![Ауылға бөлінетін несие көбейді](/article_photo/1532658963_article_b.jpeg)
Бағдарламаның операторлары холдингтің еншілес компаниялары – «Аграрлық несие корпорациясы» АҚ және «Ауыл шаруашылығын қаржылай қолдау қоры» АҚ. «Ауыл шаруашылығын қаржылай қолдау қоры» АҚ Басқарма төрағасы Жандар Омаров Елбасының бес әлеуметтік бастамасының ішінде шағын несиелеу көлемін ұлғайту бойынша атқарылған жұмыстарды атап өтті.
«Осы тапсырма аясында ауылдық мекендерге баратын шағын несие көлемі 30 млрд-тан 44,7 млрд теңгеге ұлғайған. Оның ішінде «Ауыл шаруашылығын қаржылай қолдау қоры» 27,2 млрд теңгені игеруді жоспарлап отыр. Бұрынғы осы бағдарлама бойынша берілген қаражатты ескерсек, биылға жалпы «Еңбек» бағдарламасы арқылы 30 млрд теңгеден астам шағын қаржылар бөлінеді деп жоспарланған. Бүгінгі таңда 10 млрд теңге игерілді. Оған 2835 несие берілді. Соның арқасында 3432 адам жұмыспен қамтылды. Оның ішінде 78 процентті бастапқы жобалар қамтиды. Айта кететін тағы бір жайт, біз биылдан бастап «Сыбаға» бағдарламасын қайта енгізіп жатырмыз. Бұл бағдарлама бойынша импортталған асыл тұқымды ірі қара және отандық ұсақ мүйізді мал, техника мен жабдықтар сатып алуға 40 млн теңге 15 жылға дейінгі мерзіммен жылдық үстем ақысы субсидиямен есептегенде 4 процентке дейін түсіріліп берілетін болады. Қазіргі уақытта аталған бағдарламаға сұраныс жоғары және жүйелі түрде іске асырылып жатыр», деді ол.
«Еңбек» бағдарламасы шеңберінде жеңілдетілген шағын несиелер 5 жылға дейінгі мерзімге беріледі, мал шаруашылығы саласындағы жобаларға және ауылшаруашылық кооперативтерін құру үшін – 7 жылға дейін, сыйақының жылдық тиімді мөлшерлемесі – жылына 6 проценттен аспайды. Шаруа қожалықтары мен фермерлік шаруашылықтар үшін ауылшаруашылық саласындағы жобаларға шағын несиелердің көлемі 19 млн теңгеге дейінгі соманы құрайды. Ауыл шаруашылығына жатпайтын бизнес түрлері үшін 6 млн теңгеге дейінгі несие қаражаты бөлінеді. Несиелер мал, өсімдік шаруашылықтарына, сондай-ақ ауылды жерлердегі бизнестің ауыл шаруашылығынан тыс түрлеріне берілетін болады.
Рауан ҚАЙДАР,
«Егемен Қазақстан»