Кеше Ақордада Қазақстан Республикасының Мемлекеттік хатшысы Қанат Саудабаевтың төрағалық етуімен Шетелде кадрлар даярлау жөніндегі республикалық комиссияның қорытынды мәжілісі өтті.
Отырысты сөз сөйлеп ашқан Қ.Саудабаев: «Елбасы бағдарламасының ең маңызды басымдығына ие болған жастардың білім деңгейі мен сапасын арттыру мақсатында көптеген жұмыстар атқарылды. Тәуелсіздіктің 20 жылында білім мен ғылымның қаржыландырылуы едәуір артты, жыл сайын мектептердің жүйесі кеңейтілуде, осының нәтижесінде елімізде ең жоғары халықаралық стандарттарға жауап беретін «Назарбаев Университеті» ашылғанын атап өткен жөн. Экономикалық қиындыққа қарамастан тәуелсіздіктің алғашқы жылдарынан-ақ Президенттің бастамасымен тағайындалған «Болашақ» бағдарламасы шет елдегі алдыңғы қатарлы жоғары оқу орындарында кадр даярлауда ерекше орын алды. Қазіргі таңда «Болашақ» түлектері әлеуметтік-экономикалық, индустриялды-инновациялық дамуға үлкен үлес қосуда. Сол себепті біз мемлекетіміздің үдемелі дамуына қажетті жоғары білікті, бәсекеге қабілетті мамандарды даярлайтын Президенттік бағдарламаның мүмкіншілігін әрі қарай барынша қолдана түсуіміз керек», – деп атап өтті.
Қорытынды мәжілісте Білім және ғылым министрі Б.Жұмағұловтың баяндамасы тыңдалды. 2011 жылғы 1 қыркүйек пен 8 желтоқсан аралығында өткізілген конкурстық іріктеудің бірінші және екінші кезеңдерінің нәтижелері бойынша Шетелде кадрлар даярлау жөніндегі республикалық комиссияның қарауына «Болашақ» халықаралық стипендиясын тағайындау үшін 389 үміткердің жеке істері шығарылды. Олардың ішінде конкурстық іріктеуге 67 үміткер шетелдің жоғары оқу орындарына өз бетімен түскен үміткер ретінде, ал 322 жас жалпы конкурс бойынша қатысқан еді. Үміткерлердің саны мен оқыту бағдарламалары бойынша өтінімдерге келсек, магистратураға – 328, докторантураға – 2, ғылыми тағылымдамаларға 59 үміткер түсіп отыр. Жастардың көпшілігі құжаттарын Ұлыбритания (159 адам), АҚШ (91 адам), Ресей (34 адам), Германия (19 адам) сияқты өркениетті елдердің жоғары оқу орындарына тапсырса, мұнан басқа тағы да Франция, Италия, Австралия, Қытай, Нидерланды, Норвегия, Чехия, Канада, Словакия, Австрия, Швейцария елдерінде білім алуды жөн санағандар баршылық. Үміткерлердің дені «Мемлекеттік басқару», «Білім саласындағы басқару», «Құқық», «Экономика», «Ақпараттық технологиялар мен жүйелер» мамандықтарын таңдаған.
Шетелде кадрлар даярлау жөніндегі республикалық комиссия отырысының қорытындысы бойынша 216 үміткерге «Болашақ» халықаралық стипендиясын тағайындау туралы шешім қабылданды. Комиссия 2012 жылға арналған басым мамандықтар тізбесін бекітті. Тізбе бойынша 74 мамандық бар. Тағы бір ескере кететін жәйт, мамандарды даярлау тек магистратура мен докторантура (PhD) бағдарламасы шеңберінде ғана іске асырылмақ.
Комиссия отырысының қорытындысы туралы баяндаған білім саласы өкілінің айтуы бойынша, 2011 жылғы «Болашақ» бағдарламасы шеңберінде атқарылған жұмыстар қорытындыланды. Түлектерді жұмысқа орналастыру мәселесі сөз болды. Білім туралы заңға енгізілген өзгерістер мен толықтырулар бойынша «Болашақ» бағдарламасы шеңберінде келесі жылдан бастап тек педагогикалық кадрлардың ғана емес, сонымен қатар техникалық кадрлардың, медицина саласы мамандарының тағылымдамадан өтуіне мүмкіндік туғызылмақ десек, республикалық комиссияның қорытындысы бойынша жалпы келесі жылдан бастап «Болашақ» стипендиясына ие болуға үміткерден міндетті түрде жұмыс беруші жақтың кепілдік хаты талап етіледі. Стипендия тағайындалғаннан кейін стипендия иегері жұмыс беруші және халықаралық бағдарламалар орталығы арасында үш жақты келісім-шарт жасалынбақ. Демек, мұнан былайғы уақытта шетелде білім алып жүрген жастар өзінің жұмыс берушісінің кім екенін алдын ала білуі шарт. Сондықтан да комиссия келесі жылдан бастап стипендияны тек жұмыс өтілі бар азаматтарға ғана беруді ұйғарды.
Қарашаш ТОҚСАНБАЙ.