Жаңадан енгізілетін өзгерістерге сәйкес, пәтерлер мен басқа да ғимараттардың иелеріне басқарудың тек екі түрі ұсынылады: МИБ және кондоминиум.
– МИБ – кондоминиум нысандарындағы адамдар немесе қызмет көрсету субъектілерімен бір кіреберістің атынан келісімшарт жасасатын жалғыз адам болуы мүмкін, – дейді қалалық тұрғын үй қатынастары бөлімінің маманы Еркебұлан Бесжігітов.
– Бұл құрылым да тұрғын үй кіреберісін жинау мен жөндеу бойынша қызмет көрсетеді. Пәтер иелері кооперативтері басқару түрі ретінде жаңа талаптармен үндесе алмай отыр. Әр ПИК-тің өз сантехнигі, еден жуушысы мен аула сыпырушысы бар, бұл дұрыс емес. Қызмет түрлерін олар өздері көрсетіп, өздері қадағалайды. Яғни атқарған жұмыстары шала-шарпы болған күннің өзінде оларға сын айтып, ықпал ету қиын. Ал МИБ-тер сервистік компаниялармен шартқа отырып, оның орындалу барысын қадағалап отыратын болады.
Кездесуге қатысушылардың дені ПИК-тердің, онда жұмыс істейтін адамдардың ендігі күйі не болады деп алаңдаулы. Олар игере алмаған жұмыстар көлемін жаңа құрылым жүзеге асыра ала ма? Жұмыссыздықпен күрес онсыз да мандымай жатқанда бұл жаңалық коммуналдық қызмет мамандарын нәпақасынан қақпай ма? Басқа мәселелерді айтпағанда, МИБ-тер құжаттамаларды дұрыс жүргізе ала ма?
Үйлер мен инженерлік тораптарға қызмет көрсетуді үйлестіруші Бақытжан Тәуешовтің айтуынша, көпшілік олар көрсетіп отырған қызметке разы.
– Біздің сервистік компанияда тариф мейлінше төмен, – дейді ол. – Халық көп қабатты үйдің шатырын жөндеу сияқты күрделі де қымбат жұмыстар үшін ақы төлеуге дайын емес. Сондықтан біз электрмен, сумен қамтамасыз ету, суағар желілерді қалыпта ұстау міндетін мойнымызға алдық. Қызметіміз бен жұмысымыздың барысы, олардың төлемақысы туралы тұрғындармен кездесулерде ақылдасып отырамыз.
Жасыратыны жоқ, ПИК өкілдері жаңа құрылымның енгізілуіне үзілді-кесілді қарсы. Мұның бәрі бос әурешілік, оның үстіне тұрғын үйлердің көпшілігі әбден ескірген деседі олар.
Кездесудің шешімді сөзін Қарағанды облыстық кәсіпкерлер құқын қорғау жөніндегі кеңесінің төрағасы Серік Төрегелдин айтты.
– Сервистік ұйымдардың қызметін салған беттен жоққа шығаруға болмайды, – деді ол. – Олардың да жұмыс істеуге құқы бар. Сервистік қызметтің дамуына тосқауыл бола алмаймыз. Сіздердің құрылымдарыңызды бірден жауып тастайын деп отырған да ешкім оқ. Өзіне оңтайлы қызметті халық өзі таңдап алады.
Қайрат ӘБІЛДА,
«Егемен Қазақстан»
