Сенбі күні Парламент Сенатының айрықша мәселеге арналған кезектен тыс отырысы болды. Оны палата Төрағасы Қайрат Мәми ашып, жүргізіп отырды. Отырысқа Сенат депутаттарымен қатар, Премьер-Министр Кәрім Мәсімов, Мемлекеттік хатшы Қанат Саудабаев, Президент Әкімшілігі Басшысының орынбасары Бағлан Майлыбаев, Ұлттық қауіпсіздік комитетінің төрағасы Нұртай Әбіқаев, Жоғарғы Сот Төрағасы Бектас Бекназаров, Бас Прокурор Асхат Дауылбаев, Орталық сайлау комиссиясының төрағасы Қуандық Тұрғанқұлов, Президентке тікелей бағынатын басқа да мемлекеттік органдар басшылары мен Үкімет мүшелері, республикалық БАҚ басшылары қатысты.
Жиналған жұрттың бәрінің де көңіл күйлері көтеріңкі, қуанышты сезімде екені жүздерінен көрініп тұрды. Бір-бірімен жарқын жүзбен амандасып, қуанышты сезімдерін жасыра алмаған осынау жандардың бәрі де Қазақстан Тәуелсіздігінің нығаюына өз деңгейінде үлес қосқан және қосып келе жатқандар еді.
Отырысты ашқан Сенат Төрағасы Қайрат Мәми күн тәртібін жария етті. Төрағаның дауысынан да мерекелік көңіл күй сезіліп тұрды. Күн тәртібінің жобасындағы бірінші мәселе – Қазақстан Республикасы Мемлекеттік тәуелсіздігінің 20 жылдығы декларациясын қабылдау, ал екінші мәселе «Қазақстан Республикасындағы мерекелер туралы» Заңға толықтыру енгізу туралы, деп мәлім етті Төраға. Күн тәртібі дауыс беру нәтижесімен бекітілгеннен кейін Қайрат Мәми қысқаша кіріспе сөз сөйледі.
Бүгінгі күн – ерекше күн деді ол, өйткені, осыдан дәл 20 жыл бұрын, 1991 жылғы 10 желтоқсанда өткен бүкілхалықтық президенттік сайлауда халықтың толықтай қолдауына ие болған Тұңғыш Президентіміз Нұрсұлтан Назарбаевтың алғашқы ұлықтау рәсімі өткен еді. Осындай тарихи күнде Парламент Сенаты Тәуелсіз Қазақстан шежіресіндегі екінші Декларацияны қабылдау үшін жиналып отыр. Біз 20 жылдың ішінде елімізде болған тарихи оқиғалардың куәгерлері ғана емес, оларға тікелей қатысушылары болғанымызды мақтаныш етуге тиіспіз.
Егер 1990 жылғы Егемендік туралы декларацияда біздің келешекте қуатты, өркендеген мемлекет құру ниетіміз ғана болса, бүгінгі құжатта Тәуелсіздік жылдарындағы біздің еліміздің іс жүзіндегі жетістіктері паш етіледі. 20 жылдағы жетістіктерімізді айшықтайтын құжат – «Мемлекеттік тәуелсіздігіміздің 20 жылдығы декларациясын» қабылдау идеясы да осындай ойлардан туған еді. Декларацияны әзірлеу үшін менің өкіміммен Парламент депутаттарынан және аппараттың жауапты қызметкерлерінен арнайы жұмыс тобы құрылды. Осы топтың тиянақты жұмысының нәтижесінде Декларация жобасы әзірленді. Отаншылдық рухымен, туған елге деген мақтаныш сезімімен өрілген Декларация ең әуелі халқымыздың патриоттық сезімін ояту мақсатын көздейді. Замандастарымыз бен болашақ ұрпаққа арналған осынау салтанатты саяси-құқықтық құжатта Қазақстанның 20 жыл ішіндегі басты жетістіктері айшықталған. Осы бірегей құжатта Қазақстан Республикасының Тұңғыш Президенті – Елбасы Нұрсұлтан Назарбаевтың Қазақ елі мемлекеттігін құру жолындағы баға жетпес рөлі атап көрсетілген. Декларацияда қазіргі кезде «қазақстандық даму жолы» ретінде бүкіл әлем мойындаған Мемлекет басшысының сындарлы саясатына тарихи баға берілген.
