Ел тұтынушыларының мал өнімдеріне деген сұранысын қамтамасыз ету, экспорттық әлеуетті арттыру бүгінде мал шаруашылығын дамытудың басты бағыты болып есептеледі. Осы ретте Елбасымыз Нұрсұлтан Назарбаевтың халыққа арнаған жолдауларында аграрлық саланың даму бағыттарын айқындап, оны әртараптандыру, бәсекелестік қабілетін арттыру еліміздің азық-түлік қауіпсіздігін қамтамасыз етудің бірден-бір жолы деп атап көрсеткендігі алдымен еске түседі. Осыған орай еліміздің Ауыл шаруашылығы министрлігі ауқымды шараларды атқаруда. Атап айтқанда, асыл тұқымды мал сатып алуға жеңілдетілген несиелер, өндірілген мал өнімдеріне, сатып алынған асыл тұқымды мал басына субсидиялар берілуде. Мемлекет тарапынан қарастырылған мұндай іс-шаралар өз тиімділігін көрсетуде.
Қазақстанда ауыл шаруашылығын реформалауға дейінгі кезеңде ет бағытындағы асыл тұқымды ірі қара мал саны 1 млн. 200 мың басты құраған болатын. Ал енді статистикалық мәліметттерде көрсетілгендегідей, биылғы жыл басындағы 53 мың асыл тұқымды аналықтың өз төлі есебінен көбеюін күтсек алға қойған еттің экспорттық әлеуетін арттыру бағдарламасын орындау үшін қаншама жыл керек болар еді. Қазіргі бәсекелестік заманы жайбарақаттыққа төзбейді. Сондықтан да қолда бар асыл тұқымды аналықтарды өз төлі есебінен көбейте отырып алыс-жақын шетелдерден біздің жерімізге лайықты, ауа райына төзімді, өнімділігі жоғары асыл тұқымды малдарды сатып алып, осылайша мал басын жеделдете арттыра алсақ, бұл экспортқа жарамды мал өнім-дерін күрт көбейтудің бірден бір жолы және қажетті іс-шарасы болып табылатындығына көз жеткіземіз.
Әрине, бұл көзжұмбайлыққа салынып, қажетті малды кез келген мемлекеттен сатып ала беру деген сөз емес. Ғалымдар мен тәжірибелі мамандардың көп жылғы жүргізген жұмыстары, озат шаруашылықтардың тәжірибесі ауа райының, табиғатының, жер бедерінің ұқсастықтарына қарай отырып біздің жерімізге бейімді, басқа да жағдайларға төзімді келетін ірі қара малының Канададан герефорд, ангус, голштиндік қарала, АҚШ-тан герефорд, ангус, сантагертруда, Австралия, Австрия, Ирландия, мемлекеттерінен герефорд, Франциядан салерс, обрак, Германиядан симментал тұқымдарын сатып әкелу тиімді екенін көрсетіп отыр. Бұл тұқымдардың өнімділік көрсеткіштері біздің отандық тұқымдардікінен екі еседей жоғары. Мәселен, олардың төлдерінің енесімен бағылу кезеңіндегі тәуліктік салмақ қосуы 1300-1500 грамм болса, бізде ол асып кеткенде 650-750 грамм төңірегінде ғана. Бұл, әрине, осы малдарды сатып алсаң, сонымен іс бітті, көзделген салмақ көлемін аласың деген сөз емес. Оларға ғылыми негізделген күтіп-бағу, азықтандыру секілді малдәрігерлік-зоотехникалық шаралардың тұтас кешенін қолдану керек. Осы ретте шетелдерден асыл тұқымды мал сатып алу бағдарламасын толық іске асыруға кедергі болып отырған төмендегідей проблемалар бар деп есептеймін: Біріншіден, шаруашылықтар мен жеке тұлғалар мал сатып алу үшін мемлекеттік құрылымдардан несиелер алған кезде оларға талаптардың шамадан тыс көп қойылатындығы.
Екіншіден, мал азығын дайындайтын шағын ықшамды техникалардың жоқтығы, шетелдік техникалардың қымбаттығы.
Үшіншіден, шабындық пен жайылымдық жерлердің тиімсіз пайдаланылу мәселелері.
Төртіншіден, білікті тәжірибелі мал мамандарының жетімсіздігі.
Бұл мәселелер де өз шешімін табар болса, аталған істің нәтижесі де әлдеқайда жоғары болар еді.
