Отырысқа облыстардың, Астана және Алматы қалаларының сайлау комиссияларының төрағалары мен хатшылары, облыстардың, Астана және Алматы қалалары әкімдері аппараттарының жетекшілері, Парламент Мәжілісінің депутаттары, Әділет, Білім және ғылым министрліктерінің, Қазақстан Республикасының Президенті жанындағы Мемлекеттік басқару академиясының, Қазақстан халқы Ассамблеясының өкілдері және электоралды білім беру бойынша жаттықтырушылар қатысты.
Орталық сайлау комиссиясының төрағасы Берік Имашев отырыста сөйлеген алғысөзінде 2017 жылы ОСК-ның жұмысы сайлау жүйесінің заңнамалық негізін жақсарту, халықаралық ынтымақтастықты дамыту, сайлау процестерін цифрландыру және электоралды білім беру жүйесін ұйымдастыруға бағытталғанын атап өтті. Жыл қорытындысы бойынша баяндаманы төрағаның орынбасары Константин Петров жасады.
Б.Имашев Орталық сайлау комиссиясына келіп түскен және мүдделі органдармен келісу үшін енгізілген, Үкімет ұсынған «Қазақстан Республикасындағы сайлау туралы» Қазақстан Республикасының Конституциялық заңына өзгертулер мен толықтырулар енгізу туралы» заң жобасына назар аударды.
Отырыста Әділет вице-министрі Н.Пан, Парламент Мәжілісі депутаттық фракцияларының жетекшілері: «Нұр Отан» партиясынан И.Аронова, «Ақ жол» партиясынан А.Перуашев, ҚКХП хатшысы В.Косарев, Қазақстан халқы Ассамблеясынан С.Абдрахманов, Адам құқығы бойынша ұлттық орталықтың жетекшісі С.Оспанов, Еуропалық құқық және адам құқықтары бойынша сарапшылық институтының директоры М.Башимов сөз сөйледі. Сонымен қатар Қостанай облыстық сайлау комиссиясының төрайымы А.Маркова және Алматы облыстық сайлау комиссиясының төрағасы Т.Даутов өз ойларымен бөлісті.
ОСК төрағасы Берік Имашев еліміздің сайлау жүйесі 93 мыңнан астам сайлау комиссиясы мүшелерін қамтитынын және Орталық сайлау комиссиясы сайлау бойынша заңнаманы өзгертуге мүдделі тараптардың және қоғамның қатысуымен пікір алысатын ең тиімді талқылау алаңы екенін атап өтті. Сондай-ақ Б.Имашев Орталық сайлау комиссиясы жұмысының алдағы уақытқа қойған басымдықтары мен нақты бағыттарын ұйымдастыруда жаңа формалар мен әдіс-тәсілдерін қолдану жайлы, саяси партиялар және азаматтық қоғаммен ынтымақтастық мәселелері жөнінде айтып өтті.
Жақсыбай САМРАТ,
Суретті түсірген Ерлан ОМАР,
«Егемен Қазақстан»
