![161211-39](http://old.egemen.kz/2011img/161211-391.jpg)
Егемендігіміздің ақ таңы атып, ұлан даланың абырой-даңқы асқақтап, мерейтойымызға әлемді таңғалдырған табыстармен келіппіз. Жиырма жыл... Жиырма жыл көп пе, аз ба?!
Қазіргі алпауыт деген елдердің өркендеу жолына үңілсек, әрине, өте аз... Бүгінгі ұрпақ біле бермейді, алғаш Кеңес Одағы құлап, оның құрамындағы елдер өз бетімен жан-жаққа тарағанда: «Енді не болдық, қайда барамыз?» деген зарлы сұрақтардың туғанына мен куәмін. Менің елім қысқа уақыт ішінде ертегілерде ғана кездесетін биікке көтерілді. Туған ел, оның басындағы Елбасымыз сыртқы «көзді» былай қойғанда, ішкі «көзінің» де салмағын, ауыртпалығын көтеріп, кедергілерді аттап өтіп, алдыға қадам басты.
«Қазақстанға егемендік күрес жолымен келген жоқ, Кеңес өкіметі бейбіт жолмен қалай құласа, Тәуелсіздік те бізге солай келді» деген ұшқары пікірлердің, сөздердің айтылғаны, айтылып жүргені рас.
Бір сәт тарих беттерін парақтайықшы... Көшпелі ата-бабамыз, Атырау мен Алтай, Есіл мен Ертіс арасындағы алып сахараны намысы қайнағанда «ереуіл атының» терімен, «егеулі найзаның» ұшымен, ашуы сабасына түскенде, алмас қылышынан да өткір Қазыбек бише толғасақ: «Жеріміздің шетінен жау баспасын деп, Найзаға үкі таққан елміз», деген сесті сөзімен де елін қорғаған. Қорғай отырып, артындағы ұрпағына мұра, аманат етіп қалдырған. Тіпті, сол бабалардың Шоқанша айтсақ «Бай ауыз әдебиетінің» өзінен азаттықты аңсау, отарлау бұғауын талқандау, ерлік пен өрлік, батырлық пен батылдықтың найзағайдай жарқылдаған қаһарлы дауысы естілмей ме?! Оған эпостық жырларымыз куә. Оларды тіпті, халық ой-санасынан туындаған арман-шежіре десек, кім шүбә келтірер? «Алпамыс», «Қобыланды», «Ер Тарғын» сынды жырларымызда, халқымыздың қалмақтармен күресі, отаршылдардан елін, жерін қорғауы көрінбей ме?! Әрине, дәл Алпамыстай, Қобыландыдай батырлар болмаған шығар, дегенмен қиял қайнары шындыққа ұласып, қалмақтарды жерімізден желкелей қуған Қабанбай, Бөгенбай, Дәулетбайлардың ерлігін бүгінгі азат ұрпақ, жасампаз ұрпақ ұмытпақ емес.
Күрес тек қан төгу ме? Қан төгу иманды, мейірімді ата-бабамның, Бұланайдай асқақ та биік тұлғасына, Бурабайдың «сексен көліндей» мөп-мөлдір, таңғы шықтай аппақ сезімдеріне жараспас еді. Ұрпағын асыл сөздің дәнімен, аталы сөздің нәрімен, алдаспаннан да өткір тіл арқылы күрескен Ақтамберді, Асан, Қазтуған мен Шалкиіз сынды «дала философтарының», «Зар заман ақындары» Дулат, Мұрат, Шортанбайлар мұрасы бұған дәлел.
Қазақ төріне жатты жақын көріп шығарып, бір дәнін қақ жара бөліп, қиын-қыстауда қасынан табылып, достық ниет білдірсе де бастарын имеген, жауларына жығылмаған, қол қусырып алдарына құламаған, ешқашан да құлдық қамытын кимеген.