Одан әрі сөз Декларация жобасы туралы баяндау үшін Әлеуметтік-мәдени даму комитетінің төрағасы Ақан Бижановқа берілді. Сөзін жиналған жұртты алдағы келе жатқан ұлық мереке – Тәуелсіздік күнімен құттықтаудан бастаған Ақан Құсайынұлы одан әрі: Өздеріңізге мәлім, адамзат тарихы қай заманнан бері күтілмеген оқиғалар мен тосын өзгерістерге толы болып келеді. Өркениеттің ұзақ-сонар көшінде талай мемлекеттер әлем сахнасына шығып, кейбіреулері уақыт сынына шыдай алмай, тарих қойнауына сіңіп, жоғалып та кетті, деді. Соның бірі – Кеңес Одағы да тарады. 1991 жылдың желтоқсан айында Қазақстан Республикасының Мемлекеттік тәуелсіздігі жарияланған тұстан бастап, ғасырлар бойғы үзілістен кейін дүниеде алғаш рет қазақ ұлтының атымен аталатын жаңа, егемен мемлекет пайда болды. Әлемде қазақтардан халқының саны әлдеқайда басым, бірақ жеке мемлекеттігі жоқ ұлттардың да бар екенін білеміз. Ендеше, егемен елдігіміз зор бақыт қана емес, сонымен қатар, бүгінгі және келер ұрпақтар алдындағы ғаламат жауапкершілік – мұны әрқайсымыз жан-жүрегімізбен сезінеміз және бұл мәңгі жасайтын ұғым болып қала береді.
Одан әрі шешен Кеңес Одағы тараған тұстағы қиындықтарға, жаңа мемлекет құру жолындағы жауапкершіліктерге шолу жасай келіп, осы жолдағы Президенттің ерен еңбегіне тоқталып өтті. Ол өзінің талантты басшылығы мен байыпты саясаты арқылы осынау, тарих үшін тым қысқа мерзім ішінде бұрынғы экономикасы негізінен шикізат өндіруге бағытталған, есімі әлемдік қоғамдастыққа белгісіз болып келген республиканы жоғары қарқынмен дамыта отырып, бейбітшіл саясатымен дүние жүзіне танымал мемлекетке айналдырып үлгерді. Сөйтіп, Елбасы Қазақстан халқының өзіне артқан зор сенімін үлкен абыроймен атқарып шықты және өзінің миссиясын одан әрі де табысты жалғастыруда. Қазақстан халқы өзінің бірлігі мықты ұлт екенін танытып, ұлы істерді жүзеге асыруға қабілетті екенін дәлелдеді.
Осыдан әрі А.Бижанов Қазақстанның Тәуелсіздік жылдарындағы жетістіктеріне тоқталып өтті. Соның ішінде 2008-2010 жылдар аралығындағы әлемдік дағдарысқа қарсы бағдарламаның тиімді болғанына, экономика мен әлеуметтік саланы жүйелі түрде жаңаландыру жолындағы үдемелі индустриялық-инновациялық бағдарламаның іске асып жатқанына назар аударды. Сыртқы саясат саласындағы жетістіктер қатарында Қазақстанның ЕҚЫҰ-ға табысты төрағалық етіп, Астана Декларациясының қабылдануы аталды. Сонымен қатар, ИЫҰ мен Түркі Кеңесіндегі төрағалықтар, Астанада үш жылда бір болатын Әлемдік және дәстүрлі діндер көшбасшыларының съездері, еліміздің аймақтық ұйымдардағы белсенділіктері атап өтілді. Одан әрі Сенатта өмірге келген Тәуелсіздіктің 20 жылдығы декларациясының туу идеясы, оның маңызы мен мазмұны туралы айтылды.
Президент Н.Назарбаевтың еуразияшылдық идеясының іс жүзіне асуы, елдің ұлттық қауіпсіздігі мен қорғаныс саласының беріктігі атап көрсетілді. Декларацияда барлық қазақстандықтардың мақтанышына айналған Астанамыздың баянды болашағы аталғанына тоқталды. Сөзінің соңында Ақан Бижанов Декларацияда қазақ халқының мемлекет құраушы ұлт ретінде барша отандастарымызды біріктіруші және топтастырушы рөлі айтылғанын көлденең тартты. Декларация заманымыздың аса көрнекті қайраткері, еліміздің Тұңғыш Президенті Нұрсұлтан Назарбаевтың басшылығымен Қазақстанның Тәуелсіздігі жылдарындағы жетістіктерін айшықты көрсететін, сонымен бірге, халқымызды жаңа жасампаз істерге бастайтын мазмұнды тарихи құжат болатыны сөзсіз, деді ол.
