Дәл қазір алқаптарға еккен көкөністі күтіп-баптап, жемісін жинауға дайын отырған фермерлердің жұмысын ерлік деп бағаласа болмай ма? Енді осы еңбек көрігі еліміздің әр өңірінде қайнап тұр десек тағы жаңылыспаспыз. Солардың алдыңғы қатарында жетісулық диқан-шаруалар да жүр.
Осыдан 4 жыл бұрын «Еңбекшіқазақ ауданының жергілікті қауымдастығы» қоғамдық қорының қолдауымен «Шелек фермерлері» атты бағдарлама жасалған болатын. Оның мақсаты Еңбекшіқазақ ауданындағы шағын шаруалардың басын қосып, өнім өндіруге жұмылдыру еді. Қазір сол мақсат орындалды деуге толық негіз бар. Алдымен 22 ұсақ шаруа қожалығының басын біріктіріп, ауылшаруашылық кооперативін құрған ынталы топ көкөніс және бау-бақша өнімдерін өсірумен айналысуға уағдаласты. Бұл аяқ асты қабылданған шешім емес-ті. «Шелек фермерлері» нарықты зерделеп, табыс табуға ыңғайлы ортаны анықтап алғаннан кейін барып, тәуекелге бел буған. Әсіресе тұтыну нарығындағы азық-түлік өнімдерінің түрлері іргедегі Алматы қаласында жоғары сұранысқа ие екендігін әбден зерттегеннен кейін барып, өздері өсірген бау-бақша өнімін тікелей сатып алатын сауда желілеріне ұсыныспен шықты.
Қазір «Шелек фермерлері» өндірген көкөніс өнімдері тікелей Алматы қаласындағы супермаркеттерге келіп түседі. Мысалы, «Магнум», «Арзан» сияқты сауда желісінің дүкендеріндегі бағасы арзан қияр, қызанақ, қырыққабат сияқты өнімдерде еңбекшіқазақтық диқандардың қолының табы бар. Еңбегі ақталған фермерлер қорға құйылған қаржыға тоқмейілсіп, аяқты көтеріп жатып алған жоқ. Істі ілгерілетуге ізденіспен кірісті. Әуелгіде ашық егістікте өнім өндіргендер көкөністі жыл он екі ай өсірудің тиімділігін түсініп, жылыжайлар салуға кірісті. Әрине оңай болған жоқ. «Еңбекшіқазақ ауданының жергілікті қауымдастығы» қоғамдық қорының қолдауына мемлекеттің жәрдемі қосылып, шаруалардың жоспары іске асты. Фермер Ерсінбек Әукенұлының табысты жолы осылай басталған. Ол он төрт жылдан бері «Шелек фермерлері» кооперативінің мүшесі ретінде өз ісін жандандырып келеді. Бастапқыда ашық далада көкөніс өсірген Ерсінбектің қазір 4 жылыжайы бар.
– Танаптардағы маусымдық жұмыстардың табысы жеткілікті болғанымен, күн салқындай бастағанда «әрі қарай қайтер екенбіз» деген уайым да торлай бастайтын. Енді жылыжайлар ашып, жылдың 4 мезгілінде де өнім алуға жағдай жасалғаннан кейін еңбек дәстүрі үзілмейтін болды. Төртінші жылыжайды іске қостық. Өнім көлемін әр жинаған кезеңде 14 тоннаға дейін жеткіздік. Жұмыс барысын да жаңа жүйемен жүргіземіз. Суару, тыңайту жұмыстары толық автоматтандырылған, – дейді фермер.
«Шелек фермерлері» жобасының аясында ісі ілгерілеген шаруаларға қазір инвестор болуға ынталы компаниялар табылып жатыр екен. Мысалы, «Филип Моррис Қазақстан» компаниясы Еңбекшіқазақ ауданының жергілікті қауымдастығы» қоғамдық қорының серіктесі ретінде үнемі қол ұшын созуға, қаржылай қолдауға дайын. Қазір осы компанияның қолдауымен «Шелек фермерлері» жобасы Алматы облысының барлық ауданына үлгі ретінде ұсыныла бастаған. Келешекте бұл үрдіске тұтас еліміздің фермерлері ықылас қойса деп үміттенеді мамандар.
– Жеке фермерлерді жинап, ортақ мүддеге жұмылдыру оңай емес. Жұмысты жаңаша жүргізуге баулу одан да күрделі. Қазіргі заман логистиканың заманы. Агросаладағы ақсап тұрған осы істі қолға алып жатырмыз. Фермерлеріміз тек өнім өндірудің жаңаша әдістерін меңгеріп қана қоймай, агробизнес пен озық технологияны басқаруды да үйренуі керек. Нәтиже бар. «Шелек фермерлері» жобасы соның дәлелі, – деді Еңбекшіқазақ ауданының жергілікті қауымдастықтар қорының атқарушы директоры Бақытгүл Елшібаева.
Қалмаханбет МҰҚАМЕТҚАЛИ,
«Егемен Қазақстан»
Алматы облысы
