарапы бірқатар құрлықаралық баллистикалық зымырандарын сынақтан өткізіп үлгерді. «РИА Новостидің» пайымдауынша, егер Д.Трамптың ұсынысы қолдау тапса, АҚШ алдағы уақытта құрлық, әуе және судағы ядролық қару арсеналын күшейтуге күш салады.
Жолдаудан кейін Д.Трамп твиттердегі парақшасына шараны 45,6 миллион халық көргенін, мұндай көрсеткіш тарихта болмағанын мәлімдеді. BBC журналистері АҚШ президентінің бұл пікіріне де сын айтты. Nielsen дерекқорына сүйенсек, 2010 жылғы Барак Обаманың жолдауын 48 миллион, 1993 жылғы Билл Клинтонның жолдауын 66,9 миллион, 2003 жылғы Джордж Буштың жолдауын 62,1 миллион адам тамашалаған. Осылайша жолдау барысында Д.Трамптың бірқатар қателік жібергенін әлемдік баспасөз құралдары анықтап берді.
Абай АСАНКЕЛДІҰЛЫ,
«Егемен Қазақстан»
