Біздің қолданыстағы заңнамаларымызда мүгедектердің құқын қорғау мәселесі қарастырылғанымен, осы нормаларды іске асыратын кешенді бағдарламалар жасалмаған. Мысалы, елімізде барлығы 8 мың мәдениет нысаны болса, соның 15 пайызы ғана мүгедектерге қолжетімді. Еңбек және халықты әлеуметтік қорғау министрлігі тарапынан осы мәселе жақында тексеріліп, бүгінге дейін 2,2 мың нысанға паспорт берілген, соның 1,2 мыңында ғана мүгедектерге қолжетімділік қарастырылған. Ал министрлік өз тарапынан мүгедектерге қолжетімділік жасау қажеттігін заңды жолмен талап ете алмайды. Ондай норма заңнамада қарастырылмаған.
Әрине әлеуметтік қорғау органдары мүгедектерге арналған түрлі шаралар, соның ішінде шығармашылық конкурстар, көрмелер, экскурсиялар ұйымдастырып жатады. Бірақ мұндай шаралар жүйелі емес, бір реттік сипатта ғана. Олар қаржының табылуына байланысты және қандай да бір мерекелік даталардың қарсаңында ғана жасалады. Оның үстіне мүгедек жандармен жұмыс істеуге бейім мамандар да тапшы. Сондықтан да мүгедек жандардың мәдениет пен өнер саласындағы мүмкіншіліктері ашыла бермейді.
Осыған орай біз Мәдениет және спорт министрі Арыстанбек Мұхамедиұлына депутаттық сауал жолдап, келесі шараларды жасауды өтіндік:
- мәдениет саласының мекемелеріне жаппай сарап жүргізіп, олардың мүгедек жандардың қолжетімділігіне қаншалықты бейім екендігін анықтау;
- мүгедектермен мәдениет және өнер саласында жұмыс істейтін мамандардың бейімділігін арттыратын шаралар жоспарын жасау;
- Мәдениет және өнер саласы бойынша мүгедектермен жұмыс істейтін қоғамдық ұйымдар үшін гранттар қарастыру;
Осы өтініш аяқсыз қалмас деген үміттеміз.
Жанат ОМАРБЕКОВА,
Мәжіліс депутаты
