Мемлекет басшысы жариялаған Үндеуде көтерілген бастамалардың барлығы да қазақстандықтар үшін өзекті мәселелерді қамтыды. Мысалы, «7 – 20 – 25» бағдарламасы көптеген жас шаңырақтың өте өзекті мәселесін шешуге арналған. Пәтерлердің жеңілдетілген несие арқылы берілуін жолға қою белгілі бір деңгейде жастарға жасалып отырған үлкен қамқорлық.
Екінші мәселе білім гранттарына байланысты. 2018-2019 оқу жылынан бастап қосымша 20 мың білім гранты бөлінетін болды. Бұл да жастардың жоғары білім алуына, білікті маман болып шығуына үлкен ықпал ететіні анық.
Елбасы Үндеуінде айтылған мәселенің бірі – шағын және орта бизнес өкілдеріне қолдау көрсету. Осы бағытта биылдан бастап миллиардтаған көлемде қомақты қаражат бөлінбек. Шағын және орта бизнесті дамыту біздің мемлекетіміз үшін аса маңызды мәселелердің бірі. Өйткені ол жалпы халықты жұмыспен қамтудағы бірден-бір төте жол, шағын және орта бизнестен түсетін салық та мемлекет қазынасын байыта түседі.
Қазақта «Жел басынан сипаса, жердегі гүл жетілер, Ел басынан сипаса, иендегі ер жетілер» деген. Яғни қазақстандықтар өзіне қамқорлық жасайтын мемлекеті бар екендігін сезінді. Бұл осы бағытта жасалған үлкен бір жоба деп айтуымызға болады.
Ғабит ТҰЯҚБАЕВ,
Қорқыт ата атындағы ҚМУ қазақ тілі мен әдебиеті және журналистика кафедрасының меңгерушісі
Қызылорда облысы