Сонау ХІХ ғасырдан-ақ сахараға ағылған басқаның зиялысын да, зияндысын да ойландырған бір сұрақтар болған. «Алып сахара, шеті мен шегіне көз жетпейді, не түрмесі, не соты, не сақшысы жоқ, сонда бұлар қалай өмір сүреді, неге бағынды, мамыражай тыныштықты қалай ұстап тұр?! Әлде, күндіз-түні тынбай шырқалып жататын әні мен күмбірлеген домбырасының үніне бағына ма?!» – деп, таңғалған. Қазақтың бір ауыз аталы, кесімді сөзге бағынатынын, бір ауыз сөздің шешім болатынын келе-келе түсінген.
Ата-бабамыз еркіндік, азаттық үшін керегінде қолына қару да алған. Кенесары мен Исатай, Сырымдар, 1916 жылғы ұлт-азаттық күрестің батырлары, тере берсек, бұл тізім ұзара берер еді...
Бергі тарихты екшесек, кешегі Желтоқсан оқиғасы әлемді дүрілдетіп, қызыл империяның іргетасын дірілдетіп, азаттықтың қанға бөккен ақ туын желбіретті емес пе?!
«Қазақтар момын, қой сияқты жуас, көнбіс халық» дегенді өзгені былай қойып, өзіміз айтамыз. Мен бұл сөзді жүрексіз, сезімсіз, Абай мен Мұхтарды, Нұрсұлтандай ұлдарды дүниеге әкелген ұлы халықты бағаламау әрі оны қаралау мақсатында айтылған сөз деп айыптаймын. Халқым қит етсе қанжарын ойнатып, оғын арқадан кезейтін кекті халық емес. «Дастарқанымнан дәм татып еді», «көрші ақысы тәңір ақысымен бірдей», «мың жылдық құдам еді» деген ұстанымды өмірінің нұрлы шырағы етіп, телісі мен тентегін де, жат пиғылдыларды да ақыл мен сабырға, иманға, ізгілікке бөлген бейбітшіл халық. Шеті мен шегі жоқ алып сахарасындай пейілі кең, жан дүниесі таза, дүние мен малыңды «сүйінші» үшін лақтырып тастайтын қазақтың жомарттығы бір төбе. Бұл қойдай жуас момындықтың белгілері емес, керісінше абыздықтың, ұлылықтың белгісі. Қазақ – ерекше намысты, ары мен ұятын өлімнен де жоғары қоятын өр халық.
Пана іздеп келгендерді құшағына қысқан, Абай тағылымы айтқандай, «адамзатты бауырым» деп сүйген халық. Оқымай-ақ, өмір тәжірибесіне сүйенген, жан-жақты ғылым саласын меңгеріп, жаңалық ашқан дана халық. Оң жақта отырған қызын төрге шығарған халық. Аналар билік те айтқан, керегінде қолына қару алып, жауға да шапқан. Ол – тарихта бар, дәлелдеуді керек етпейтін шындық. Әйелдердің бет-аузын бүркеп, пәрәнжі жауып, қазан-ошақта еркектері жүретін, бәлиғатқа толмаған сәби қызын тұмшалап, тұншықтырып өсіретін «мұсылмандар», басқа да дін иелері, өкінішке қарай, қазір арамызға кіріп, адамдар арасына сына қағуға тырысуда.
Заңымызға бағынбай, тайтақтап жүргендерге қатал тыйым салу керек-ақ. Қазақстанды достықтың, бауырмалдықтың, ұлттардың береке-бірлігінің елі деп, әлемдік ірі саясаткерлер мойындай, дәлелдей отырып сөйлеуде. Осы жеңістердің барлығында халықтың, халық жолымен жүрген Елбасының көсемдік орны бар.
Әлем тарихына үңілсек, тәуелсіздікке жету жолдарының оңайға түспегеніне көз жеткізуге болады. Дегенмен, тіл мәселесі дәл біздердегідей күрделеніп, кедергілерге кезікпеген шығар деп ойлаймын. Сол кедергілердің басында өзіміз тұрмыз. Елбасының: «Қазақ, өз тіліңді, ең алдымен өзің үйрен, өзің қазақша сөйлес», деген сөзінің мәні терең. Осы мәселедегі оның өз үлгісі, өз тағылымы ше?!