Еліміздің мал тұқымын асылдандыру жұмысында «Республикалық мал тұқымын асылдандыру орталығы «Асыл түлік» АҚ пен Алматы облысындағы «Асыл» ЖШС асылдандыру орталығы және өңірлердегі 18 дистрибютерлік орталықтар қызмет істейді. Асылдандыру орталықтары еліміздің ішкі рыногына қажетті асыл тұқымды мал ұрықтарын өндіреді. Дистрибютерлік орталықтар өз кезегінде осы ұрықтарды, қажетті құрал-жабдықтарды, сұйық азотты, тұтынушылардың сұранысы бойынша ұрықтандыру бекеттеріне жеткізіп беру қызметін көрсетеді. Малды өз төлі есебінен көбейтудің ең тиімді, пайдалы да арзан жолы аналық басты қолдан ұрықтандыру екені даусыз. Осы жұмыстың нәтижелі болуы бекеттердегі техник ұрықтандырушылардың біліктілігіне, тәжірибесінің молдығына, жауапкершілігіне тікелей байланысты. Республикада жұмыс атқарып жатқан 2077 бекеттегі техник ұрықтандырушылардың 2035-і арнайы дайындық курстарынан өтіп аттестация алған азаматтар. «Асыл түлік» АҚ осы маңызды іске жауапкершілікпен қарай отырып соңғы төрт жылда республика өңірлерінен келген 405 азаматты оқытып, техник-ұрықтандырушы етіп даярлап шығарды. Республика бойынша жыл басындағы 2821 мың бас аналықтың өткен он ай ішінде 2226 мың басы ұрықтандырылса, оның 495 мыңы немесе 22 пайызы қолдан ұрықтандырылды.
Бүгінгі таңда «Асыл түлік» АҚ-та өнімділігі жоғары 60 аталық бұқа бар. Оның 30-ы бағалаудан өткен, 30-на еліміздің 53 асыл тұқымды шаруашылықтарында ұрпағының сапасы арқылы бағалау жұмыстары жүргізілуде. 37 бұқа сүт бағытындағы голштиндік қарала, қызылала, қырдың қызыл сиыры, англер, және қарала тұқымдары. Аналарының өнімдік көрсеткіштері сүттілігі 8-16 мың кг. майлылығы 4 пайыздан, белогі 3,2 пайыздан жоғары, 6 бұқа аралас бағыттағы симментал тұқымы, 17 бұқа ет бағытындағы қазақтың ақ бас, әулиекөл, шетелдік герофорд, ангус тұқымдары. Қоймада 6 млн. 523 мың доза ұрық сақтаулы. Осыдан 976 мың доза бағалаудан өткен аталықтардың ұрығы болса, оның 190 мыңы ет бағытындағы, 221 мыңы аралас бағыттағы, 564 мыңы сүт бағыттағы бұқалардың ұрықтары. Осы жылғы өткен он ай ішінде 427 мың доза ұрық сатылды, оның 248 мыңы дистрибютерлік орталықтарға, 39 мыңы шаруашылық құрылымдарына сатылса, 140 мыңы жеке қожалықтардың аналық малдарын ұрықтандыруға жұмсалды. Бұл көрсеткіш өткен жылғы осы мерзіммен салыстырғанда 153 мың дозаға артық.
Осы бұқалардан өткен жылы 1 млн. доза ұрық алсақ, биылғы жылы 11 айда 1 млн. доза ұрық алынды. Оның 316 мың дозасы бағалаудан өткен аталықтардан алынған және халықаралық стандартқа сай келетін француздық технологиямен дайындалған. Сату бағасы тұтынушыларға тиімді. Егер осындай шетелдік тауарлардың бір дозасы 800-900 теңге тұрса, бізде оның жарты бағасы ғана. Осы орайда айта кететін мәселе дистрибьютерлік орталықтар мен ауылшаруашылық құрылымдары тауарды, яғни ұрықты сатып алып ұрықтандыру жұмысымен тікелей өздері айналысса, жеке қожалықтарға келгенде әңгіме өзгеше. Бүгінгі таңда қолда бар малдың 80 пайызы жеке қожалықтарда екені белгілі. Сондықтан да осы сектордың малдарын асылдандыру жұмыстары өте маңызды іс. Әрине, Үкімет тарапынан да, жергілікті бюджеттерден де жеке қожалықтардың малдарын өз төлі есебінен көбейту жұмысына көп көңіл бөлініп айтарлықтай қаржы бөлінуде. Осы тұрғыдан алғанда аналық малды қолдан ұрықтандыруда есепте бар аналықтың 38 пайызын қамтамасыз еткен Алматы облысының шаруашылықтары алда келеді. Осындай игі жұмыстарды іске асырып шаруа қожалықтарына айтарлықтай жәрдем көрсетіп отырған Жамбыл облысы әкімдігі 34 пайыз қамтыды. Солтүстік Қазақстан, Батыс Қазақстан, Оңтүстік Қазақстан облыстарының әкімдіктері де мал басын асылдандыруға лайықты көңіл бөліп тиісті қаражат бөлуде.
