«Ерінбеген етікші болады» дегеннің кері келіп, бүгінде өлеңнен енші алғысы келетіндердің қарасы тым көбейіп барады. Екі ауыз сөздің басын құрап, ұйқас қуатындар ақын атанып, жамау-жасқау жырларын жинақ етіп шығаруға ептіленіп алды. Ақиқатында, поэзия әлемінде аты таңсық Қуанбек Абдуллаевтың жыр-жинақтарын да осы санаттағы көп кітаптардың бірі ме деген бір күдік, бір үмітпен қолға алдық.
Отқа оранған ордаңда Отырарым,
Ойға батып мен ұзақ отырармын.
Тұяқтары таптаған Отырардың
Уыстаймын қолға алып топырағын.
Шымыр шумақ, шырайлы ой еріксіз шаужайға жармасып, Қуанбек шығармаларының шыңырауына тартып әкетті. Жүректен шыққан ғана жүрекке жетеді. Сезім қылын шертер мұндай жыр жолдары шын ақынжанды жүректен туса керек. Тек өлеңді өнердің төресі санап, көңілінің төріне қондыратындар ғана өзгенің санасын өрнекті оймен баурап, жыр әлемінің киелі сахнасына сескенбей шығады.
Сабақтасып ұлы өмір үзілмеген,
Қуат-жігер аламын өзіңнен мен.
Игі жақсы адамдар ішіндегі,
Көрінесің әкежан тізімдерден.
Міне, өлең дүниесін мезгілінен кеш ашқан Қуанбек Абдуллаев әке туралы осылай толғанады. Шынайы шындықты тап басқан бұл шумақтың да оқырманын бей-жай қалдырмайтыны анық. Осы жыр кітаптарының біріндегі алғы сөзде Қуанбек «Қай тірліктің болса да алғашқысы ыстық, жаныңа жақын тәтті болары сөзсіз. Өлең жазу бала кезден еркімді баурап алды. Алғашқы өлеңім 1958 жылы аудандық газетте жарық көрді. Кейін студент болған тұстарда республикалық басылымдарда бірді-екілі өлеңдерімнің шыққаны бар. Тек соңғы 10-15 жыл көлемінде өндіріп жаза бастадым», деп ағынан жарылады. Иә, егде тартқанда өлең әлеміне еркін бойлап, төрт құбыласы тең терең туындылар туғызу екінің бірінің қолынан келе бермейтін құбылыс екені даусыз. Бірақ, ол бойдағы дарынын кеңінен ашып, қаламынан шыққан әрбір шығармасында түйсікті ойларын түйіндей толғанады.
Әр қазақтың төрінен орын алып,
Жатыр сенің арманың орындалып.
Архив те емес, жүректе тербетілген,
Жырларына тәу етем, қолыма алып.
Міне, Қуанбек өзінің ақиық ақын Мұқағалиға деген жүрекжарды сезімі мен сүйіспеншілігін осылай сездіреді.
Қайың біткен көнбедің сен айырбасқа,
Адам болып тұрсаңдар жарамас па?
Мұқағали тербеліп тұрар еді-ау,
Таң атқанда, қайың боп, қарбаласта.
Қуанбек, жалпы, шығармаларында өзінің кең ауқымды ақын болғысы келетіндігін өзінің ой-өрісінің биіктігімен-ақ көрсетіп тұрғандай. Оның туған жерге, өскен ортаға деген ыстық ықыласы, тарихқа, тағылымға деген шынайы сезімдері көзі ашық әрбір оқырманның жүрегіне жол тауып зердесіне ой тастайтыны сөзсіз.
Оңтүстік өңіріне, Сыр өлкесіне кеңінен танымал Отырар аймағының төл перзенті Қуанбек Абдуллаев 1946 жылы Отырар ауданы, Талапты ауылында дүниеге келген. Негізгі мамандығы малдәрігерлік саласында ұзақ жыл жемісті еңбек етіп, шағалалы Шардара ауданында зор құрметке бөленген ел ағасы. Ол өлең әлемін өнімді өлеңдерімен кештеу аттаса да жырсүйер қауым арасынан өзінің оқырмандарын тауып, лайықты жырларымен көпшілік көңілінен шығып келеді.
Таулар биік таласады аспанмен,
Биіктікпен санасатын қасқаң – Мен.
Жырларыңды ақ жауын боп төгілген,
Қатар қоям мазмұны мол дастанмен.
Иә, бұл ақын Қуанбек Абдуллаевтың өлең дүниесінің биік сахнасына шыққандағы жазған шынайы сезімі. Ақынның бұл жыр жолдары өзіне деген сенімділіктің әлеуетін көрсетіп, ешкімге тәуелді болмай, жалтақтамай шынайы өмір сүрудің қажырлы еңбекпен, тынымсыз күрестің ғана жетістікке жеткізетінін паш етеді. Ақын өлеңдерінің зор рухы да осында.
Марат АҚҚҰЛ.