Мен Нұрсұлтан Әбішұлымен 5 рет кездесу бақытына ие болдым. Тоқсаныншы жылдардың басында Қазақстан компартиясының ХVІІ құрылтайына делегат болып қатыстым. Жариялылықтың өмірімізге енді кіре бастаған сәулелі бір кездері еді. Құрылтай өте қызу талқылаумен өтіп жатты. Әсіресе, партияның жарғысы айналасындағы пікірлер тіпті шарықтау шегіне жетті. Азаттық, еркіндік, жариялылықтың бізге оңайға түспейтінін, күрестің алды да екенін түсіндім. Нұрсұлтан Әбішұлының ұстамдылығы, саясаткер ретіндегі ғана емес, ер-азаматқа тән қажыр-қайраты, ерекше сабырлылығы, қандай күрделі жағдайлардан да шыға білетін қасиеттеріне тәнті болдым.
Құрылтай оңды аяқталды, жарғы бекітілді, мақсат биігінен көріндік. Ара-арасындағы үзілісте жан-жақтан келген делегаттар Нұрсұлтан Әбішұлын ортаға алып, суретке түсіп жатты. Осы құрылтайға 14-15 мұғалім қатысқан едік. Бізге кезек тиер емес. Әріптестерімнің бірі: «Арамыздан шыққан тұңғыш лауреатсыз, өткірлігіңіз де бар, өтінішімізді үлкен кісіге жеткізіңізші», – деп өтінді.
Суретке түсіп жатқандардың жанына тақау тұрып, олар көтеріле бергенде әлі орнынан тұрып үлгермеген, орталарындағы Нұрсұлтан Әбішұлына ұстаздар өтінішін айттым. Бізбен суретке түсіп, соңынан әрқайсымыздың қолымызды алып: «Балаларға, ел-жұртқа сәлем айтыңыздар», – деді. Базардың қайнаған ортасында еңбек етіп жатқан сегізжылдық интернаттың (қазір лицей) ұжымы маған хат берген болатын. Ол кезде қазақ тілінде оқытатын мектептер Өскеменде әлі ашыла қоймаған кез. Сол хат туралы айттым. «Хатты Қарамановқа тапсырыңыз», – деді.
Осы ХVІІ құрылтайда ақын, қоғам қайраткері Олжас Сүлейменов сөз алып, полигонды жабу, ядролық қаруға қарсы күш жұмылдыруды тұжырымды түрде хабарлады. Біз, делегаттар, оны қолдап, Құрылтай қаулы қабылдады. Бүкіл әлемге маңызы зор шараның басында Елбасы тұрды.
Білім беру қызметкерлерінің үш құрылтайына қатыстым. Елбасымен тағы да үш рет кезіктім. Президиумда қатар отырдық. Сөйлеп тұрғанда, әлемге танымал ірі саясаткер, өз заманының көрнекті президенті ғана емес, өзіме бас әріппен жазылатын нағыз Ұстаз сөйлеп тұрғандай әсер етті. Оның сөзі ұстаздармен пікірлесу, сұхбаттасу, пікір алмасу сипатында болды. Әр сөзі жүректерімізге қонып, іштей онымен сөйлесіп отырғандай болдық.
«Сіздер, жақсы оқулық, жақсы оқу құралдары жоқ деп, жиі айтасыздар. Ізденімпаз мұғалімге шығар жол бар ғой. Мысалы, Сократтың «исследуем» деген ұстанымын неге тәжірибелеріңізге пайдаланбайсыздар? Балалар өздері ізденсін, тапсын, білімді өз еңбегімен алсын», – деген сөзін ұстаздар ұзақ қол шапалақтаумен қарсы алды.
Ал Сократтың ұстанымына мен ертеден-ақ жүгінетінмін. Қазіргі білім беру жүйесін модернизациялау, технологиялық оқыту кезеңінде де Сократтық тәсіл ғасырлармен бірге жасап, өзінің мәңгілік маңызын тәжірибеде дәлелдеп келеді.
