Торайғыр ауылы Баянауылға барар жол бойында. Табиғаты көз сүріндірер тау ішінде, көл жағасында орналасқан. Көл суы биік құзды шыңдардың түбінен толқындана жарыса шығып, жағаға соғылады. Түстік жиегінде үшкір басты биік шың – Найзатас тұр. Ашық беті көлге қараған су үстіне асыла біткен Үңгіртас үңірейеді. Тау түбінен Әулиебұлақтың суы ағып жатыр.
Осы бір сұлу жерде ақын Сұлтанмахмұт Торайғыровтың мерейтойына арналған рухани-мәдени мерекенің өтуі де ғажап. Ғажайып табиғат аясында, биік құзды тау баурайында өскен өршіл ақын Сұлтанмахмұт ХХ ғасырдың басындағы қазақ қоғамының шындығын, жаңашыл ой-пікірін жігерлі өлеңдері арқылы айта білді.
Ақын ұлын еске алған Ақбеттаудың баурайындағы ауылда жағалай киіз үйлер тігіліп, ақшаңқан этноауылдар тізілді. Қолөнер бұйымдарының түр-түрін көресіз, ою-өрнек салынған сан алуан киім, құрақ көрпелер, ат әбзелдері дейсіз бе, барлығы да осы бір күннің мән-маңызына сай жиналған дүниелер көпшілік назарына ұсынылды.
Тойға келген қауым Торайғыр ауылының жанындағы этноауылды ән мен күйге бөледі. Әр ауданның үйлері тігілді. Бұхар жырау, Мәшһүр Жүсіп, Мұса Шормановтың атымен аталған ауылдар және «Қазақ ауылы», тіпті «Рухани жаңғыру» деп аталатын киіз үйлер де қонақтарын құшақ жая қарсы алды.
Ал «Абай», «Әуез ғұмыр», «Иманжүсіп», «Көктау», «Таң алдында», «Үшқоңыр. Президенттің балалық шағы», «Тұңғиық» сынды туындылардың авторы, жергілікті суретші Жасыбай Қабылдинов Торайғыр ауылының әсем табиғатын қас-қағым сәтте қағаз бетіне түсіріп, жұртшылықты таңғалдырды.
Мерейтойға облыс әкімі Болат Бақауов бастаған қонақтар, ақын-жазушылар қатысты. Барлығы да Торайғыр ауылы маңындағы ақын кесенесіне барып құран бағыштады. Сұлтанмахмұт музейін аралап көрді. Қазір музейдің алдағы уақыттағы қызметі, күтіміне орай тиісті жұмыстар да атқарылуда. Ақынның 100 жылдық мерейтойына орай 1993 жылы кесенесін Маңғыстаудың ақ тасынан салуға заманымыздың заңғар жазушысы Әбіш Кекілбаевтың үлес қосқаны белгілі.
Келесі кезекте табиғат аясында құрылған сахна төрінде республикалық онлайн-мүшәйраның жеңімпаздары марапатталды. Қазылар алқасының төрағасы, ақын, Қазақстан Жазушылар одағы басқарма төрағасының бірінші орынбасары Ақберен Елгезек Шығыс Қазақстан облысынан келген Рауан Қабидолдинге бас жүлдені табыс етті. Онлайн-дауыс берген оқырман мен қазылар алқасы оның «Ақынның Алтайға келуі» атты туындысын жоғары бағалады.
Шымкенттік ақын Батырхан Сәрсенхан бірінші, екінші орынды Қарлығаш Қабай мен Ұмтыл Зарыққанұлы иеленді. Үшінші жүлдені алматылық Айдана Қайсарбекқызы, көкшетаулық Қайрат Сейтқазин, павлодарлық Жарқынбек Амантайұлы алды.
Сонымен бірге Сұлтанмахмұт Торайғыров атындағы арнайы жүлдеге жерлесіміз Жоламан Әйткен ие болды.
Мерейтойға арналған мәдени, спорттық іс-шаралар дәстүрлі әншілердің бірінші республикалық ән байқауымен жалғасты. Еліміздің өңірлерінен келген жас ақындар өлеңдерін арнады.
Фарида БЫҚАЙ,
«Егемен Қазақстан»
Павлодар облысы,
Баянауыл ауданы
