Елбасының жыл сайынғы дәстүрлі Жолдауында атқарылуға тиіс басым бағыттардың бірі ретінде әлеуметтік мәселе айтылады. Өйткені әлеуметтің хал-ахуалы, мұң-мұқтажы түзелмей, қоғам алға баспайды. Маңғыстау түбіндегі қазыналы өлке Жаңаөзен қаласында жыл өткен сайын әлеуметтік жағдай жақсарып келеді. Ырыс пен игіліктің, байлық пен молшылықтың ортасына айналған мұнайшылар қаласының бүгіні мен ертеңі негізінен мұнай және газ өндіру, оны өңдеумен тікелей байланысты.
Жаңаөзен қаласындағы экономикалық-әлеуметтік проблемаларды шешу үшін Үкімет қабылдаған арнайы бағдарлама аясында біраз жұмыстар атқарылуда. Жергілікті билік органдары аталған бағдарламаны іске асыру мақсатында кешенді шаралар жүргізуді ұйымдастырып келеді. Осы ретте айта кету керек, «ҚазМұнайГаз» Барлау Өндіру» АҚ-та Жаңаөзен қаласының дамуына қомақты үлес қосып отыр. Ресми мәліметтерге назар аударсақ, мұнай компаниясы келісім-шарттық міндеттемелеріне сай Жаңаөзен қаласы мен Қарақия ауданының әлеуметтік инфрақұрылымын дамыту бағдарламасы негізінде 2008 жылдан бері жыл сайын 900 млн. теңге бөліп келеді. Маңғыстау облысы әкімдігімен қол қойған аймақтың әлеуметтік жобаларын қосымша қаржыландыру туралы меморандумға сәйкес, 2009 бен 2010 жылдары 970 млн. теңгеден астам қаржы бөлінген. Әрине, мұның бәрі әлеуметтің әл-ауқатын жақсартуда және халықтың тұрмыс деңгейін көтеруде зор көмек. Сондай көмектің бірі – мұнайшылар қаласында әлеуметтік маңызы бар жоба саналатын балалар лагері мен медициналық сауықтыру орталығы пайдалануға берілді.
Жаңаөзен қаласынан 64 шақырым жердегі «Кендірлі» демалыс орнында ашылған жаңа медициналық оңалту орталығы «Қазмұнайгаз» Барлау Өндіру» АҚ пен «Медикер» ЖШС-нің бірлескен жобасы. Аталмыш екі әлеуметтік нысан Маңғыстау облысы Жаңаөзен қаласының әлеуметтік-экономикалық даму мәселелерін кешенді түрде шешу шаралары аясында салынды. Медициналық сауықтыру орталығында енді мұнайшылар мен олардың балалары емделеді. Бұл орталықта Павлодар облысындағы Мойылды көлінен әкелінген емдік батпақ, Катонқарағайдан жеткізілген бұғы пантасы бар. Мұнда сумен, сүлікпен, парафинмен, өсімдіктермен (фитотерапия), оттегі терапиясымен, дәстүрлі физиотерапиямен емдеу үздіксіз жүргізіледі. Мұнайшыларға 36 күн еңбек демалысы берілсе, соның он күнін осында өткізіп, денсаулықтарын тексертуге зор мүмкіндік жасалып отыр. Маусым сайын орталықта 1600 адамның демалуына жан-жақты жағдай қарастырылған. Медициналық сауықтыру орталығы жанынан ашылған диагностикалық орталықта осында келген жандардың қандай аурумен ауыратындығын, қандай ем қолдану қажеттігін уақыт күттірмей анықтап береді. Айта кеткен жөн, жаңаөзендік мұнайшылар бұған дейін жыл сайын Жаңақорған, Сарыағаш шипажайларына барып емделетін. Алла жазса, енді “Кендірлі” демалыс аймағында іске қосылған медициналық-сауықтыру орталығы бұл мәселені түпкілікті шешіп, мұнайшылардың алысқа бармай-ақ, жақын жерден ем қабылдауына жағдай жасамақ. Әлеуметтік бағдарламаға бюджет тарапынан 6 млрд. теңге бөлінген болса, соның 3,5 млрд. теңгесі осы сауықтыру орталығын ашуға жұмсалған. Кендірлі демалыс кешені аумағынан салынған 250 орынды балаларға арналған сауықтыру лагері де заман талабына сай жабдықталған.
Жоба бойынша мұнда балаларға арналған бассейн, спорт залы, асхана, шағын кинотеатр, жазғы сахна салынған. Сонымен бірге футбол, волейбол, теннис ойнауға арналған алаңдар бар. Лагерь аумағы өте кең болғандықтан балалардың еркін ойнап, жақсы демалуына барлық жағдай қарастырылған. Лагерь айналасына түгелдей бейнебақылау орнату жоспар бойынша енгізілген. Мұндағы мақсат – балалардың демалыстағы қауіпсіздігін сақтау, қадағалау. Лагерь аумағы абаттандырылып, шағын мүсіндермен безендірілген. Лагерде ай сайын 300 бала демалып тұрады.
Қысқасы, «Кендірлі» демалыс аймағының екінші тынысын ашқан аталмыш әлеуметтік нысандарда мұнайшылар да, олардың балалары да жайлы демалып, кешенді емделу секілді игілікті істердің жемісін көреді деген сенімі мол.
Мереке ТАҢАТАРОВ.