Келесі кездесуім 2004 жылы оның қолынан «Құрмет» орденін алуыма байланысты еді. Сөз сөйледім. Кезінде ол «Қазақстан» телеарнасынан берілді. Есімде қалғаны: «Жас өскінді отансүйгіштік, елжандылыққа баулу Елбасының тағылымы, үлгісінен бастау алуы керек», – дегенім.
Марапат аяқталғаннан кейін Елбасы кетіп қалмай, елмен әңгімелесіп, суретке түсіп, жүрекжарды әңгімеге кірісті. Бәріне қол беріп, жылы қоштасып жатты. Оқшау тұрған маған да таяп келіп, ілтипат білдіріп тұрғаны оның ұлыларға тән қарапайымдылығы еді. Осы сәтті пайдаланып мен де дәптер жайын айта жөнелдім. Астанаға аттанарда Президентпен кезігетінімді естіген «Жас қалам» үйірмесінің талапкер балалары: «Апай, біздің Нұр көкемізге арнаған өлеңдерімізді ала кетіңізші, дәптерге жазып берейік», – деген өтініш білдірген-ді. 6-сыныптың бір оқушысы өлеңнің астына алақанының суретін сызып қойыпты. Мұны естіген әріптестерім: «Ұят болар, Президентке қолмен жазылған, қарапайым дәптерді қалай апарасыз? Апарғанда да балалардың шимайын оқи ма? Компьютерге теріп, альбом жасап апару керек еді», – деп тоқтау сала берді. Дәптер кабинетте қалды. Осы дәптер жайын айтқанымда, ол кісі елең етіп: «Қанипа, ол дәптер қайда, осында ма?» – деп сұрады.
«Жоқ, ауылда қалды, Сізге оны беру ыңғайсыз болар деп»...
«Оның несі ыңғайсыз, балалардың өлеңін оқымайды деп кім айтты? Мен бала болмаппын ба? Алып келу керек еді».
«Қолжазба еді...»
«Дәптерді облыс әкіміне беріңіз. Маған әкеліп береді. Ел-жұртқа, балаларға сәлем айтыңыз», – деді қоштасып жатып.
Бір сөз қосып отырғам жоқ, әңгіме осылай өрбіді. Қатты өкіндім, «алып барам» деп балаларды алдауға мәжбүр болдым. «Елдің сөзінде нем бар еді», деп бармағымды тістелей бердім. Елге келген соң бұл оқиғаны кейіннен Мәжіліс депутаты болған сол кездегі облыстық білім департаментінің бастығы С.И.Ферхоға айттым. «Жақсылап безендіріп, альбом жасап жібереміз», – деді. «Светлана Ивановна, мен Президентке «қолжазба дәптер» дедім. Альбом туралы сөз болған жоқ. Балалардың өз қолымен жазылған өлеңдерін, яғни сол дәптерді қаз-қалпында жіберейік», – деп қарсылық білдірдім. Олар альбом жасады, өлеңдерді компьютерге түсірді, «Әкімнен беріп жібердік», – деді.
«Апырай! – деп ойладым, бәрі осы бізден, үлкендерден шығады-ау, сәбилердің тарбиған алақаны бар, өздерінің қолымен жазылған өлеңдерін жібергенде ғой, Елбасы оны қолына ұстап, балалардың алақанын көріп, өзі жымиып, балалығын еске түсіретін еді-ау. Шеңберден, қолдан жасалған құрсаудан шыға алмаймыз, балаларды да соған тәуелді етеміз. Ана жолы ала барғанда ғой...» – деп, өкінішті ойдан арыла алмай-ақ жүрдім.
Осы бір дәптер оқиғасы мені қынжылтты әрі таңғалдырды. Расында, кімнің ойына келген, атағынан ат үркетін саясаткерлерді бас игізген кемеңгер тұлғаның балалардың өлеңіне, дәптеріне назар аударады, ерекше көңіл бөледі деген.
