Сол сауалға Премьер-Министрдің атынан жуырда жауап келді. Онда: «Білім және ғылым министрлігі 2018-2020 жылдары қаржыландыру үшін ғылымның жеті басым бағыты бойынша конкурстар өткізген еді, оған 4677 өтініш түсіп, соның 1096-ы іріктеліп алынды. Жобаларға мемлекеттік бюджеттен бөлінетін қаражат көлемі 28,6 млрд теңге болды» делінген.
Осыдан әрі жауапта конкурстың қалай өткізілгені, қандай құқықтық құжаттарға сүйенгені егжей-тегжейлі жазылып, толық ақпарат берілген. Жоғарыда айтқанымыздай, депутаттың сауалында іріктеу кеңесінің мүшелері өздерінің сапасыз жобаларын өткізгені, шетелдік білікті мамандардың жоғары бағасын алған жобалардың айдалада қалғаны айтылып, осының себебі сұралған. Бұған іріктеу комис-
сиясына мүше болған мамандардың да өз жобаларын ұсынуға құқықтары барлығы айтылып, бірақ олар өз жобалары бойынша шешімдер қабылдауға қатыса алмайтындығы жеткізілген. Алайда кеңеске мүше болған 27 маманның 9-ның ғана жобаларына грант беру туралы шешім қабылданғаны айтылады. Сонымен қатар жауапта ауылшаруашылық ғылымдарының жобалары бойынша грант алғандардың 66 пайызы жоғары балл, 33 пайызы ғана ортадан жоғары, тек біреуі ғана орташа балл алған жобалар екені көрсетілген.
Ал кеңестің құрамын жасақтау арнайы Ережеге негізделгенін, оның ішіне шетелдік ірі ғалымдар да тартылғаны және қызығушылық танытушы мемлекеттік және қоғамдық ұйымдар өкілдері де араластырылғаны айтылған.
Жалпы Кеңес 110 өтінішті қараған, соның ішінде 6 шағымның талабы қанағаттандырылған. Сайып келгенде конкурстың заңға сәйкес өткендігі аталып өткен.
Дайындаған Жақсыбай САМРАТ,
«Егемен Қазақстан»
