![Әйелдер кәсіпкерлігі жедел дамып келеді](/article_photo/1528337061_article_b.jpeg)
«Елбасы Н.Назарбаев қазақстандық отбасылардың әл-ауқатын арттыруға және олардың баспаналы болуына баса назар аударады. Осы орайда Президенттің «7 – 20 – 25» бағдарламасын бекітуі осы маңызды мәселеде көптеген қазақстандықтардың баспаналы болуына деген қамқорлығының көрінісі. Бағдарлама қатардағы қазақстандық отбасылардың тұрғын үйге қолжетімділігін арттырады. Сонымен қатар Мемлекет басшысының тапсырмасы бойынша 2017 жылдан бастап «Нұрлы жер» бағдарламасы жүзеге асырылуда.
Оның басты операторларының бірі – Қазақстанның тұрғын үй құрылыс жинақ банкі. «Нұрлы жер» бағдарламасы бойынша жыл сайын 10 млн шаршы метрден астам тұрғын үйді пайдалануға беруге мүмкіндік туып отыр. Осы орайда бұл бағдарламаларға әйелдердің қатысуы ұлттық комиссияның ерекше назарына алынады», деді отырысты ашқан Г.Әбдіқалықова. Мемлекеттік хатшы «Нұрлы жер» бағдарламасының ипотекаға қолжетімділік, жалға берілетін және коммерциялық тұрғын үйлер салу, үлестік құрылыс мәселелерін шешу мәселесіне бағытталып отырғанына кеңінен тоқталды.
Отырыс барысында «Даму» кәсіпкерлікті дамыту қорының өкілі Абай Сарқұлов журналистерге берген сұхбатында ел экономикасындағы орны ерекше әйелдер кәсіпкерлігі жедел даму үстінде екенін жеткізді. Бұл – Азия даму банкі, ЕҚДБ секілді халықаралық институттардың мақсатты түрде әйелдер кәсібін дамытуға қолдау көрсетуінің нәтижесі. 2010 жылдан бастап әйелдер кәсіпкерлігін шағын несиемен қамту бағдарламасы бойынша жеңілдетілген шарттармен 1654 адам жалпы сомасы 14,3 млрд теңге мөлшерінде несие алған.
Сонымен бірге «Даму» қоры да «Бизнестің жол картасы-2020», «Еңбек» бағдарламалары бойынша әйелдерді қолдайды. Осы орайда айта кетер жайт, жылдан-жылға кәсіпкер әйелдер саны артуда. «Олар көбіне кондитерлік салада, нан және тоқаш өндірісі саласында кәсіп ашады. Денсаулық сақтау саласында, сұлулық салондары мен тігін ательесін ашу бойынша да жобалар көп. Әйелдер өзі ашқан кәсіптерін өте сауатты және ұқыпты, жауапты жүргізеді», деді ол.
Бұдан соң Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған бағдарламасы аясында ауылдық жерлердегі кәсіпкер әйелдерді қаржылық және қаржылық емес тетіктер арқылы қолдауды қамтамасыз ету мәселесі талқыланды. Ауыл шаруашылығы вице-министрі Рүстем Құрманов бағдарлама арқылы ауылдық жерлердегі кәсіпкерлер қаржыландырылып жатқанын жеткізді. Оның айтуынша, өткен жылы бұл бағдарламаның бюджеті 27 млрд теңгені құрап, кәсіпкерлерге 6,7 мың несие берілсе, оның 2,3 мыңын кәсіпкер әйелдер алған. «Біз екі бағыт бойынша қаржыландырамыз, яғни ауыл шаруашылығына қатысты және ауыл шаруашылығына қатысы жоқ бизнес болып бөлінеді.
Атап айтқанда, бизнестің ауыл шаруашылығына қатысы жоқ бизнес түрлері бойынша несиелерді негізінен әйелдер алады. Әрине олардың ауылдағы инфрақұрылымды дамытып жатқандығы қуантады. Бұл ретте шаштараз, тігін салондары, наубайханалар ашылуда», деді ол. Сондай-ақ «Атамекен» ҰКП-мен бірге «Бастау Бизнес» жобасы жүзеге асуда. Ол ауылдық жерлердегі өз-өзін еңбекпен қамтушылардың және жұмыссыздардың экономикалық белсенділігін арттыруға бағытталған. Жоба бойынша 14 облыстан барлығы 15 мың адам оқытылса, оның 41,5 пайыздық үлесі әйелдер еншісінде екен.
Отырыс соңында Мемлекеттік хатшы Г.Әбдіқалықова мемлекеттік органдарға бірқатар нақты тапсырма берді.
Венера ТҮГЕЛБАЙ,
«Егемен Қазақстан»