Осыған дейін орыс, бурят, ауған, осетин, чешен-ингуш, беларус, украин, түркімен, Қырым татарлары мен Жетісу казактарының көрмелері ұйымдастырылды. Бұл көрмелердің мақсаты – қаламыздағы ұлттық мәдени орталықтар арқылы әртүрлі ұлт өкілдерінің тұрмыс-тіршілігімен жете таныстыру. Сонымен қатар ұлттық бірлік құндылықтарының негіздері, қазақ халқының толеранттығы, Қазақстан халқы Ассамблеясының этносаралық қатынастар саласын реттеудің қоғамдық-саяси институты ретіндегі қалыптасуы мен дамуы көрмеге басты тақырып ретінде алынған. Әрі музей қорына әртүрлі ұлт өкілдерінің жәдігерлерін жинақтау да көзделіп отыр.
Бұл жолы көрменің кезекті шарасы «Ильдаш» татар гуманитарлық даму орталығына арналды.
Көрменің ашылуына жиналған жұртшылық елдің жарқын келешегіне қатысты жақсы лебіздерін білдірді. Алматы қалалық мәслихатының депутаты, «Ильдаш» татар гуманитарлық даму орталығының төрағасы Нури Ниязова, Алматы қаласы татар этномәдени бірлестігінің төрағасы Тұрсынтай Ғабитов ризашылықтарын білдіріп, елдің есендігі үшін алғыс айтты. Салтанатты жиын түрлі мәдени шараларға, ән-күйге ұласты.
Айнаш ЕСАЛИ,
«Егемен Қазақстан»
АЛМАТЫ
