Фото: Орынбай БАЛМҰРАТ, «Егемен Қазақстан»
«Астана қаласының Өзбек этномәдени орталығы» мен аталмыш кітапхана бірлесіп өткізген іс-шара Қазақстандағы Өзбекстан жылы аясында жүзеге асырылған. Екі ел арасындағы мәдени қарым-қатынасты одан әрі нығайту, тіл мен мәдениетті сақтау және дамыту, әдебиетке деген қызығушылықты қалыптастыру мақсатында қолға алынған шараға Қазақстан Парламенті Мәжілісінің депутаттары, Халықаралық Түркі академиясы, Өзбекстан, Түркия, Әзербайжан және Қырғыз Республикаларының Қазақстандағы елшіліктерінің өкілдері, ҚХА мүшелері, қоғам қайраткерлері және этномәдени бірлестіктердің өкілдері қатысты.
Жиынның беташар сөзін сөйлеген Парламент Мәжілісінің депутаты Сауытбек Абдрахманов Әлішер Науаидің әлемдік тұлға екендігі хақында және бауырлас қазақ пен өзбек арасындағы Науаи мұрасы ортақтастыратын көптеген рухани құндылықтар жайлы кең көлемде әңгіме өрбітті.
«Науаидің ұлы еңбектерінің бірі – орыс әдебиетіндегі Пушкиннің ұлы еңбегімен ұқсас. Пушкиннің алдында орыс тілі өте күрделі құбылыстарды беруге дәрменсіз тіл, шын әдебиеттің тілі француз тілі деген ұғым орныға бастаған кез болатын. «Евгений Онегиннен» кейін барып орыстар өздерінің тілінің құдіретін таныған. Әлішер Науаи заманында да түркі тілі екінші қатарда болып келген. Науаи өзінің жазбаларында «менің өмірлік мұраттарымның біреуі түркі тілінің мәртебесін көтеру» деп айтады. Сөйтіп Әлішер Науаидің арқасында түркі тілі парсы тілімен тең тұрып ғажайып шығармалар жазылған», деді С.Абдрахманов.
Осымен екінші мәрте өткізіліп отырған бұл кеш екі ел арасындағы мәдениетаралық, гуманитарлық және кітапханалық байланыстарды нығайту мақсатында да үлкен маңызға ие болып табылады. Өз сөзінде Астана қаласының Өзбек этномәдени орталығының төрағасы Шерзод Болатов «Елбасымыз айтқан нағыз «Рухани жаңғыру» ұлттық әдебиетке ұлы өзгерістер әкелген белгілі тұлғаларды насихаттаудан бастау алады. Біз Әлішер Науаиды сондайлық тұлға дер едік. Дәстүрлі түрде әр жылдың 9 ақпаны, яғни Әлішер Науаидің туған күнінде халықаралық деңгейде осы жиынды өткізіп тұрмақшымыз», деп атап өтті.
Ұлттық кітапхананың директоры Үмітхан Мұңалбаева болса «Алдағы уақытта Өзбекстан мемлекетінің Ұлттық кітапханасында Қазақстан әдебиеті мен мәдениеті орталығын ашуды ұсынамыз. Орталықтардың ашылуы біздің қарым-қатынасымызды нығайтудың маңызды қадамы болар еді. Ол екі мемлекет халқының әдеби шығармашылық ең бай мұрасымен танысу мүмкіндігі және олардың арасындағы ең маңызды факторлар мен халықтардың сеніміне ие болуға септігін тигізеді. Бұл жобалардың бастамасы ретінде былтыр «Кітапханалық туризм» жобасының аясында біздің қызметкерлеріміз Әлішер Науаи атындағы Ұлттық кітапханаға барып та қайтты», деді.
Мирас АСАН,
«Егемен Қазақстан»