Осыдан кейін сөз Декларация жобасын оқып беру үшін «Халық Қаһарманы», сенатор Мұхтар Алтынбаевқа берілді. Ол Декларация жобасын өзінің нағыз генералдарға тән зор дауысымен, бір демде, мемлекеттік тілде оқып берді.
Одан кейін Қ.Мәми Қазақстан Республикасы Мемлекеттік тәуелсіздігінің 20 жылдығы декларациясын қабылдау туралы Қаулының жобасын дауысқа қойып, сенаторлар оны бірауыздан қабылдады. Сөйтіп, жиналғандардың қызу қолдап, қол соғуымен мемлекет мерейін межелеген маңызды құжат өмірге келді. Оның маңыздылығы туралы қысқаша сөйлеген Сенат Төрағасы бұл Декларация мемлекеттік мерей декларациясы, деді. Жеңімпаз халықтың жетелі істерін көрсеткен Декларация. Бұл Декларацияда Қазақстанның тәуелсіздік жылдарындағы толайым табыстары айшықталған. Егер осы жетістіктерді бұрын әртүрлі мінберлерде Елбасынан бастап, барлық лауазымды адамдар, жай азаматтар айтып жүрсе, енді ол нағыз құқықтық құжатқа айналды. Бұл құжатта еліміздің Тұңғыш Президенті Н.Назарбаевтың бүгінде әлем мойындап отырған сарабдал саясатына және оның дүние жүзі таныған қазақстандық даму жолының ерекшелігіне тарихи баға берілді. Осылай дей келіп, Төраға Декларацияның қабылдануымен жиналғандардың бәрін құттықтады.
Күн тәртібіндегі екінші мәселе бойынша Әлеуметтік-мәдени даму комитетінің мүшесі Анатолий Башмаков сөз сөйледі. Ол «Қазақстан Республикасындағы мерекелер туралы» Заңға толықтырулар енгізу туралы» заң жобасы туралы айтты. Қазақстан халқының алдындағы Елбасының ерен еңбегі туралы жеткізе келіп, ол Н.Назарбаевтың осыдан 20 жыл бұрын бүкілхалықтық сайлауда алғаш рет Президент болып сайланған 1 желтоқсанды «Қазақстан Республикасының Тұңғыш Президентінің күні» мемлекеттік мерекесі болып жариялау туралы заң жобасымен таныстырды. Бұл ұсыныс сенаторлар тарапынан мақұлданды.
Лебіздер
Мұрат МҰХАМЕДОВ, Парламент Сенатының депутаты:
– Бұл күн – Қазақ мемлекетінің тарихында айрықша күн. Өйткені, Парламент Сенаты Қазақстан Республикасы Тәуелсіздігінің 20 жылдығы декларациясын қабылдады. Онда еліміздің 20 жылда жүріп өткен жолы, барлық салалардағы жеткен жетістіктері, толайым табыстары айтылған. Ал осы жемістердің жетілуінде қоғамымыздағы басты байлық – ол саяси тұрақтылық, татулық пен келісім, халықтың бірлігі. Елімізді толық нарықтық қатынастарға көшірудің қандай табысты болғандығы, әртараптандыру, оның ішінде үдемелі индустриялық-инновациялық жобаларды жүзеге асыру, шағын және орта бизнеске қолдау көрсету, онымен қоса, еліміздегі азаматтық қоғамның қалыптасуы сынды қадау-қадау маңызды мәселелер қамтылған.
Қазақ елінің осы 20 жылдағы тағы бір мықты табысы – ол біздің іргемізді бекітіп, мемлекеттік шекарамызды дау-дамайсыз шешіп алуымыз дер едім. Қазақстан бұл күні әлемдік қоғамдастықтың мойындалған, табыстарына жетіжұрт көз тігіп отырған елге айналды. Әрине, осылардың барлығы біздің еліміздің бастауында тұрған Елбасының ерен еңбегі мен халықты жұмылдырып, соңынан ерте білуінің арқасында жүзеге асты. Сондықтан да Декларацияда ол кісінің осы еңбегі айрықша аталған.
Сенатта екінші қаралған мәселе ол – 1 желтоқсанды мемлекеттік мейрам етіп жариялау туралы. Бәріміздің есімізде, осыдан 20 жыл бұрын 1 желтоқсанда бүкіл ел болып, қалауымызды білдіріп, Нұрсұлтан Назарбаевқа үміт пен сенім жүгін арқалатқан болатынбыз. Ол сенімнің қалай орындалғаны да көз алдымызда. Сондықтан осы күнді келер ұрпақ та тарихи бағасын біліп отыру үшін жылда мереке етіп тойласа нұр үстіне нұр.
