![СҚО-да халықаралық «Workshop Time» семинары өтті](/article_photo/1528952212_article_b.jpeg)
«Workshop Time» инновациялық формадағы тәлімгерлік тақырыбына қызығушылық танытатын адамдарды біріктіретін танымдық ғылыми-педагогикалық қауымдастық болып есептеледі. Оның басты мақсаты – ұлағатты ұстаздардың іс-тәжірибелерін жастарға таныстыру, тарату, табысқа жету сырларын ортаға салу. Өңірімізде алғаш рет өткізілген шараға еліміздің әр қиырынан 200-ден астам мұғалім келіп, заманауи білім берудің бірегей модельдері мен тәлімгерлік түрлерін талқылау еркін әңгіме, ашық диалог түрінде өрбіді.
Алқалы басқосуды «Өрлеу» біліктілікті арттыру ұлттық орталығы» АҚ-тың төрағасы, Ұлттық ғылым академиясының корреспондент-мүшесі, педагогика ғылымдарының докторы Гүлназ Ахметова кіріспе сөзбен ашып, қызметке жаңадан орналасқан мұғалімді ортаға бейімдеу, шеберлігін шыңдау, жан-жақты қолдау көрсету мәселелері аясында атқарылған жұмыстармен қатар қордаланған проблемаларға да тоқталды. Педагогтер бес жылда бір рет кәсіби біліктілігін арттыру курстарынан өтеді. Меніңше, бұл жеткіліксіз. Оларға қойылатын міндеттердің ауқымдылығын, уақыттың күрделілігін ескере отырып, мерзім аралығын қысқартқан дұрыс. Оған техникалық та, материалдық та мүмкіндіктер толық жетеді. Бүгінде тәлімгерлік семинар-байқаулардың 51 пайыздайы мектептерде өткізіліп жүр. Мұның жас мұғалімдер үшін көмегі өте зор», деді ол. Сондай-ақ оқу орнын бітіріп келген мамандар арасында тұрақтамай отырғанын атап өтті. 2016-2017 оқу жылында еліміздің білім ошақтарында үш жылға дейін еңбек өтілі бар 34 мыңнан астам мұғалім еңбек етсе, бүгінде бестен бірі басқа қызметтерге ауысқан.
Басты себебі – толыққанды көмектердің көрсетілмейтіні, әлеуметтік жағдайлардың жасалмайтыны. Білікті ұстаздардың, мектеп басшылығының тәлімгерлік қозғалысты жандандырудың орнына кежегесі кейін тартатын жайттар да кезігеді. Шетелдерде тәлімгерлік дәстүрі кеңінен қанат жайған. Арнайы бағдарламалар жұмыс істейді. Ынталы, талапты жастардың өз мамандығына деген мақтаныш сезімін, жауапкершілігін арттырамыз десек, осы үрдісті кеңінен енгізген жөн. Мәселен, Еуропаның бірқатар мемлекетінде жас ұстаздарды өз ісіне баулып, жоғары кәсіби маман ретінде дайындап шыққан тәлімгерлердің жалақысы көбейтіліп, сағаттары қысқартылады. Осы орайда Сыр өңірінде қалыптасқан оң үрдістер құптарлық. Қызылорда облыстық «Өрлеу» педагог қызметкерлерінің біліктілігін арттыру институтының директоры Бауыржан Елеусіновтің айтуынша, 25 мыңға жуық мұғалімнің 60 пайыздайы жастар. Әрқайсысына тәжірибелі ұстаздар бекітіліп берілген.
Дұрыс нұсқау беріп, жол көрсетудің арқасында кадр тұрақтамаушылығы азайып, керісінше өз ісіне ынталы жастар қатарының артқаны байқалады. Ал Петропавл қаласындағы Ғ. Мүсірепов атындағы № 43 мектептің қазақ тілі және әдебиеті пәндерінің мұғалімі Айжан Ибраева «Рухани жаңғыру» бағдарламасы негізінде әзірлеген тәлімгерлікпен айналысу жобасымен таныстырды. 34 сағатты құрайтын бағдарламада мұғалімдер мен оқушылардың қарым-қатынасы, жас ұрпақ тәрбиесі, өңір тарихы, киелі жерлер кеңінен қамтылған. Алдағы уақытта тәлімгерлік ету үлгісін толықтырып, басқа мектептерге ұсынбақ.
«Педагогикалық әулет – кәсіби даму мектебі» пленарлық отырысында Қажытай Молдабаевтың өмір жолы үлгі-өнеге ретінде ұсынылды. Ардагер ұстаз саналы ғұмырының 44 жылын бала тәрбиесіне арнапты. Әулетімен түгел мұғалімдік мамандықты таңдапты. Бәрінің жұмыс өтілін қосқанда 400 жылға жуықтайды. Тәлімгерліктің өміршең әдістемесі ретінде «OrleuOnlineResourses» жобасы таныстырылымында ақпараттық озық технологиялар, кәсіби табысқа жету жолдары, ғылыми жаңашылдықтар, мектептен біліктілікті арттыру жүйесіне дейінгі өзара әрекеттестік мәселелері тақырып арқауына айналды.
Қорған әлеуметтік технологиялар және білім беру саласын дамыту институтының проректоры, педагогика ғылымдарының кандидаты Александр Шатних, облыстық білім басқармасы басшысының орынбасары Күлпаш Қалғожина, Солтүстік Қазақстан педагог қызметкерлерінің біліктілігін арттыру мекемесінің жетекшісі Алма Мырзалинова, Көкшетау университетінің профессоры Сабыр Сеңкібаев, тағы басқалар барлық деңгейдегі білім беру ұйымдарында, педагогтер арасында тәлімгерлікті ұйымдастырудың, кәсіби байқаулардың сапасын арттырумен, мазмұнын жетілдірудің толғақты жайттарын әңгімеледі.
Өмір ЕСҚАЛИ,
«Егемен Қазақстан»
Солтүстік Қазақстан облысы