Көрменің ашылу салтанатына қатысқан Қазақстан Республикасы Премьер-Министрінің орынбасары Асқар Жұмағалиев еліміз инноваторларының стендіне және ұсынылған концепцияға жоғары бағасын берді. Стенд жұмысымен көрменің алғашқы сағаттарынан бастап әлемдік телекомпаниялардың басшылары, Азия және Еуропа мобильді операторларының өкілдері, бағдарламалық жасақтама және қондырғылар өндірушілер, конгреске қатысушылар таныса бастады. Жыл сайын көрмеге әлемнің 200 елінен 100 мыңға жуық адам жиналады. Аталған шара мобильді және цифрлы технологиялар саласында айтулы болып табылады, ол трендтер мен инновациялық шешімдерді ұсынатын әлемдік алаң міндетін атқарады. Компаниялар дәстүрлі түрде жаңа гаджеттерді, қосымшаларды, қондырғылар мен технологиялық шешімдерді ұсынып келеді.
Көрмеде Қазақстан стенді мен технологиялық жетістіктерін ірі мультисервис операторы «Қазақтелеком» АҚ ұсынды. Компания басшысының айтуынша, 4 күн бойы маңызды стратегиялық және іскерлік кездесулерін, мобильді және инновациялық технологиялар саласындағы халықаралық лидерлермен келіссөздер өткізуді ұйымдастыру жоспарланған.
Көрмеге қатысушылар Қазақстанда smart home, smart city тұжырымдамалары аясында енгізіліп жатқан ақпараттық коммуникациялар саласындағы инновациялық сервистермен және технологиялармен, атап айтқанда, жылу энергиясының датчиктері, энергия және суды тұтынуды ұйымдастыру схемалары мен жүйелері, қаладағы жарық және автотұрақтар датчиктері, бейнебақылау жүйелері сияқты көптеген жобалармен танысу мүмкіндігіне ие. Бұдан тыс, стенд қонақтарына Қазақстанның оператордың инфрақұрылымы, технологиялық желілері, елдің ерекше табиғат ландшафтылары мен көрнекі жерлері көрсетілген бірегей виртуалды картасы ұсынылды.
«Егемен-ақпарат»