Иран ӘМІРОВ, Парламент Сенатының депутаты:
– Өткенге баға беріп, болашаққа бағдар болатын құжат қабылданды. Оның ішінде Ұлт көшбасшысы Нұрсұлтан Назарбаевтың еңбегі, болашаққа сілтеген жолы, халықтың қолдауы, жеткен жетістіктеріміз, алған асуларымыз, алдағы жобаларымыз, келешектен не күтеміз деген ойларымыз да қамтылды.
Біз тек бүгінгі жетістіктермізге тоқмейілсіп тұрып қалсақ, онда өркендемейтініміз анық. Өмір бойы адамзат баласы талпыныста, сол ізденістері арқылы алға жылжумен, өсумен, өнумен келеді. Соған әрбір адам өз балаларын, маңайындағы туыс-туғандарын, ұжымдастарын, таныстарын бағыттап отыруы тиіс.
Өткен ғасырдың 90 жылдарындағы қиын кездер көз алдымызда. Шалқар мен Жаңатастың әйелдері шойын жолдың үстінде жатты, жәрдемақы, зейнетақы дегендер берілмей, бұрынғы экономикалық байланыстар бырт-бырт үзіліп, мал біткен бартерге кетіп, шахтерлер айлап ереуілге шығып жатты. Осының барлығы қазір артта қалды. Шүкір, тәубе дейтін уақытымыз. Бірақ тағы да айтамын, өмір, уақыт деген бір орнында тұрмайды, заманауи көшке ілеспесең шаң қабасың. Осы 20 жыл ішінде еліміз Елбасы бастауымен 100 жылға татырлық еңбек жасады. Бүгінде Қазақстанды әлем таниды деп қуанып отырмыз. Ол – біздің тыныштығымыздың, халқымыздың ауызбіршілігінің, Елбасының елді өрге сүйрер ерен еңбегінің арқасы.
Біздің тарихымызда Қазақстанда локомотив шығарылып па еді? Кеше ғана Президенттің қатысуымен вагон шығаратын зауыттың жұмысы басталып жатыр. Машиналар шығарудамыз. Осының барлығы – ілгері басу. Ілгері басқан, алға ұмтылған қадамдарымыз құтты болсын!
Сәрсенбай ЕҢСЕГЕНОВ, Парламент Сенатының депутаты:
– Декларацияның қабылдануын шын мәнінде тарихи оқиға деп есептеймін. Біріншіден, осы арқылы Қазақстанның жеткен жетістіктерін әлемге паш етуді мақсат тұтсақ, екіншіден, біздің алдағы тұрған екінші межелеріміз, атқаруға тиіс жоспарларымыз, болашақ ұрпаққа қатысты жобаларымыз да Декларацияда нақты белгіленген деп ойлаймын. Бұл құжаттың қабылдануына қатысым болғандығы үшін өзімді бақытты сезінемін. Өйткені, тәуелсіздікті қаншама ұрпақ арман етті, қаншама боздақ осы жолда құрбан болды. Міне, солардың қол жеткізе алмай кеткен ең бір тәтті арманы шындыққа айналған кезде өмір сүру бақытына біз ие болып отырмыз. Оны азаттықты арман еткен елдің әр перзенті ұғынады.
Әрине, тарихи құжатта Елбасымыздың еңбегі атап айтылады. Ол айтылуға тиіс, себебі, біздің егемен еліміздің барлық жетістіктері осы кісінің көшбасшылығымен жүзеге асуда. Сондықтан бастамашы топтың ұсынысымен қабылданған 1 желтоқсанды Қазақстан Республикасының Тұңғыш Президенті күні ретінде, мемлекеттік мереке ретінде атап өту барша сенаторлардан қолдау тапты. Бұл тек біз ашып жатқан жаңалық емес. Мұндай мерекені атап өту өзге мемлекеттердің де тәжірибесінде бар. Сенат депутаттары осы ұсынысты қабылдай отырып, сонау егемендіктің алғашқы жылдарында, қиын кезеңдерде Қазақстан халқы ел тізгінін Президентімізге бере отырып, елді сол экономикалық тоқыраудан, тығырықтан алып шығады деп сенген еді. Сол үміт пен сенім толық ақталды. Сондықтан бұл лайықты түрде аталып өтетін күннің бірі деп білемін.