Алайда, жағдай барлық жерде бірдей емес. Сондықтан республика бойынша малды қолдан ұрықтандыру көрсеткіші бар-жоғы 17 пайыз ғана болып отыр.
Аналық басты қолдан ұрықтандыруды 35-40 пайызға жеткізген жағдайда ұрықтың қажеттілігі екі есеге артып, жылына 2 млн. ұрық өндіруге тура келеді. Ол үшін алыс-жақын шет елдерден бағалаудан өткен асыл тұқымды бұқаларды сатып алумен қатар өзіміздің асыл тұқымды зауыттарда өсіріп жатқан өнімділігі жоғары аталық пен аналықтардан туылған төлдерді орталыққа алып, оларды бағалау жұмыстары қатар жүргізілуі тиіс. Осы негізде шетелдік асыл тұқымды бұқаларды сатып алғанда олардың геномдық бағалаудан өткен неғұрлым жасырақтарын алуға көшкен дұрыс. Өйткені, аталықтарды геномдық әдіспен тексеру ұрпағының сапасы арқылы бағалау әдісіне қарағанда әлдеқайда тиімді.
Мысалы, сүт бағытындағы аталық бұқаның бір басын ұрпағының сапасы арқылы бағалау жұмысын жүргізгенде орта есеппен 60 айда 1250 мың теңге қаржы жұмсалады. Ет бағытындағы аталық бұқаны бағалауға 24 айда 500 мың теңге қаржы жұмсалады.
Ал геномдық бағалауды жас кезінде анықтағандықтан бағалауға қосымша уақыт қажет етпейді. Сатып алған ұрпағының сапасы арқылы бағаланған бұқаға қарағанда 4-5 жыл артық өнім береді, экономикалық тиімділігі де 3-4 есе көп болады.
Ген дегеніміз, тұқым қуалау бірлігі. Ген ДНК-ның құрамдас бөлігі. ДНК нуклеотидтерден тұрады. Ірі қарада 3 млрд. астам нуклеотид белгілі.
Осы нуклеотидтердің орналасуы реттіліктеріне байланысты өнімділік белгілері анықталады, бүгінгі күнде «Еуропалық генетика» деген одақта 777 мың нуклеотидтің орналасуы белгілі және осы арқылы өнімділік белгілерінің тұқым қуалауын анықтай алады. Бұл – күрделі жұмыс. Ол зертханаларда заманауи компьютерлік есептеулерімен жүзеге асырылады. Осы нуклеотидтердің орналасу реттілігі «ЧИП» деп аталады және осы ақпарат сол «ЧИП»- те сақталады. Малдың генетикалық әлеуеттілігін анықтау үшін одан жас ерекшелігіне қарамастан биологиялық сынама (қан, тері, жүн, тағы басқа ағзалардан) алынып биологиялық сынама негізінде тексерілетін малдың нуклеотидтің орналасу реттілігі анықталады. Осы анықталған реттілік чиптегі базалық нуклеотидтің орналасу реттілігімен салыстырылады. Нәтижесінде, малдың тектік әлеуеттілігі белгілі болады. Бұл әдіс АҚШ, Канада және Еуропа елдерінде 2009 жылдан бері дәстүрлі мал бағалау әдісімен қатар қолданылады. Бүгінгі күндері осы елдерде сүтті бағыттағы аталық малдардың 90 пайызына дейін осы әдіспен бағаланып, өндірісте қолдануда.
Еліміздің экономикасын қарқынды дамыту мақсатында ғылым мен тәжірибенің озық үлгілерін пайдалана отырып өндірістің үдемелі өсуінің негізін қалауымыз керек. Ол үшін осы жаңалықтарды өндіріске енгізу үшін тездетіп заңдылық негіздемелерін әзірлеген дұрыс.
Зоотехникалық нормалар мен тәжірибе көрсеткендей, бір аталыққа жыл көлемінде немесе маусымда орта есепен 30-35 сиырдан келеді. Сонда 2 млн. аналыққа жыл сайын 6 мыңға жуық асыл тұқымды аталық керек екен. Оны қайдан аламыз? Міне осы мәселе төңірегінде оңтайлы іс шаралар жасап, шетелден сатып әкелінген асыл тұқымды малдарды өсіріп, олардың шыққан тегін, өнімділік көрсеткіштерін анықтап, асылдандыру куәліктерін толтыру секілді селекциялық жұмыстарды жүргізе отырып, аталық малдарды тұқым үшін даярлау да өзекті мәселелердің бірі болып отыр. Қазір Ауыл шаруашылығы министрлігі бұл мәселемен шұғылдану үстінде.
Жора АЛМАНТАЙ, «Асыл түлік» АҚ басқарма төрағасының міндетін атқарушы, ауыл шаруашылығы ғылымдарының кандидаты.