2011 жылы 16 желтоқсанда болған Жаңаөзен оқиғасы – Қазақстан Республикасы Тәуелсіздігінің 20 жылдық тарихының соңғы беттеріне дақ түсірді. Өкінішті, әрине...
Адам шығыны бар. Аймақты шарпыған бей-берекетсіздік пен тәртіпсіздік көріністері алғашқы күннен-ақ бұқаралық ақпарат құралдары мен теледидар арқылы берілді.
Осы мәселеге орай Елбасының халыққа үндеуі жарияланды, қоғам және мемлекет қайраткерлері, жастар пікірлерімен бөлісті. Олар халықты сабырлылыққа шақырып, сүттей ұйыған еліміздің тыныштығын бұзуға тырысқан жымысқы күштердің ықпалына түспеуге үндеді.
Сырт елдерге осыдан 20 жыл бұрын «Қазақ жерінде ұлттық мемлекет құру өз шешімін тұңғыш рет тапты» деп, еңсемізді көтеріп мақтана көтерілген сәтте қазақтың тұтастығына сызат түсіру – елдігімізге сын.
«Алаш» – ежелгі түркі сөзі. «Бауырластар», «қандастар», «туыстар» мағынасын береді. Бұл ұғым көне заманда, түркі халықтары бөліне қоймаған қауым кезінде дүниеге келген. «Алаш» немесе «Қазақ» атауының Еуразия кеңістігіндегі түркітілдес халықтардың жадында этноәлеуметтік жаралым тұрғысында орнығып, осы атау алғаш рет этнонимдік мәнінде Қазақстанның батыс өңірінде қолданылғаны туралы тарихи тұжырымдар бар.
Маңғыстау облысы – үш жүзден астам әулие бабаларымыздың киелі мекені. Қазақтың жерасты байлығы – мұнайымыз қордаланған жер.
Қазақ жерінің асты мен үстіне толы табиғи байлық ұлан-ғайыр жердегі азғантай қазаққа жетеді. Тәубе! Қанағатшыл болайық, ағайын!
16 желтоқсанда болған Жаңаөзен оқиғасы – «саяси мәдениетсіздік» көрінісі болды. Бүгінгі бейбіт заманда өзге емес, өзімізді өзіміз әшкерелеп, сыртқы саясатта елдің беделін түсіру – «қаны қазаққа» жат қылық.
Біздер, Тәуелсіздік тарихын зерттеуші ғалымдар, жаңаөзендік бауырларымызды ғасырлар бойы ата-бабамыз армандаған тәуелсіздіктің құнын түсірмеуге және елімізде қалыптасқан жағдайда азаматтық танытуға шақырамыз!
Қазақ қоғамын құраушы әрбір азамат тәуелсіздік жылдары дүниеге келген ұрпақтың жарқын болашағы үшін бірге қызмет етейік!
Мемлекет тарихы институтының жетекші тарихшы-ғалымдары: Б.Аяған, Ж.Қыдырәлина, А.Қашқымбаев, Ж.Қалиев, С.Дүйсен, М.Анафинова, А.Ғабдуллина.
АСТАНА.