Осы жолы да ел-жұртқа сәлем жолдады. «Қалың елім, қазағым, қайран жұртым» деп өмірден өткен Абай ойыма оралды. «Елбасы Абайдың төл мұрагері екен-ау», – деп тебірендім.
Жалпы Елбасының қай еңбегін алып қарамаңыз, халықтың мақал-мәтелі, афористік оралымдары, даналыққа негізделген шешендік өнеріне ерекше көңіл бөлетіні байқалады. Осыған көзім жеткен соң халық даналығын іздей жүріп, Елбасының да шешендікке құрылған айшықты сөздерін іздеуді әдетке айналдырдым. Оқушыларды, жанымда жүрген әріптестерімді осы игі іске тарттым. Әсіресе, бұл іске шәкіртім, жас мұғалім Толықбаева (Исаханова) Гүлназ құлшына кірісті. Менің жетекшілігіммен ол «Н.Ә. Назарбаев еңбектеріндегі шешендік сөз» тақырыбына авторлық бағдарлама жасап, республикалық ғылыми-әдістемелік «Дарын» орталығы өткізетін конкурсқа қатысып, бас бәйгені жеңіп алды. Мәселе бәйгеде емес, тақырыптың өміршеңдігі, тұңғыш рет зерттелгендігінде еді. Ең бастысы, талаптануда, ізденуінде ғой десем, өткен қарашаның 17-сі күні Гүлназ интербелсенді тақта арқылы Астана қаласы, Шығыс Қазақстан облысының мектептеріне сабақ берді. Тыңдаушылар тақырыпқа өте қызықты. Астаналықтар сабаққа қызу қатысып, мені де тартып, пікірлерін, рахметтерін айтып отырды. Бұл сабақ менің республикалық ғылыми-әдістемелік атаулы зертханамда ұйымдастырылды.
Өскеменде қазан айында Астана күндері өткенін айта кетсем, сол тұста Астана қалалық оқу бөлімінің бастығы Әсима Бимендина зертханамен танысып, Астананың №64 мектебінде оның бөлімшесін ашу туралы ұсыныс жасаған еді. Ол көп ұзатпай-ақ ұстаздарын жіберді, бірігіп жоспар жасадық.
Егемен елімнің қысқа уақыт ішінде қол жеткізген табыстарының нақ төрінде Елбасының білім беру жүйесіне, балаларға жасап жатқан аталық қамқорлықтары тұр. Санамалап айтпағанның өзінде бұл орайда қазақстандық білім беру жүйесін әлемдік білім беру кеңістігіне енгізу мақсатындағы қарымды қадамдар, дарынды балалармен жұмыстар, Н.Ә. Назарбаевтың зияткерлік мектептерінің дүниеге келуін, «Болашақ» бағдарламасын айтуға болады.
Мен де жас жеткіншектерді туған халқымның Асан, Әйтекелерден қалған даналық сөздерімен қауыштыру үшін, мемлекеттік тілдің мәртебесін, абыройын көтеру үшін азды-көпті еңбектеніп келемін. Жетістіктерімнің сүбелі-сүбелісі де тәуелсіздігімізге тікелей байланысты болыпты.
Тоқсаныншы жылдардың басында «Әдебиетті тереңдетіп оқытатын авторлық бағдарлама» жасап, соның негізінде арнайы сыныптарым ашылды. Қазақ әдебиетін әлемдік әдебиет пен мәдениеттің бір бөлшегі ретінде оқыту мәселесін көтердім. Сыныпты бітіргендер ішінен 17 ғылым кандидаты, 3 ғылым докторы шықты. 70-тен астам оқушым облыстық, 18-і республикалық пән олимпиадаларында жүлделі орындарға ие болды.
