![Құтқару авиациясының алдында қыруар міндет тұр](/article_photo/1532579721_article_b.jpeg)
«Қазақстан Республикасы Үкіметінің 2016 жылғы 18 ақпандағы № 72 қаулысына сәйкес «Қазавиақұтқару» АҚ бюджет қаражаты есебінен қаржыландырылатын мемлекеттік органдар мен ұйымдарға тікұшақ қызметтерін ұсыну жөніндегі бірыңғай оператор болып белгіленді.Үкімет қаулысын іске асыру мақсатында Қазавиақұтқару ІІМ Төтенше жағдайлар комитеті мен оның бөлімшелерінің, Денсаулық сақтау министрлігінің Республикалық санитариялық авиация орталығының, Ауыл шаруашылығы министрлігінің Қазақ ормандарды авиациялық қорғау және орман шаруашылығына қызмет көрсету базасының, Қазаэронавигацияның, жергілікті атқарушы органдардың және басқа да мемлекеттік тапсырыс берушілердің мүдделері үшін әуеге көтеріледі. Авиация тасқын және мұз жағдайын бағалау мен авиациялық барлауды жүргізу мақсатында тартылады, төтенше жағдайлардан кейінгі қалпына келтіру жұмыстарын қамтамасыз етеді, бағытынан жаңылған балықшыларды құтқару, дала және орман өртін сөндіру жұмыстарына, селге қарсы іс-шараларға қатысады. Бұдан өзге, «Қазавиақұтқару» әуе кемелері білікті медициналық мамандарды жеткізу, шалғай елді мекендердегі науқастарға мамандандырылған медициналық көмек көрсету үшін ұшулар орындайды», деді ол.
Сонымен қатар Андрей Косолапов «Казавиақұтқарудың» авиапаркінде Қазақстанда және шетелде жасалған 27 тікұшақ бар екенін тілге тиек етті.
«Тікұшақтар Астана, Алматы, Атырау, Ақтау, Ақтөбе, Қызылорда, Шымкент, Тараз, Талдықорған, Өскемен, Павлодар, Орал, Балқаш қалаларында орналасқан. Мысалы, ЕС-145 (Еврокоптер) тікұшақтары денсаулық сақтау саласын дамытудың «Саламатты Қазақстан» мемлекеттік бағдарламасы шеңберінде сатып алынды және халықаралық стандарттарға сәйкес көліктік медицинаны дамытуды қамтамасыз етуге бағытталған. Еврокоптерлер дефибрилляторды, өкпені жасанды желдету жүйесін, тамырішілік инфузия жүйесін қамтитын медициналық модульмен және науқастар мен зардап шеккендерді тасымалдау үшін қажетті шараларды қамтамасыз ететін басқа да медициналық құралдармен жабдықталған. Еврокоптерлер көбінесе Республикалық санитарлық авиация орталығының өтінімдері бойынша тартылады.
Ми-8МТВ/8Т/171/ тікұшақтары негізгі авиациялық техника болып табылады, олардың қызметі төтенше жағдайлардың алдын алуға және жоюға бағытталған. Тікұшақтар өртке 5 тоннаға дейін от басатын сұйықтықты тастауға мүмкіндік беретін суағар құрылғыларымен жабдықталған. Ка-32А11ВС тікұшақтары қалалық ортада оңай жүріп, өрт сөндіруді жүзеге асыра алады. Simplex компаниясының «Fire Attack» өрт сөндіру жүйесімен және су пушкасымен жабдықталған Ка-32А11ВС өрт сөндірудің жақсы құралы болып табылады.
Әлемде жүк көтергіштігі ең жоғары сериялы Ми-26Т тікұшағы фюзеляж ішінде немесе сыртқы аспада 20 тоннаға дейін жүк тасымалдай алады. Сондай-ақ Ми-26Т 15 тоннаға дейін от басатын сұйықтықты тасымалдауға мүмкіндік беретін суағар құрылғымен жабдықталған. Ұшуларды қамтамасыз ету мен орындауды жоғары білікті ұшу және инженерлік-техникалық құрам жүзеге асырады. Персонал үнемі жетекші авиациялық оқу орталықтарында кәсіби деңгейді ұстау және арттыру курстарынан өтеді. Мәселен, Еврокоптер тікұшақтарының ұшу құрамына курстар мен тренажерлық даярлықтар «Еврокоптер Қазақстан Инжиниринг» ЖШС оқу орталығының базасында жүзеге асады. Мәселен, 2017 жылы ұшулардың саны 740-қа дейін жетті. 2018 жылдың 6 айында 240 ұшу жүзеге асырылды. Өткен жылғы қаңтарда Ақтөбе облысында өзбек азаматтарын апара жатқан автобуста болған қайғылы оқиға кезінде Қазавиақұтқару қаза болғандардың денелерін тасымалдау мен оқиғаны тергеу комиссиясын жеткізу үшін қысқа мерзімде оқиға орнына бірнеше тікұшақты жұмылдырды», деді ол.
Рауан ҚАЙДАР,
«Егемен Қазақстан»