![Павлодардағы кардиологиялық орталық 5 жыл толуын атап өтті](/article_photo/1528775502_article_b.jpeg)
Бас дәрігер Әділ Дөржановтың айтуынша, кардиологиялық орталық жұмысы қазір цифрлы жүйеге көшкен. Яғни емдеу және алдын алу үдерістерінен бастап ішкі құжат айналымы да толық электронды форматта жұмыс істейді. Орталықта 25-тен аса медициналық жаңа технологиялар жүйесі енгізіліпті. Инновациялық жаңашылдықтар балалар мен жасөспірімдердің дімкәс жүректеріне ота жасауға мүмкіндік берді.
Ә.Дөржанов – өңірдегі кардиохирургиялық орталықтың, жалпы, осы саланың дамуының бастауында тұрған облыс кардиохирургтерінің бірі. Мәскеуде медициналық жоғары білім алған ол 2009 жылы Павлодарға оралды. Облыс орталығындағы №2 қалалық ауруханада дәрігерлік жолын бастады. Әділ Әділбекұлы осы жылдар аралығында 2 мыңнан астам жүрекке ота жасады. Осынша адам өмірін сақтап қалды.
Сонымен бірге орталықта өмірін денсаулық сақтау саласына арнаған әулеттер де қызмет етуде. Мысалы, кардиохирург Алмас Әнтекеев – медицина ғылымдарының кандидаты, орталықтағы «Жүректің ишемиялық аурулары» бөлімшесінің меңгерушісі. Жұбайы Шолпан Қайытқызы – №1 қалалық емханада кардиолог, емхананың функциялық диагностика дәрігері. Семей медицина институтында студент кездерінде отбасын құрған жастар жолдамамен Павлодарға келген. Ал бұл күндері кардиохирургия орталығындағы экстракорпоральді қан айналымы бөлімшесінің меңгерушісі Дәурен Алмасұлы – Әнтекеевтер отбасының тұңғышы. Жолдасы Самал – мұғалім. Әке-шешесі секілді Дәурен де кардиология саласы мамандығын таңдады. Қарындасы Әлия Алмасқызы қазір Астана медициналық университетінің 4-курсында оқиды.
Алмас Мұратұлы 1999 жылы қалалық №1 ауруханада қызмет етіп жүрген кезде осы жолдардың авторына да ота жасаған еді. Әлі есімде, іш құрылысыма екінші рет өте күрделі, ауыр ота жасалды. Ол кезде кейбір анализдерді Алматыға жіберетін. Қазіргідей мықты технология жоқ. Алмас жасаған сәтті отадан кейін отбасыма оралдым. Кейде көргенде:
– Айттым ғой мен сізге, 100 жасайсыз! – деп қалжыңдап жатады.
Ақ халатты абзал жан деген осы.
– Кеуде тұсыңыз шаншып ауырса, арқаңызға немесе қолыңызға берілетін болса, суық тер шықса, демікпе пайда болса, қан қысымыңыз біресе жоғарылап, біресе төмендей берсе бірден кардиолог дәрігердің көмегіне жүгініңіз, – дейді Алмас Мұратұлы. – Жылына бір рет кардиограммадан өтіп тұру қажет.
Бұл күндері Ә.Дөржанов басқаратын орталық кардиохирургтері мамандықтарына сай біліктіліктерін жетілдіру үшін Беларусь, Ресей, Израиль, Франция, Италия, Аустрия, Англия, Нидерланд елдерінде өтетін халықаралық конгрестер, конференциялар, симпозиумдарға қатысады. Орталықта кардиолог-дәрігерлер Айжан Ахметбекова, Елена Коченгина, Сәуле Айтпаева, Мәншүк Сатабаева, Наталья Педашенко, Күләш Мықымова, Крокус Владимир, Марат Жанбосынов, Дархан Дайров және басқа да дәрігерлер бірлесе қызмет етуде.
Барлық бөлімшелері зертханалар, диагностикалық зерттеулер соңғы үлгідегі медициналық құрал-жабдықтармен жарақталған. Жаңа технологияның көмегімен кішкентай сәбилердің жүрегіне ота жасалуда. Орталық ұжымының орташа жасы 28 жасты құрайды. Қазір жүрекке ота жасайтын хирургтердің көбі қазақ жастары.
Елбасы Нұрсұлтан Назарбаев облысқа жасаған жұмыс сапарларының бірінде орталыққа келіп, жас кардиохирург дәрігерлермен жүздескен болатын.
– Елімізде медицина саласына баса мән берілуде. Астанада кардиохирургиялық кластер қалыптасты. Әрбір өңірде орталықтар ашылуда. Ендігі кезек – дәрігерлердің біліктілігінде. Ресейлік әріптестермен байланысты нығайту керек. Бұл үшін жол ашық. Үйренуге ниетті адамның қолынан келмейтін дүние жоқ, – деген еді сонда Елбасы.
Мысалы, біраз жыл бұрын туабітті жүрек ақауы бар сәбилерге ота жасаймыз деп ойлаған жоқпыз. Жаңа заман жетістіктеріне біз де қол жеткіздік, – дейді О.Мұқашев.
Бұл әрине медицинаға келген жаңа озық технологиялардың, отандық дәрігер мамандарымыздың қол жеткізген жетістігі. Балалардың жүрек сырқатына да, тіпті туа біткен жүрек ақауы бар жас сәбиге де оталар осы орталықта жасалады. Облыс аудандарынан ЭКГ қабылдау бойынша интернет-кабинет жұмыс істейді.
– Инновация қазір жергілікті ауруханаларға жетті. Алдағы уақытта кардиохирургиялық орталықтың жоспарында жүздеген жүрекке ота жасау міндеті тұр. Бұл қарапайым халық жүрек ауруынан емделу үшін шетел асып, шипа іздемесін, өзімізде ота жасатып, өзімізде емделсін деген Елбасының тапсырмасы, – дейді Әділ Дөржанов.
Орталықтың құрылымында хирургия, оңалту, интервенциялық кардиология, аритмология және электрофизиология бөлімдері және ауысымына 50 адамға арналған консультативтік-емхана бөлімі бар. Орталықтың басты ерекшелігі – балалардың жүрегіне операция жасау мүмкіндігі болып табылады. Бұрын ондай операциялар Астана және Алматы қалаларында ғана жасалатын.
Фарида БЫҚАЙ,
«Егемен Қазақстан»
ПАВЛОДАР