«Республикалық ғылыми-әдістемелік атаулы мектебім» ашылып, ұзақ жылдар еліміздегі жаңашыл мұғалімдермен ақысыз-пұлсыз еңбек еттім. Отанымның түкпір-түкпіріне барып, қыс-жаз демей дәріс оқыдым, іс-тәжірибемді ортаға салдым. Тәубе, «Қазақтың Қанипасы», «Аңыз ұстаз» атандым. Бұл атақты маған құзырлы орындар емес, халқым, әріптестерім берді. Еңбегімнің 40 жылдығы халықаралық деңгейде Өскеменде, республикалық деңгейде Павлодарда өтті. Ең басты жетістігім, күндіз-түні мені түкпір-түкпірден іздеп, келіп-кетіп жататын ұстаздардан, ата-аналардан алдым босап көрген жоқ. Ауыз әдебиетінен бүгінгі әдебиетті қамтыған оқу бағдарламалары, 32 кітап, 100-ден аса мақалалар жаздым. Зертханада өз қолыммен жазылған 8000-дай дидактикалық материалдар, көрнекіліктер ұстаздар игілігіне айналып отыр.
Университетте де 25 жылдай қосымша еңбек етіп, қаншама студентті ұстаздық мамандыққа баулыдым. Еңбегімді санамалай берсем, бірталай уақыт кетер еді. Өз елімді былай қойып, шетелдік марапаттарға да ие болып отырмын. Моңғол ХР-ның «Даңқты ұстазы» марапатының иегерімін. Қазақ педагогикасына қосқан үлесім үшін еліміздің 4 жоғары оқу орны құрметті профессор, Педагогикалық ғылымдар академиясы Құрметті академик атағын берді. Ең бастысы, мен қарапайым әріптестерімнің құрметі мен сыйына бөлендім. Еңбек етсең, атақ-даңқ өзі іздеп келеді екен. Таңғы сегізден кешкі 5-ке дейін интернатта жүрсем, түнгі 3-терге дейін қолымнан қаламым түспейді. 43 жылғы өмірімнің тек жеткіншектер арасында, тұрмысы орта, қарапайым қазағымның балалары арасында өткеніне кеуде кере мақтанамын. Мен бақытты ұстазбын. Жаратушы ием өмір берсе, осылай еңбек ете берерім сөзсіз.
Тағы бір ой мені қатты мазалай береді. Абай да: «Қорқамын кейінгі жас балалардан», деген ғой. Қорқу емес, алаңдауым болар. Өмір ғой... Болашақта егемен елімнің басына жаңа президенттер де келер. Олар, бәлкім, жеті ұлттың тілін білетін, экономика мен ел басқарудың 70 тәсілі мен амалын меңгергендер болуы да мүмкін... Алайда дәл Нұрсұлтан Әбішұлындай туған тілінің нәрін, бар шұрайын шырайына келтіре пайдаланып, ата-бабамыздың әдет-салтын берік ұстап, Қазбек пен Әйтеке билерден қалған даналық сөздерді, Абайдың «Қалың елім, қазағым» деп соққан жүрегін ел билеуінде ұстаным ететін бүгінгідей Елбасы енді елімнің тағына келе ме, жоқ па деп толғанамын.
Ұлан даланың ұлы перзенті Нұрсұлтан Әбішұлына Жаратқан Ием әлем тарихында ешбір патша, ешбір ханға бермеген бақ пен тақты, атақ пен даңқты сыйлаған сияқты.
Жаратқанның жарылқауы, халқының қолдауы, туған тілінің киесі де оны жеңістен жеңіске жетелеген болар... Кім біледі, Жаратқан Ием, жат елдердің тепкісін көрсе де дінін, тілін, ділін, әдет-салтын жоғалтып алмаған, ешкімге «ләббай тақсыр» деп бас имеген өр, ер қазағына оң пиғылын берген болар...
Нұрсұлтандай әрі Нұр, әрі Сұлтан ұлын дүниеге әкеліп, халқыңның Нұрына айнал, Сұлтан болып, еліңді де сұлтандыққа жеткіз деген шығар...
«Уа, дариға, алтын бесік туған жер», деп Қасым ақын тебіренгендей, мен де: «Туған жер, осы бақытың басыңнан таймасын, балаларыңды жасампаздық биігінде әлдилей бер», дегім келеді.
Қанипа БІТІБАЕВА, КСРО Мемлекеттік сыйлығының лауреаты, Қазақстанның еңбек сіңірген қайраткері.